2 KUMPI NIHNATE 19 - Tedim Bible

Sennakherib kiang panin Judah Kisuaktasak

¹ Kumpi Hezekiah in hih thu a zak ciangin a dahna hangin a puante balkekin puanhampi silh a, Topa’ biakinn sungah a pai hi.

² Tua ciangin amah in biakinn sung a ukpa Eliakim, lai-at pa Shebnah, le siampi khangham zawdeuhte puanhampi silhsakin Amoz’ tapa kamsang Isaiah kiangah a sawl hi.

³ Amaute in ama kiangah, “Hezekiah in hih bangin ci hi: ‘Tuni pen lungkham ni, hong kitai ni, mindai ni ahi hi. Naungekte a suah hun tung a, amaute hinkhiatna ding thatang om lo hi.

⁴ Ama topa ahi Assiria kumpipa in a nungta Pasian a zahko dingin a sawl a ulianpa’ kammalte khempeuh Topa na Pasian in za-in, Topa na Pasian in a zaksa thute nialkhin kha ding hi. Tua ahih ciangin a omlai mite a dingin thu ngen in,’ ci hi,” a ci uh hi.

⁵ Kumpi Hezekiah’ nasemte Isaiah kiang hong tun uh ciangin

⁶ “Isaiah in amaute kiangah, “Na topa uh kiangah hih bangin gen un. Topa in hih bangin ci hi: “Assiria kumpipa’ nasemte in kei hong simmawhna, na zaksa uh thute hangin lau kei un.

⁷ En un, keimah in ama tungah thu khat ka piangsak ding a, amah in kamdawn khat za-in a gamah ciahkik ding hi. Ama gam mahah namsau tawh amah a tukna ding ka piangsak ding hi,” ci hi,’ ci un,” a ci hi.

⁸ Assiria kumpipa in Lakhish nusia khinin Libnah khua tawh a kidona thu, a ulianpa in za ahih manin, kumpipa kiangah thu a dong dingin a pai hi.

⁹ Ethiopia kumpi Tirhakah amah a sim dingin a hong kuankhiat khitna thu kumpipa in a zak ciangin, amah in Hezekiah kiangah kamtaite sawl kikin,

¹⁰ “Judah kumpi Hezekiah kiangah hih bangin gen un: ‘Assiria kumpipa’ khut sungah Jerusalem kipia lo ding hi, ci-a a hong ciamna tawh na suan na Pasian’ khemsa-in om kei in.

¹¹ En in, Assiria kumpite in gam khempeuh a hihnasa, a suksiat mangna thu na za khin hi. Tua ahih ciangin nang hong honkhiazo ding ahi hiam?

¹² Ka pu ka pate in a suksiat minam Gozan, Haran, Rezef, le Telassar gam sunga Eden mite, tua minamte’ pasian-te in amaute honkhiazo ahi hiam?

¹³ Hamath kumpipa, Arpad kumpipa, Sefarvaim khuapi kumpipa, Hena kumpipa, ahih kei leh Ivvah kumpipa koi-ah om ahi uh hiam, ci hi,’ ci un,” a ci hi.

¹⁴ Hezekiah in kamtaite tung panin a lai sangin a sim hi. Tua ciangin Topa’ biakinn-ah Hezekiah paito a, Topa’ mai-ah a lai a zal hi.

¹⁵ Tua ciangin Hezekiah in Topa’ mai-ah thu ngenin, “Topa, Israel Pasian, kherub tungah a tupa aw, leitung kumpi gam khempeuh lakah nangmah, nangmah bek Pasian na hi a, nangmah in vantung le leitung na bawl hi.

¹⁶ Topa aw, na bil hong ngat inla hong za in. Topa aw, na mitte hak inla hong mu in. Tua ciangin a nungta Pasian a zahko nadingin a hong khak Sennakherib’ thute za in.

¹⁷ A taktakin, Topa aw, Assiria kumpite in minam dangte le a gam uh siasak uh a,

¹⁸ a pasian-te uh meikhuk sungah lotsak uh hi. Bang hang hiam cih leh tuate pasian hi loin, mihingte’ khut tawh a kibawl sing le suang ahi hi. Tua ahih manin tuate kisusia hi.

¹⁹ Tua ahih ciangin tu-in, Topa kote’ Pasian aw, leitung kumpi gam khempeuh in nang, nang bek Pasian na hihna a theih nadingun ama khutsung panin kote hong honkhia in, kong thum hi, Topa aw,” a ci hi.

