2 SAMUEL NIHNA 14 - Tedim Bible

Absalom’ Ciahkik Ding Joab’ Geelna

¹ Tu-in kumpipa in Absalom a ngaihna thu Zeruiah’ tapa Joab in a phawk hi.

² Tua ahih ciangin Joab in Tekoa-ah mi sawlin tua panin numei pil khat la-in ama kiangah, “Dahin a kap kineih inla, dahna lim puante silh in. Sathau nilh kei inla, misi hangin ni tampi a thum khin numei bangin gamta in.

³ Tua ciangin kumpipa kiangah pai inla, hih bangin ama kiangah thu gen in,” a ci hi. Tua ahih ciangin Joab in ama gen ding thute a hilh hi.

⁴ Kumpipa kiangah Tekoa numei a pai ciangin lei-ah maipukin zahtakna bawl a, “Hong huh in! Aw kumpipa,” a ci hi.

⁵ Tua ciangin kumpipa in ama kiangah, “Na lungkhamna bang om ahi hiam?” a ci hi. Amah in dawngin, “Kalai, ka pasal si ta a, meigong numei khat ka hi hi.

⁶ Na nasemnu in tapa nih nei a, lo sungah amau tegel kitawng uh hi. Amau tegel a khen ding kuamah om lo a, khat in a khat pa satin that hi.

⁷ Tu-in ka beh buppi na nasemnu’ langah hong pangin amaute in, ‘Ama thah a sanggampa’ nuntakna tangin amah ka thah theih nadingun a sanggampa a sat mipa hong pia in,’ hong ci uh hi. Tua bangin amaute in innluah pa zong susia ding uh hi. Tua bangin amaute in a omlai ka lametna pa beisakin leitungah ka pasal’ suanlekhak a suakta omsak lo ding uh hi,” a ci hi.

⁸ Tua ciangin kumpipa in tua numei kiangah, “Na inn-ah ciah in; nang tawh kisai-in thu ka pia ding hi,” a ci hi.

⁹ Tua ciangin Tekoa numei in kumpipa kiangah, “Ka to kumpipa aw, keima tung le ka innkuan tungah mawhna om ta hen; kumpipa le a tokhom mawhpeng ta hen,” a ci hi.

¹⁰ Kumpipa in, “Nang’ tungah mi khatpeuh in thu khatpeuh hong gen leh kei kiangah amah hong paipih in; amah in nang hong sukik ngei nawn lo ding hi,” a ci hi.

¹¹ Tua ciangin amah in, “Phulapa in that nawn loin, ka tapa a kisuksiat loh nadingin kumpipa in Topa na Pasian’ tungah na kiciam ding kong thum hi,” a ci hi. Amah in, “Topa a nungta ahih mah bangin na tapa’ samzang khat zong lei-ah kialo ding hi,” ci-in a kiciam hi.

¹² Tua ciangin a numei in, “Ka to kumpipa tungah na nasemnu kam khat hong gensak in, ci-in kong thum hi,” a ci hi. Amah in, “Gen in,” a ci hi.

¹³ Tua ciangin a numei in, “Tua ahihleh bang hangin Pasian’ mite’ langah tua bang na hih sawm na hi hiam? Bang hang hiam cih leh hih bang lungsim khentatna na piakna-ah kumpipa in a hawlkhiatna a inn-ah a paipih kik mateng kumpipa amahmah mawh a kipia ahi hi.

¹⁴ Eite khempeuh i si ding a, a kikhawm kik thei lo leilakah a bua tui tawh i kibang hi. Ahih hangin a hawlkhiat pa a kipuasehin a kikoih loh nadingin lampi a zong mipa’ nuntakna Pasian in lakhia lo ding hi.

¹⁵ Mite in kei hong lausak ahih manin tu-in ka to kumpipa kiangah hih thu a gen dingin kong pai hi. Na nasemnu in, ‘Kumpipa kiangah thu ka gen ding a, kumpipa in a nasemnu’ ngetna sem kha ding hi.

¹⁶ Bang hang hiam cih leh kumpipa in za-in, Pasian’ gamh panin kei le ka tapa hong susia khawm ding mipa’ khut panin a nasemnu honkhia ding hi,’ ci-in ngaihsun hi.

¹⁷ Na nasemnu in, ‘Ka to kumpipa’ kammal in nopsakna hong pia ding hi,’ ci-in ngaihsun hi; bang hang hiam cih leh ka to kumpipa pen a pha le a sia a khenthei dingin Pasian’ vantungmi tawh kibang hi. Topa na Pasian in nang hong ompih ta hen!” a ci hi.

