2 KHANG TANGTHU NIHNATE 3 - Tedim Bible

Solomon in Topa’ Biakinn Lam Solomon in Topa’ Biakinn Lam

¹ Tua ciangin Solomon in Jerusalem sung Moriah Mual tung, a pa David’ tungah Topa a kilahna mun, David in a sehnasa mun ahi, Jebus mi Ornan’ ancilna phualah Topa’ biakinn lam ding kipan hi.

² Amah in ama uk a kum lina a kha nihna sungin lam ding kipan hi.

³ Pasian’ biakinn lamna ding Solomon’ geelna hih bang ahi hi: A dung pi sawmkua hi a, a vai pi sawmthum ahi hi.

⁴ Inn mai-a innliim pen inn vai tawh kikimin pi sawmthum sau a, a sanna zong pi sawmthum mah ahi hi.

⁵ Amah in taaksan tawh innpi kawm dapin kham hoih tawh zut a, tua tungah nisuh le khainiang a bawl hi.

⁶ Amah in suangmanpha phutin a inn zem hi. A kham zatte Parvaim kham ahi hi.

⁷ Tua ahih ciangin amah in a inn, a innsunte, a sangkilte, a kawmte, le a kongkhakte kham tawh zut a, tua ciangin a kawmte tungah kherub-te a bawl hi.

⁸ Tua ciangin amah in siangtho pen mun bawl hi. A dung pen a vai tawh kizui-in pi sawmthum hi a, a vai zong pi sawmthum mah ahi hi. Amah in kham hoih talen zaguk tawh a zut hi.

⁹ A kilhnate a gihna kham shekel sawmnga ahi hi. Tua ciangin amah in a inn dawl tungnungte kham tawh a zut hi.

¹⁰ Amah in siangtho pen mun sungah sing kherub nih bawlin kham tawh tuate zut hi.

¹¹ Tua kherub tegel’ kha a kizalin pi sawmthum ahi hi. A khat’ kha pen pi sagih le alang hi-in inn kawm ban a, tua ciangin alang khat pi sagih le alang in a kherub dang khat’ kha ban hi.

¹² Tua mah bangin a kherub dang khat’ kha langkhat zong pi sagih le alang hi-in inn kawm langkhat ban a, pi sagih le alang mah a sau a kha langkhat pen a kherub masa’ kha tawh kizom hi.

¹³ Hih kherub-te’ khate in pi sawmthum huam hi. Kherub-te amau’ khe-in dingin innpi sunglam nga uh hi.

¹⁴ Tua ciangin amah in a dum, a ausan, le a dupsan puante, le saihadial puan tawh a dalna puan bawl a, tua tungah kherub-te a bawl hi.

Biakinn Sungah Huram’ Nasep

¹⁵ Amah in inn mai sanah pi sawmnga le pi nih le alang a sang, a dawn tuakah pi sagih le alang a pha khuamluzepna a nei khuampi nih bawl hi.

¹⁶ Amah in ngawng a awhte bangin khainiangte bawlin khuampite dawnah khai hi. Tua ciangin amah in mang kawlsing zakhat bawlin khainiangte tungah koih hi.

¹⁷ Amah in tua khuamte, khat leitaw lam, a khat leilu lam, biakinn mai-ah phut hi. Amah in leitaw lama om pen Jakhin phuakin, leilu lama om pen Boaz a phuak hi.