2 SAMUEL NIHNA 4 - Tedim Bible

Ishbosheth A Kisuamlupna

¹ Saul’ tapa Ishbosheth in Hebron-ah Abner a sihna thu a zak ciangin a tha kiam a, Israel-te khempeuh lungkia hi.

² Saul’ tapa in galsim pawlte a makai mi nih nei hi. Khat pa’ min Baanah hi-in, adang khat pa’ min Rekhab hi a, Beeroth khua pan Benjamin mi Rimmon’ tapate ahi uh hi. (Bang hang hiam cih leh Beeroth zong Benjamin a’ in kisim hi.

³ Beeroth mite Gittaim-ah tai uh a, tuni dongin tua lai-ah peemta-in om uh hi.)

⁴ Saul’ tapa Jonathan in a khezaw tapa khat nei hi. Jezreel panin Saul le Jonathan’ thu hong tunin amah kum nga pha hi. Amah a cingnu in amah la-in taipih a, tua nu a nawhtaina lamin naupang kia-in a khe zaw hi. Ama min Mefibosheth ahi hi.

⁵ Tu-in Beeroth mi Rimmon’ tapate Rekhab le Baanah ding khia uh a, sun nisat hun pawlin Ishbosheth’ inn-ah a sun tawlngak laitakin hong tung uh hi.

⁶ Inn kongcing nu mangbuh a su khin hi a, a lusuk suakin ihmu hi. Tua ahih ciangin Rekhab le a sanggampa Baanah simlut uh hi.

⁷ Amaute inn sungah a tun uh ciangin a lupna deisung a lupna tungah Ishbosheth lumin a om laitakin amaute in amah satin that uh a, a lu tan uh hi. Amaute in ama lu la-in Arabah lam tawnin zan tawntung pai uh a,

⁸ Ishbosheth’ lutang Hebron-a David’ kiang tunpih uh hi. Amaute in kumpipa kiangah, “Hih lai-ah, thah dingin nang a hong zong, na gal Saul’ tapa Ishbosheth’ lutang om hi. Topa in tuni-in Saul le a suanlekhakte tungah kote’ to kumpipa a dingin hong thuksak hi,” a ci uh hi.

⁹ Ahih hangin David in Beeroth mi Rimmon’ tapate Rekhab le a sanggampa Baanah dawngin, “Haksatna khempeuh panin ka nuntakna hong honkhia Topa a nungta ahih mah bangin,

¹⁰ mi khat in kei kiangah, ‘En in, Saul si hi,’ ci-in hong gen ciangin, amah thuhoih puakin kingaihsun a, ama thu puak thaman ka piakna-in amah manin Ziklag-ah ka that hi.

¹¹ Migilote in a thuman mi khat ama innsung a lupna tungah a thah ciangin note’ tungah ama phu hong la-in, leitung panin note hong susiazaw kan ding hi lo ahi hiam?” a ci hi.

¹² Tua ciangin David in a tangvalte thu pia a, tangvalte in amaute thatin a khut le a khete sattan uh a, Hebron-a bual gei-ah amaute khai uh hi. Ahih hangin amaute in Ishbosheth’ lutang la-in Hebron-a Abner’ hanah a vui uh hi.