²⁰ Tua ciangin Amoz’ tapa Isaiah in Hezekiah kiangah thu puak a, “Israel Pasian, Topa in hih bangin ci hi: ‘Assiria kumpipa Sennakherib tawh kisai kei tungah nong thungetna ka zazo hi,’ ci hi.

²¹ Amah tawh kisai-in Topa’ gensa thu hih bang ahi hi: Zion khuapi in nang hong simmawh a, nang hong nuihsan hi. Jerusalem khuapi in na nungah a lu hong peisan hi.

²² Kua zahko-in, a simmawh na hi hiam? Kua langpangin na aw sang sakin kihihsakna tawh gamta na hi hiam? Israel-te’ a Siangtho pa, a simmawh na hi hi.

²³ Na kamtaite tawh Topa na zahko a, nangmah in, ‘Ka leeng tampite tawh mual sangpen munah ka pai khin a, Lebanon gam tawng pek dong ka tung khin hi. A taamtak sangpente ka phukmang khin a, a taaksan hoihpente zong ka phukmang khin hi. A gam tawngnung pen dongah keimah ka lut a, a tulak thukpen dongah zong ka lut khin hi.

²⁴ Tuikhukte ka to a, gamdang tuite ka dawn hi. Ka khenuai tawh Egypt lui khempeuh ka keusak hi,’ na ci hi.

²⁵ Sawt pek lai-in ka ngaihsutsa ahihlam za nai lo na hi hiam? Tanglai pek panin ka geelkholhsa hi a, tu-a ka tunsak ding thute kulh a nei khuapite ninbulomtangin na heina ding,

²⁶ a sunga tengte a hatna teng kilakhia-in, lungkia-in cih nading thei loin, gamlak singnote le lo ngeekte bangin, innkhumzanga lopate bangin a om laitak, a khankhit ma-in a sih ding ka geelsa ahi hi.

²⁷ Ahih hangin keimah in na tutsukna le na pusuahna le na sungtumna, kei tungah na hehna ka thei khin hi.

²⁸ Kei tungah na hehna hang le na kiphatsakna ka bilah hong tunkhitna hangin na nakah nakpheh hong bulhin, na kamah kamkaih kong bulh ding a, nong kuankhiatna lam mahah kong lehhei kik ding hi,” a ci hi.

²⁹ Tua ciangin Isaiah in Hezekiah kiangah, “Nang a dingin lim hih bang hong hi ding hi: Tu kumin ama thu-in a pote na ne ding a, a kum nihna ciangin tua bangmahin a selkhiate na ne ding hi. A kum thumna ciangin khai tuhin atin, leenggui suanin a gah na ne ding hi.

³⁰ Tua ciangin Judah gam sungah a suakta a omlaite in singkung bangin a thuk lamah zung kha kikin a tung lamah gah hong gahto ding hi;

³¹ bang hang hiam cih leh a omlaite Jerusalem panin hong paikhia ding a, a suakta khat Zion Mual panin hong paikhia ding hi. Topa’ deih luatna in hih thu hong tungsak ding hi.

³² “Tua ahih ciangin Topa in Assiria kumpipa tawh kisai-in hih bangin gen hi: ‘Hih khuapi sungah amah hong pai lo ding a, thaltang khat zong lawn lo ding hi. Khuapi mai-ah lum tawh zong hong pai loin, khuapi simna-in phung zong ciang lo ding hi.

³³ Amah hong paina lampi mah tawnin amah kilehkik ding a, hih khuapi sungah amah hong pai lo ding hi, Topa in ci hi.

³⁴ Bang hang hiam cih leh keima min ka khualna le ka nasempa David tungah ka ciamsa thu hangin hih khuapi ka hu ding hi,’ ci hi,” a ci hi.

³⁵ Tua zanin Topa’ vantungmi paikhia a, Assiria-te giahphual ah galkap tul zakhat le tul sawmgiat le tulnga a that hi. Zingsang tungin mite a thawh ciangin, hihte khempeuh si luanghawm na hi hi.

³⁶ Tua ciangin Assiria kumpipa Sennakherib kihemkhia a, inn-ah ciahin Nineveh-ah a teng hi.

³⁷ Tua ciangin amah in ama pasian Nisrok’ biakinn sungah bia-in a om laitakin, ama tapate Adrammelek le Sharezer in namsau tawh amah thatin Ararat gamah a tai uh hi. Tua ciangin ama tangin a tapa Esarhaddon in a uk hi.