2 KUMPI NIHNATE 2 - Tedim Bible

Vantungah Elijah Kilato

¹ Topa in pingpei-in vantungah Elijah a lak ding lai-in Elijah le Elisha-te Gilgal panin inn zuanin lamkal a om ahi uh hi.

² Elijah in Elisha kiangah, “Hih lai-ah khawl in, kong thum hi; bang hang hiam cih leh Topa in Bethel ciang dong kei hong sawl hi,” a ci hi. Ahih hangin Elisha in, “Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin amaute Bethel dongah paisuak uh hi.

³ Tua ciangin Bethel-ah a om kamsang honkhat Elisha kiangah hong pai-in ama kiangah, “Topa in tuni-in nangma kiang panin na topa a lakkhiat ding na thei hiam?” a ci uh hi. Tua ciangin amah in, “Hi hi, ka thei hi; bangmah gen nawn kei un,” a ci hi.

⁴ Tua ciangin Elijah in Elisha kiangah, “Elisha aw, hih lai-ah khawl in, kong thum hi; bang hang hiam cih leh Topa in Jerikho-ah kei hong sawl hi,” a ci hi. Ahih hangin amah in, “Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin Jerikho-ah amaute tung uh hi.

⁵ Jerikho-ah a om kamsang honkhat in Elisha hong naihin ama kiangah, “Topa in tuni-in nangma kiang panin na topa a lakkhiat ding na thei hiam?” a ci uh hi. Tua ciangin amah in dawngin, “Hi hi, ka thei hi; bangmah gen nawn kei un,” a ci hi.

⁶ Tua ciangin Elijah in ama kiangah, “Hih lai-ah khawl in, kong thum hi; bang hang hiam cih leh Topa in Jordan-ah kei hong sawl hi,” a ci hi. Ahih hangin amah in, “Topa nungta a, nangmahmah na nuntak mah bangin, nang kong nusia ngei kei ding hi,” a ci hi. Tua ahih ciangin amaute a nihun pai lai uh hi.

⁷ Kamsang mihing sawmnga in zong zui uh a, amau tegel Jordan gei-ah a din laitakun a kiang panun a gamla simah kamsangte a ding uh hi.

⁸ Tua ciangin Elijah in a puantualpi suahin zial a, tua tawh a tui sat hi. Lei keu tungah amau tegel a pai theih matengun a pang khat le a pang langkhatah a tui kikhen hi.

⁹ Amaute a galkah khit uh ciangin Elijah in Elisha kiangah, “Nang kiang panin kei hong kilak khiat ma-in nang a dingin kong hihsak ding na deih hong gen in,” a ci hi. Tua ciangin Elisha in, “Kong thum hi, kha thu-ah na vangliatna a zah nih hong luahsak in,” a ci hi.

¹⁰ Tua ciangin amah in, “A haksa na khat nong ngen hi. Ahi zongin nangma kiang panin kei hong kilak laitakin kei nong muh leh nang a dingin tua thu hong piang ding hi. Ahih hangin kei nong muh kei leh tua bangin hong piang lo ding hi,” a ci hi.

¹¹ Tua ciangin amaute a pai kawmkawm a kiho laitakun, mei leeng khat le mei sakolte in amaute nih a khen hi. Tua ciangin vantungah Elijah pingpei-in paito hi.

¹² Tua ciangin Elisha in tua mu-in amah kiko a, “Ka pa, ka pa! Israel mite a hupipa! Nang pai ta maw!” a ci hi. Tua ciangin amah in Elijah mu nawn lo hi. Tua ciangin Elisha in a dah manin a puan balkekin phel nih a suak hi.

Elisha in Elijah Laih

¹³ Tua ciangin amah in Elijah tung panin a kiakhia puan tawm a, kilehin Jordan gun pangah a ding hi.

¹⁴ Tua ciangin amah in ama tung panin a kiakhia Elijah’ puan la-in tui sat a, “Elijah’ Pasian, Topa koi-ah om na hi hiam?” a ci hi. Amah in tui a sat khit ciangin a pang khat le a pang langkhatah a tui kikhen hi. Tua ciangin Elisha pai-in a galkah hi.

¹⁵ Tu-in Jerikho-ah a om kamsangte in amah a muh uh ciangin amaute in, “Elijah’ vangliatna Elisha’ tungah om hi,” a ci uh hi. Tua ciangin amah a dawn dingin amaute hong pai uh a, ama mai leilakah amaute a kun uh hi.

¹⁶ Tua ciangin amaute in ama kiangah, “Tu-in en in, a thahat na nasem mihing sawmnga ka om uh hi; kong thum uh hi, kote hong paisak inla na topa hong zongsak in. Topa’ kha in amah manin mualtung ahih kei leh guam sungah amah khia hi kha ding hi,” a ci uh hi. Tua ciangin amah in, “Na zong kei ding uh hi,” a ci hi.

¹⁷ Ahih hangin amaute in amah a maizum dongin a cih teitei uh ciangin amah in, “Pai un,” a ci hi. Tua ahih ciangin amaute mihing sawmnga a pai uh hi. Amaute in ni thum sung amah zong uh a, ahih hangin amah mu zo lo uh hi.

¹⁸ Tua ciangin amah Jerikho-ah a khawl sungin ama kiangah amaute hong paikik uh a, amah in amaute kiangah, “Note kiangah, ‘Pai kei un,’ hong ci hi lo ka hi hiam?” a ci hi.

¹⁹ Tu-in khuapi mite in Elisha kiangah, “En in, topa in na muh bangin, hih khuapi omzia nuam hi. Ahih hangin a tui sia a, hih gamah kipung thei lo hi,” a ci uh hi.

²⁰ Amah in, “Hai thak khat hong paipih unla, a sungah ci koih un,” a ci hi. Tua ahih ciangin amaute in ama kiangah paipih uh hi.

²¹ Tua ciangin tuinakah amah pai-in a sungah ci lawnin, “Topa in hih bangin ci hi: Hih tui a hoihin ka bawl khin hi. Tu-a kipanin sihna ahi a, tatolhna ahi zongin piangsak nawn lo ding hi,” a ci hi.

²² Tua ahih ciangin Elisha’ kampauna tawh kizui-in tuni dongin a tui hoih hi.

²³ Amah tua lai panin Bethel-ah paito hi. Lampi-ah a paitoh laitakin khuapi panin naupangneu pawlkhat hong paikhia-in amah zahko uh a, “Paito in, nang lukolh pa” a ci uh hi.

²⁴ Tua ciangin amah a kiimah khuadak a, amah in amaute a muh ciangin Topa’ min tawh amaute a samsia hi. Tua ciangin gamlak panin vompi nih hong pai-in naupang sawm le nih balnen hi.

²⁵ Tua lai panin amah Karmel Mual-ah paisuak a, tua ciangin Samaria-ah a ciahkik hi.