2 SAMUEL NIHNA 22 - Tedim Bible

Hotkhiatna Hangin David’ La

¹ Tua ciangin Topa in ama galte khempeuh’ khutsung, le Saul’ khutsung panin amah a hotkhiat hunin David in hih la kammalte Topa’ tungah a gen hi.

² Amah in, “Topa, kei hong hupa, ka kulhpi, kei hong honkhia pa,

³ ka Pasian, ka kihutna, ka bukna pa, lum bangin kei a hong dal, ka munmuanhuai le ka belh, keimah hong honkhia pa hi a, ngong hihna panin hong hon hi.

⁴ A phat taak Topa ka sam a, ka galte kiang panin kei hong kihon hi.

⁵ “Bang hang hiam cih leh sihna tuihualte in kei hong tum a, siatna tuikhangte in kei hong nawk hi.

⁶ Leinuai khaute in kei hong kancip a, sihna thangte in kei hong dawntuah hi.

⁷ Ka lungkhamna-ah Topa ka sam a, ka Pasian ka sam hi. A biakinn panin amah in ka aw hong za a, ka kikona awging ama bil a tung hi.

⁸ “Tua ciangin ama hehna hangin leitung kisingin, nakpitakin kilokgawp a, vantung bulpite kilinggawp hi.

⁹ A nakvang sung panin meikhu pusuak a, a kamsung panin a kangtum mei pusuak a, ama tung panin mei-am san kuangkhia hi.

¹⁰ Amah in vantungte niamsakin hong paisuk a, ama khenuai-ah khuamial sahpi om hi.

¹¹ Kherub khat tungah amah tuangin hong leng a, huih khate tungah amah kimu hi.

¹² Amah in ama kimkotah khuamial bawl a, a tung kikhuh nadingin meii sahpi a zang hi.

¹³ Ama mai-a a taang sung panin mei-amte kuangkhia hi.

¹⁴ “Vantung panin Topa hong awngsuk a, Sang Pen pa in a aw hong gingsak hi.

¹⁵ Amah in thaltangte lawnin thehthang gawp a, khuaphialep phiasakin amaute a taisak hi.

¹⁶ Tua ciangin Topa’ mawhsakna awging lianpi hangin tuipi tawte kidawk a, lei bulpite a guakin om hi.

¹⁷ “Amah in a sangna mun panin hong banin kei hong la a, tui thukpi panin kei hong kaikhia hi.

¹⁸ A hat ka galte panin kei hong honkhia a, kei hong mudahte panin hong suaktasak hi. Keima a dingin ka galte hatlua uh hi.

¹⁹ Ka kamsiat ni-in kei hong simgawp uh a, ahih hangin Topa in kei hong huh hi.

²⁰ Amah in mun tanzau khatah kei hong paikhiatpih a, kei tungah lungkim ahih manin kei hong honkhia hi.

²¹ “Ka thumanna tawh kizui-in Topa in thaman hong pia a, ka sianthona tawh kizui-in hong dinkik hi.

²² Bang hang hiam cih leh Topa’ thu ka zui a, ka Pasian ka langpang kei hi.

²³ Ama biakna ngeina kipte hoihtakin ka zui a, ama thukhamte panin kei ka pial kei hi.

²⁴ Ama mai-ah kawk ka baang kei a, kisuanna dangte panin hoihtakin ka kikem hi.

²⁵ Tua ahih ciangin Topa in ka thumanna, ama muhna-ah ka sianthona tawh kizui-in kei hong dinkik khin hi.

²⁶ “Thuman mi tungah nangmah na thuman a, a kawkbaang lo mi tungah a kawkbaang loin na gamta hi.

²⁷ A siangtho mi tungah a siangtho-in na gamta a, a thukawi mi tungah thupeelin na gamta hi.

²⁸ Nangmah in mi niamte na honkhia a, ahih hangin a kiphasakte na niamkhiat hi.

²⁹ Topa aw, nang pen keima meivak na hi hi. Ka Pasian in ka khuamial vaksak hi.

³⁰ Nangma hangin galkap hon khat ka sugawpzo a, ka Pasian’ hangin khuakulh khat ka kanzo hi.

³¹ “Hih Pasian a thu kicing a, Topa’ kamciamna a manna kilang hi. Amah a beelte khempeuh a dingin kidalna lum ahi hi.

³² Topa longal Pasian kua hiam? I Pasian simloh, hong hu kua hiam?

³³ Hih Pasian, a muanhuai keima belh hi a, ka lampi khempeuh lungmuanhuaisak hi.

³⁴ Amah in sakhipite’ khe bangin ka khe kipsak a, mun sangna-ah keimah hong koih hi.

³⁵ Amah in galsimzia kei hong hilh a, sumngo thal khauhpente ka keekzo hi.

³⁶ “Nangmah in kei hong dalin na hong honkhia a, nangma hong huhna in kei hong liansak hi.

³⁷ Ka kalsuan nading mun tanzau keima nuai-ah nong pia a, ka khe taal lo hi.

³⁸ Ka galte delhin ka susia a, amaute a beitum mateng kei ka kileh kei hi.

³⁹ Amaute ka beisak a, amaute ka sunlet hi; amaute thokik nawn lo uh a, ka khenuai-ah amaute puk uh hi.

⁴⁰ “Bang hang hiam cih leh nangmah in galdo nadingin tha nong guan a, keimah hong dote ka nuai-ah na nengniam hi.

⁴¹ Nangmah in ka galte, kei hong mudahte, na nungkiksak a, keimah in amaute ka susiagawp hi.

⁴² Amaute khuadak uh a, ahih hangin a honkhia ding kuamah om lo hi. Topa’ tungah hong ko uh a, ahih hangin amah in amaute dawng lo hi.

⁴³ “Leivui bangin amaute ka satvui a, kongzing buante bangin amaute tuankhamin ka sikcipsuk hi.

⁴⁴ Mite tawh kidona panin nangmah in nong honkhia a, minamte’ lutangin kei nong bawl a, ka theih ngei loh mite in keima na hong sem uh hi.

⁴⁵ Keimah mai-etin gamdang mite ka kiangah hong pai uh hi. Amaute in ka thu a zak phetun, ka thu hong mang uh hi.

⁴⁶ Gamdang mite lungkia uh a, a phualkip panun lingin hong paikhia uh hi.

⁴⁷ “Topa hing hi; kei hong hupa in thupha ngah hen la, ka Pasian, kei hong honkhia pa,

⁴⁸ hong thuksakin, keima nuai-ah mite a koihsuk Pasian,

⁴⁹ ka galte kiang panin kei hong paikhiatpih pa vanglian tahen. Nangmah in ka langte tungah kei nong liansak a, mi ngongtatte kiang panin kei nong honkhia hi.

⁵⁰ “Topa aw, hih thu hangin minam khempeuh lakah nang kong phat ding a, na min phatna la ka sa ding hi.

⁵¹ Zawhna lianpi ama kumpipa tungah pia a, a sathau nilh pa David le a suanlekhakte tungah a tawntungin itna kip a lak hi,” a ci hi.