2 SAMUEL NIHNA 5 - Tedim Bible

Israel Kumpi-in David Kikoih

¹ Tua ciangin Israel minamte khempeuh Hebron-a David kiangah hong pai-in, “En in, kote pen nangma guh le nangma sa ka hi uh hi.

² A beisa hunte-ah, kote tungah Saul kumpi ahih laitakin Israel-te kuan khiatpihin a ciahpih pa pen nangmah na hi hi. Topa in nangma kiangah, ‘Nang pen keima mi Israel-te a cing pa hi-in, Israel-te tungah ulian na hi ding hi,’ hong ci hi,” a ci uh hi.

³ Tua ahih ciangin Israel upate khempeuh Hebron-a kumpipa kiangah hong pai uh hi. Kumpipa David in amaute tawh Topa’ mai Hebron-ah thuciamna khat bawl a, amaute in Israel-te tungah kumpi-in David sathau a nilh uh hi.

⁴ Gam uk dingin a kipatin David kum sawmthum pha a, amah in kum sawmli sung uk hi.

⁵ Hebron panin kum sagih le kha guk sung Judah gam sung uk a, Jerusalem panin kum sawmthum le thum sung Israel-te khempeuh le Judah gam a uk hi.

David in Zion La

⁶ Tua ciangin kumpipa le a mite tua gam a teng Jebus mite a sim dingin Jerusalem-ah pai uh a, amaute in David kiangah, “Kote nong zo vet kei ding hi; mittaw le khebaite nangawn in nang hong notkhiazo ding uh hi,” a ci uh hi. “Hih lai-ah David hong paizo peuhmah lo ding hi,” ci-in ngaihsun uh hi.

⁷ Ahi zongin David in kumpipa’ khua ahi Zion munmuanhuai la hi.

⁸ Tua ciangin David in tua ni-in, “Jebus mite a vatgawp nuam peuhmah, keimah David in ka muhdah zahin a mudah mi peuhmah, tua khebaite le mittawte a sim dingin tuizawl dungah pai ta hen,” a ci hi. Tua ahih ciangin, “Mittawte le khebaite Topa’ inn sungah lut lo ding hi,” kici hi.

⁹ Tua ciangin munmuanhuai sungah David tengin David khuapi ci-in min a phuak hi. Tua ciangin David in Millo panin biakinn lamah khuapi lam hi.

¹⁰ David lian semsem hi; bang hang hiam cih leh Vanglian Pasian, Topa in amah ompih hi.

Hiram in David a Theihna

¹¹ Tua ciangin Taia kumpipa Hiram in kamtaite le taamtak singte, le David a dingin inn khat a lamsak khutsiamte, le leilesuang innlam a siamte zong a puak hi.

¹² Tua ciangin David in Israel-te’ tungah kumpi-in Topa in amah a kipsak khitna le Israel mite’ hangin ama kumpi gam a liatsakna a phawktel hi.

Jerusalem-ah David’ Tate Suak

¹³ Hebron panin hong tun khit ciangin David in Jerusalem panin zineute le zite lathuah lai a, David’ tanute le tapate piangthuah lai hi.

¹⁴ Jerusalem-ah a neih a tate’ min: Shammua, Shobab, Nathan, Solomon,

¹⁵ Ibhar, Elishua, Nefeg, Jafia,

¹⁶ Elishama, Eliada, le Elifelet ahi hi.

David in Filistia-te Zo

¹⁷ Israel-te tungah kumpi-in David sathau a kinilh khitna thu Filistia-te in a zak uh ciangin David a man dingin Filistia-te khempeuh kuanto uh hi. Ahih hangin David in tua thu za-in munmuanhuai-ah paisuk hi.

¹⁸ Tu-in Filistia-te hong pai-in Refaim kuamsung dim uh hi.

¹⁹ Tua ciangin David in Topa thu dongin, “Filistia-te do-in ka kuanto ding hiam? Keima khut sungah amaute na hong pia ding hiam?” a ci hi. Topa in David kiangah, “Kuanto in; bang hang hiam cih leh na khut sungah Filistia-te kong pia taktak ding hi,” a ci hi.

²⁰ Tua ciangin Baalperazim-ah David hong pai-in David in tua lai-ah amaute a zo hi. Tua ciangin amah in, “Tuikhang in a phulkhap bangin Topa in ka mai-ah ka galte phukham hi,” a ci hi. Tua ahih ciangin tua mun Baalperazim ci-in min kiphuak hi.

²¹ Filistia-te in tua lai-ah a milimte uh nusia uh a, David le a mite in tuate a puakhia uh hi.

²² Tua ciangin Filistia-te hong kuantokik lai-in Refaim kuamsung dim khin uh hi.

²³ David in Topa thu a dot ciangin amah in, “Na kuanto kei ding hi; amaute’ nung lamah kual pai inla, lungli kungte gal panin amaute hih in.

²⁴ Lungli kungte’ dawnah lampaina kheging na zak ciangin na tha saan in; bang hang hiam cih leh Filistia galkapte a vatgawp dingin na mai-ah Topa pai hi,” a ci hi.

²⁵ Tua ciangin Topa in amah a thupiak bangin David in hih a, Geba panin Gezer ciang dong Filistia-te a vatgawp hi.