2 KHANG TANGTHU NIHNATE 27 - Tedim Bible

Judah Kumpi Jotham’ Ukna

¹ Jotham in uk ding a kipatin kum sawmnih le nga pha a, amah in Jerusalem-ah kum sawm le guk sung uk hi. Ama nu’ min Jerushah hi a, Zadok’ tanu ahi hi.

² A pa Uzziah hihsa khempeuh bangin Topa’ mitah a man gamta hi. Ahih hangin a pa bangin Topa’ biakinn sungah amah va mawk lut lo hi. Ahih hangin mite in a sia gamtatnate zui lai uh hi.

³ Jotham in Topa’ biakinn kulhkongpi tungnung lam a, Ofel kulh tungah zong inn tampi a lam hi.

⁴ Tua tham loin amah in Judah mualtung gamah khuapite, le sing tamna mualte tungah munmuanhuaite le tausangte a lam hi.

⁵ Amah in Ammon kumpipa sim a, amaute a zo hi. Tua ciangin Ammon mite in tua kumin ama tungah ngun talen zakhat, mangbuh lawh tul sawm, le mangbuhham lawh tul sawm mah a puak uh hi. Ammon mite in ama tungah a kum nihna le a kum thumna kumin tua zah mah a puak uh hi.

⁶ Tua ahih ciangin Topa a Pasian’ mai-ah Jotham a hoih tatna tawh kizui-in a vang zong a lian hi.

⁷ Tu-in Jotham’ gamtatna a omlaite, le a galsimnate, le a omziate, Israel le Judah Kumpite’ Tangthu Laibu sungah kigelh hi.

⁸ Amah in uk ding a kipatin kum sawmnih le nga pha a, Jerusalem-ah kum sawm le guk sung uk hi.

⁹ Tua ciangin Jotham si a, David khuapi sungah amaute in amah a vui uh hi. Tua ciangin a tapa Ahaz in ama tangin a uk hi.