2 KHANG TANGTHU NIHNATE 33 - Tedim Bible

Judah Kumpi Manasseh’ Ukna

¹ Manasseh in uk ding a kipatin kum sawm le nih pha a, amah in Jerusalem-ah kum sawmnga le nga sung uk hi.

² Topa in Israel minamte’ mai-ah a hawlkhiat minamte’ zat a kihhuai gamtatnate mah bangin, Topa’ muhna-ah amah a sia gamta hi.

³ Bang hang hiam cih leh a pa Hezekiah in a suksiatsa mual dawna biakpiaknate amah in lamkikin, Baal-te a dingin biakna taute phut a, Asherah milimte bawlin vantung nate khempeuh bia a, tuate’ na sem hi.

⁴ Topa in, “Jerusalem-ah ka min om tawntung ding hi,” a cihna Topa’ biakinn sungah amah in biakna taute a lam hi.

⁵ Tua ciangin amah in Topa’ biakinn tual nihte sungah vantung nate khempeuh a dingin biakna taute lam hi.

⁶ Tua ciangin amah in Hinnom’ tapa’ kuamah biakna-in a tapate hal a, aisanna le mailam thugenkholhna le khongkhaina zang a, vankah theite le aisante tawh na semkhawm hi. Amah in Topa’ muhna-ah siatna tampi bawl a, amah hehsak hi.

^7-8 Tua ciangin Pasian in David le a tapa Solomon tungah, “Amaute ka thupiak khempeuh, thukham khempeuh, ngeinate, le Moses tungtawnin a kipia biakna ngeina kipte zuih ding a kidop nak-uhleh, Israel minam khempeuh sung panin ka teelkhiat hih biakinn sung le Jerusalem sungah ka min ka koih tawntung ding hi. Tua ciangin na pu na pate uh a dingin ka sehsa gam panin Israel-te ka khinkhia nawn kei ding hi,” a cih Pasian’ biakinn sungah amah in ama bawlsa milim koih hi.

⁹ Manasseh in Judah le Jerusalem-a tengte zol ahih manin, Israel mite’ mai-ah Topa in a suksiat minamte sangin amaute a sia tamzaw gamta uh hi.

¹⁰ Topa in Manasseh tung le ama mite tungah thu gen a, ahih hangin amaute in don lo uh hi.

¹¹ Tua ahih ciangin Topa in Assiria kumpipa’ galkap ukte amau’ kiangah paipih a, amaute in sikkawite tawh Manasseh manin sumngo khau tawh khihin Babylon-ah a paipih uh hi.

¹² Amah a lungkham ciangin Topa a Pasian kunh-in a pu a pate’ Pasian’ mai-ah nakpitakin amahmah kiniamkhiat hi.

¹³ Amah in ama kiangah thu ngen a, tua ciangin Pasian in ama kutna saangin, a thumna a ngai hi. Amah in Jerusalem-ah amah paipih kikin a kumpi gam a piakik hi. Tua ciangin Topa pen Pasian ahihna Manasseh in a thei hi.

¹⁴ Tua khit ciangin amah in kuam sung, Gihon nitumna lam, David khuapi-ah, Ngasa Kongpi lutna lamah kulh puanung khat ciang a, Ofel kiimah ciang suakin a sang mahmahin ciangto hi. Amah in Judah gam sunga kulhnei khuapi khempeuhah zong galkap a ukte koih hi.

¹⁵ Tua ciangin amah in Topa’ biakinn panin gamdang pasian-te le a milim lakhia a, Topa’ biakinn mualtung le Jerusalem-a ama lamsa biakna tau khempeuh lakhia-in, khuapi pualamah tuate paai hi.

¹⁶ Amah in Topa’ biakna tau zong koihkikin tua tungah thunuama biakna le lungdamkohna a pia hi. Tua ciangin amah in Israel Pasian, Topa’ na a sep nadingun Judah-te thu a pia hi.

¹⁷ Ahi zongin mite in mual dawna biakpiaknate ah biakna pia lai uh a, ahih hangin Topa amaute’ Pasian’ tung bek mahah a piak uh ahi hi.

¹⁸ Tu-in Manasseh’ gamtatna a omlaite, le a Pasian’ tungah a thungetna, le Israel Pasian, Topa’ min tawh ama tungah thu a gen thumute’ thugente, Israel Kumpite’ Khang Tangthu sungah om hi.

¹⁹ Tua ciangin ama thungetna, le ama kutna Pasian in a sanna, le ama khialhna le a cihtak lohna khempeuh, le amah a kiniamkhiat ma-in mual dawna biakpiaknate bawlin Asherah-te le milim dangte a koihna munte thu, Thumute’ Khang Tangthu sungah kigelh hi.

²⁰ Tua ciangin Manasseh si a, amaute in a inn sungah vui uh hi. Tua ciangin a tapa Amon in ama tangin a uk hi.

Judah Kumpi Amon’ Ukna

²¹ Amon in uk ding a kipatin kum sawmnih le nih pha a, amah in Jerusalem-ah kum nih sung uk hi.

²² A pa Manasseh’ gamtatnasa khempeuh bangin Topa’ muhna-ah amah a sia gamta hi. Amon in a pa Manasseh’ bawlsa milim khempeuh tungah biakna pia a, tuate’ na sem hi.

²³ A pa Manasseh a kiniamkhiat bangin Topa’ mai-ah amah kiniamkhiat lo a, hih Amon in mawhna tam piangsak semsem hi.

²⁴ Tua ciangin ama nasemte in amah sawmsimin ama inn sungah amah that uh hi.

²⁵ Ahih hangin tua gam mite in Kumpi Amon a sawmsim khempeuh that leuleu uh hi. Tua ciangin tua gam mite in ama tangin a tapa Josiah kumpi-in a koih uh hi.