2 TIMOTI NIHNA 3 - Tedim Bible

Nitawp Ni Huna Mihing Pianzia

¹ Nitawp ni hun pen a lauhuai hun ahih ding lamtak phawk in.

² Tuahun ciangin mite in amau angsung ding bek ngaihsunin, huaihamin, kisialin, kihisakin, mi zahko-in, nu le pate’ thu mang loin, lungdam theihna mel nei loin, biakna lungsim nei loin,

³ mi khual loin, hehpihna nei loin, mi gensia-in, ngongtatin, kihtakhuai-in, thuhoih deih loin,

⁴ ciampelin, thu khual loin, kiphasak gawpin, Pasian don loin pumpi nopsakna bek deihin,

⁵ biakna thu a puathamteng zui napi-in biakna hangin vangliatna thu a omte deih lo ding uh hi. Tua bangin a gamta mite na pelh in.

⁶ Tua bang mite pawlkhat, mite inn-ah va hawh khiankhianin, deihna nam tuamtuam le mawhna lungsim tawh a kidim numeite na thuzawh uh hi.

⁷ Tua bang numeite in thu a zakzak uh hangin a man le a man lo khen thei lo uh ahih manin thuman thutak thei zo lo uh hi.

⁸ Jannes le Jambres-te in Moses thu a nial mah bangin upna paizia a man lo hih thuhilh mite in zong thuman thutak a nial uh hi.

⁹ Ahi zongin Jannes le Jambres-te tungah a piangsa thu mah bangin mi khempeuh in amaute’ haina mu ding uh ahih manin a nasepna uh sau tung khollo ding hi.

Paul in Timoti A Hanthot Tawpna

¹⁰ Ahi zongin nangmah in ahihleh ka thuhilhna, ka gamtatna, le ka nuntakna-ah ka ngim ka tup thute na hong zui hi. Ka upna, ka lungduaina, itna ka neihna, ka lungkipna,

¹¹ bawlsiatna ka thuakna, gimna ka thuakna, le Antiok, Ikonium, le Lystra khuate-ah kei tunga thupiang, nasia takin bawlsiatna ka thuaknate na theih na phawksa ahi hi. Ahi zongin Topa in hih haksatnate khempeuh panin kei hong suaktasak hi.

¹² Khrih Jesuh tawh kipawlin Pasian’ deihna bangin a nungta nuam khempeuh in bawlsiatna a thuak ding mah hi a,

¹³ migilote le thuthei kineihin mi khem theite zong siattat semsemin, amaute in mi khemkhemin, amaute mah in zong khemna a thuak ding mah uh ahi hi.

¹⁴ Ahi zongin nang na hih leh na theihsa na upsa thute ah kip paisuak in. Nang tungah thu hong hilhte kua mi ahi hiam cih na theihsa hi a,

¹⁵ Khrih Jesuh upna hangin hotkhiatna a hong ngahsak thei ding pilna a hong pia Lai Siangtho pen na neutung a kipanin a theisa na hihna thu zong na theihsa thu mah ahi hi.

^16-17 Pasian’ na a sem mite mi cingtaak hi-in, na hoih namkim a septheih nadingun Lai Siangtho pen Pasian’ lamlahna tawh a hong kipia hi a, thuman thutak hilh nading, a khialte taii nading, a man lote a manin puah nading, a manin nuntak theih nading thuhilh nadingin a manpha mahmah ahi hi.