¹⁸ Tua ciangin kumpipa in a numei dawngin, “Nang kong dot peuhpeuh hong im kei in,” a ci hi. A numei in, “Ka to kumpipa in gen hen,” a ci hi.

¹⁹ Kumpipa in, “Hih thu khempeuh Joab’ vaihawmna tawh hong pai na hi hiam?” a ci hi. A numei in dawngin, “Nang a nungta taktak na hih mah bangin ka to kumpipa aw, ka to kumpipa’ gen bang teekteek mah ahi hi. Kei hong sawl pa pen na nasempa Joab hi a, na nasemnu’ gen dingin hih thute a hong sawl pa amah ahi hi.

²⁰ Na thu paizia khek nadingin na nasempa Joab in hih thu hih hi. Ahih hangin ka topa in leitung a om na khempeuh theih nadingin Pasian’ vantungmi pilna tawh a kibang pilna na nei hi,” a ci hi.

²¹ Tua ciangin kumpipa in Joab kiangah, “Tu-in en in, hih thu kong pia hi; pai in, tangvalpa Absalom hong ciahpih kik in,” a ci hi.

²² Tua ciangin Joab lei-ah maipuksuk a, zahtakna bawlin kumpipa thupha a pia hi. Tua ciangin Joab in, “Kumpipa in a nasempa’ ngetna a piakna-ah, tuni-in ka to kumpipa nangma muhna-ah maipha ka muhna na nasempa in ka thei hi,” a ci hi.

²³ Tua ahih ciangin Joab dingin Geshur-ah pai a, Jerusalem-ah Absalom a ciahpih hi.

²⁴ Tua ciangin kumpipa in, “Ama inn-ah amah tuam tensak in; keima omna-ah amah hong pai lo ding hi,” a ci hi. Tua ahih ciangin Absalom ama inn-ah tuam tenin kumpipa omna-ah pai lo hi.

²⁵ Tu-in Israel-te khempeuh sungah a melhoihna hangin Absalom zahin tua bangin phat ding kuamah om lo hi. A khenuai a kipan a luzang dongin ama tungah paubaanna om lo hi.

²⁶ Amah in a sam a met ciangin (kum bei simin amah in met zel hi; a sam a gih ciangin amah in met hi), amah in a sam tawi khai a, kumpipa’ gik tehna-in shekel zanih a gik hi.

²⁷ Absalom’ sung pan tapa thum, le a min Tamar ahi ta numei khat a suak hi; tua nu pen a melhoih mahmah khat ahi hi.

²⁸ Tua hi a, kumpipa’ omna-ah pai loin Absalom kum nih bit Jerusalem-ah teng hi.

²⁹ Tua ciangin kumpipa kiangah a sawl dingin Absalom in Joab samsak hi. Ahih hangin ama kiangah Joab hong pai lo hi. Amah in a nih veina sawl a, ahih hangin Joab hong pai lo veve hi.

³⁰ Tua ciangin amah in a nasemte kiangah, “En un, Joab’ lo pen keima-a’ zom hi a, tua lai-ah amah in mangbuhham nei hi; pai unla mei tawh va hal un,” a ci hi. Tua ahih ciangin Absalom’ nasemte in a lo mei tawh a hal uh hi.

³¹ Tua ciangin Joab dingin Absalom’ kiang ama inn-ah pai-in ama kiangah, “Bang hangin na nasemte in mei tawh ka lo hong halsak ahi uh hiam?” a ci hi.

³² Absalom in Joab dawngin, “En in, nang kiangah thu kong puak a, ‘Kumpipa kiangah nang hong sawlin, “Bang hangin Geshur panin hong pai ka hi hiam? Tua lai-ah omlai leng kei a dingin hoihzaw ding hi,” ci-in a va dong dingin hih lai-ah nong pai nading kong gen hi. Tua ahih ciangin tu-in kumpipa omna-ah kei hong paisak in; kei tungah mawhna a om leh amah hong thatsak in,’ ka ci hi,” a ci hi.

³³ Tua ciangin kumpipa kiangah Joab pai-in ama kiangah tua thu a gen hi. Tua ciangin kumpipa in Absalom sam hi. Tua ahih ciangin amah kumpipa kiangah hong pai a, a mai lei ngatin kumpipa’ mai-ah a kun hi; tua ciangin kumpipa in Absalom a nam hi.