2 SAMUEL NIHNA 7 - Tedim Bible

David tawh Pasian’ Thuciamna

¹ Tu-in kumpipa ama inn sungah tengin Topa in ama kiima a galte khempeuh panin tawlngakna a piak khit ciangin,

² kumpipa in kamsang Nathan kiangah, “Tu-in thei in; keimah taamtak inn hoih sungah ka om a, ahih hangin Pasian’ Thuciamna Singkuang puanbuk sungah omlai hi,” a ci hi.

³ Tua ciangin Nathan in kumpipa kiangah, “Pai in; na lungsim a om khempeuh hih in; bang hang hiam cih leh Topa in hong ompih hi,” a ci hi.

⁴ Ahih hangin tua zan mahin Nathan kiangah Topa’ thu hong tung a,

⁵ “Pai inla ka nasempa David kiangah gen in. ‘Topa in hih bangin ci hi: Ten nading biakinn khat hong lamsak ding na hi hiam?

⁶ Israel mite Egypt panin ka paikhiatpih toh ni a kipan tuni dongin biakinn sungah ka om nai kei a, puanbuk sungah omin ka pai kawikawi hi.

⁷ Israel mite khempeuh tawh ka painasa mun khempeuhah, ka mi Israel-te a cing dingin ka piak thukhente khat peuhpeuh tungah, “Bang hangin taamtak biakinn hoih hong lamsak lo na hi hiam?” ci-in kam khat beek gen ngei ka hi hiam?’ ci hi.

⁸ “Tua ahih ciangin tu-in ka nasempa David kiangah hih bangin na gen ding hi. ‘Vanglian Topa in hih bangin ci hi: Ka mi Israel-te tungah ulian dingin lonona mun, tuute na zuihna panin nang kong la hi.

⁹ Na paina peuhpeuhah nang tawh kong om a, na galte khempeuh ka hong zosak hi. Leitung miliante’ min khat mah bangin nang a dingin min lian khat kong bawlsak ding hi.

¹⁰ Keimah in ka mi Israel-te a dingin mun khat ka seh ding a, amau’ munah amaute tengin a kinawngkaisak nawn loh nadingin amaute ka phut ding hi. Nidanga bangin mi ngongtatte in,

¹¹ ka mi Israel-te tungah thukhente ka koih khit zawh, amaute gimsak nawn lo ding hi. Na galte khempeuh panin nang tungah tawlngakna kong pia ding hi. Tua tham loin Topa in nang a dingin suanlekhak hong bawlsak ding nang tungah Topa in gen hi.

¹² Na pu na pate’ kiang na zuat ni ciangin, nangma sung panin hong suakkhia ding na tapa nangma nungah ka khangsak ding a, keimah in ama kumpi gam ka kipsak ding hi.

¹³ Amah in keima min dingin biakinn khat lam ding a, keimah in ama kumpi gam tokhom a tawntungin ka kipsak ding hi.

¹⁴ Kei pen ama pa ka hi ding a, amah pen keima tapa hi ding hi. Amah in mawhna a bawl ciangin, keimah in mite’ ciangduai tawh amah ka thuhilh ding hi.

¹⁵ Ahih hangin nangma ma-a ka hepkhiat Saul’ tung panin ka lakkhiat bangin ama tung panin ka itna kip ka lakhia kei ding hi.

¹⁶ Na suanlekhakte le na kumpi gam keima mai-ah a kip tawntungin kibawl ding a, na kumpi tokhom kip tawntung ding hi,’ ci-in gen in,” a ci hi.

¹⁷ Hih thute khempeuh tawh a kizui le hih maangmuhna khempeuh tawh a kizui-in Nathan in David kiangah a gen hi.

¹⁸ Tua ciangin kumpi David sungtumin Topa’ mai-ah tu a, “Topa Pasian aw, tu ciang dong hih bangin kei nong kep nadingin kei kua hi a, ka innkuan bang ahi hiam?

¹⁹ Hih pen nangma mitah thu neuno khat hi lai hi, Topa Pasian aw. A hong tung ding sauveipi sung na nasempa’ suanlekhakte’ thu ding na gen khin a, mailam khangte zong kei nong lak khin hi, O Topa Pasian!

²⁰ David in nang tungah bang genthuah nawn ding ahi hiam? Bang hang hiam cih leh nangmah in na nasempa na thei hi, O Topa Pasian!

²¹ Nangma thuciamna bang le na lungsim tawh kizui-in na nasempa na theihsak nadingin hih thu lian khempeuh na piangsak hi.

²² Tua ahih ciangin nang na lian takpi hi, Topa Pasian aw. Ka bilun ka zakna uh tawh kizui-in nang tawh a kibang kuamah om lo a, nang simloh Pasian dang om lo hi.

²³ “Ama mite’ mai-ah minam khat le a pasian-te hawlkhiatna tawh ama a dingin min bawlin, amaute a dingin a lian a lauhuai nate hih sakin, ama mi dingin a honkhia dingin Pasian a paina na mi Israel-te, leitung minam dang kua tawh kibang ahi hiam?

²⁴ Nangmah in nangma mi ahi tawntung dingin na mi Israel-te nangma a dingin na kipsak hi. Topa aw, nangmah, amaute’ Pasian na suak hi.

²⁵ Topa Pasian aw, tu-in na nasempa le ama suanlekhakte tawh kizomin na gensa thu a tawntung dingin kipsak inla, nangma gensa bangin hih in.

²⁶ Tua hileh, ‘Vanglian Topa pen Israel-te tungah Pasian hi,’ ci-in nangma min kiliansak tawntung ding a, nangma mai-ah na nasempa David’ suanlekhakte kumpi-in kikipsak ding hi.

²⁷ Bang hang hiam cih leh Israel-te’ Pasian, Vanglian Topa nangmah in, ‘Nangma suanlekhakte kumpi-in kong bawlsak ding hi,’ ci-in na nasempa tungah pulakna na bawl khin hi. Tua ahih ciangin na nasempa in nang tungah hih thungetna hong ngen ngam hi.

²⁸ Tu-in Topa Pasian aw, nang, Pasian na hi a, na thute manin, na nasempa tungah hih na hoih na ciam khin hi.

²⁹ Tua ahih ciangin tu-in nangma mai-ah a om tawntung theih nadingin na nasempa’ suanlekhakte thupha piak ding hong lungkim in. Bang hang hiam cih leh Topa Pasian aw, nangmah in na gen khin a, nangma thupha tawh na nasempa’ suanlekhakte thupha kipia tawntung ding hi,” a ci hi.