2 KHANG TANGTHU NIHNATE 25 - Tedim Bible

Judah Kumpi Amaziah’ Ukna

¹ Amaziah in uk ding a kipatin kum sawmnih le nga pha a, amah in Jerusalem-ah kum sawmnih le kua sung uk hi. Ama nu’ min Jehoaddin hi a, Jerusalem khuami ahi hi.

² Topa’ mitah a manin amah gamta a, ahi zongin a lungsim a paubaang lo hizo nai sam lo hi.

³ Ama khut sungah kumpi vangliatna kiptakin a om khit phetin a pa ahi kumpipa a that a nasemte a that hi.

⁴ Ahih hangin Moses laibu sungah, “Tate’ hangin pate kithat lo ding a, pate’ hangin tate kithat lo ding hi,” ci-in Topa in a thupiakna thukham sungah a kigelh mah bangin amah in amau’ tate that lo hi.

⁵ Tua ciangin Amaziah in Judah mite khawm a, a tul-a ukte le a za-a ukte’ khutnuai-ah Judah mite le Benjamin mite a behbeh, a pawlpawlin a koih hi. Amah in kum sawmnih le a tungsiah a pha mite khawm a, galsim dingin a hoih, teipi le lum a zang thei, a kitengkhia mihing tul zathum a pha hi.

⁶ Amah in Israel sung panin ngun talen zakhat tawh a thahat galhang mi tul zakhat zong a cial hi.

⁷ Ahih hangin Pasian’ mi khat ama kiangah hong pai-in, “Kumpipa aw, Israel mi ahi hih Efraim mite khempeuh, Topa in ompih lo ahih manin hih Israel galkapte nang tawh kuankhawm sak kei in.

⁸ Ahih hangin hih bang lama hihna tawh galdona-ah thahat dingin kingaihsun kha na hih leh, Pasian in galte’ mai-ah nang hong paai ding hi; bang hang hiam cih leh Pasian in huhna ding ahi a, paihna ding ahi zongin vangliatna nei hi,” a ci hi.

⁹ Tua ciangin Amaziah in Pasian’ mipa kiangah, “Ahi ta zongin Israel galkapte tungah ka piaksa talen zakhat thu bang cih ding ihi hiam?” a ci hi. Pasian’ mipa in dawngin, “Topa in hih sangin nakpitakin a tamzaw hong pia thei hi,” a ci hi.

¹⁰ Tua ciangin Amaziah in Efraim panin hong pai galkapte, inn-ah a ciahkik dingin a paikhiasak hi. Tua ciangin Judah mite tungah amaute heh mahmah uh a, heh mahmahna tawh inn-ah a ciahkik uh hi.

¹¹ Ahih hangin Amaziah kihanthawnin a mite paikhiatpih a, Ci Kuam-ah pai-in Seir gam mite mihing tul sawm a that hi.

¹² Adang tul sawm hingmat uh a, keen sang dawn khatah amaute paipihin tua keen dawn panin amaute lawnsuk uh a, amaute khempeuh themlen’ hi.

¹³ Ahih hangin Amaziah in gal sungah amah tawh kuansak loin, inn-ah a sawlkik galkapte in Samaria panin Bethhoron dong Judah khuapite na sim uh a, tuate sungah mi tulthum thatin van tampi a la uh hi.

¹⁴ Seir gamah Edom mite a thahna panin Amaziah hong ciah ciangin amah in Seir gam mite’ pasian-te hong ciahpih a, ama pasian dingin tuate koih a, tuate bia-in tuate’ tungah biakna a pia hi.

¹⁵ Tua ciangin Amaziah tungah Topa hehin ama kiangah kamsang khat sawl a, tua pa in, “Bang hangin nangma khut panin ama mite a honkhia lo, mi pawlkhatte’ pasian-te beel na hi hiam?” a ci hi.

¹⁶ Ahih hangin amah in thu a gen laitakin kumpipa in ama kiangah, “Kumpipa tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin ama kiangah, “Hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi.

¹⁷ Tua ciangin Judah kumpi Amaziah in ngaihsutna a lak khit ciangin Israel kumpi, Jehu’ tapa Jehoahaz, a tapa Joash kiangah mi sawlin, “Hong pai in; khatlekhat kisi ni,” cisak hi.

¹⁸ Tua ciangin Israel kumpi Joash in Judah kumpi Amaziah kiangah thu puak a, “Lebanon-a thangling kung in Lebanon-a taamtak tungah thu puak a, ‘A zi dingin ka tapa’ tungah na tanu pia in,’ ci hi. Tua ciangin Lebanon gamsa khat hong pai-in thangling kung tuancil hi.

¹⁹ Nangmah in, ‘Edom mite ka vat khin hi,’ na ci a, na lungsim in nang hong kisathei sak hi. Tu-a na minthanna zah tawh inn-ah om in; bang hangin nangmah le Judah mite na pukkhawm nadingun buaina piangsak ding na hi hiam” a ci hi.

²⁰ Ahih hangin Amaziah in mang lo hi; bang hang hiam cih leh amaute in Edom pasian-te bia uh ahih manin, Pasian in amau’ galte’ khut sungah amaute a piaktheih nadingin tua pen Pasian’ vaihawmna ahi hi.

²¹ Tua ahih ciangin Israel kumpipa Joash kuanto a, Judah-te’ gam Bethshemesh-ah amah le Judah kumpipa Amaziah khatlekhat gal sungah kisi uh hi.

²² Tua ciangin Israel mite in Judah mite zo a, mi khempeuh a inn uhah a tai uh hi.

²³ Tua ciangin Israel kumpipa Joash in Bethshemesh-ah Ahaziah’ tapa Joash, a tapa Amaziah ahi Judah kumpipa manin Jerusalem-ah paipih a, Efraim Kongpi panin a Kiu Kulhpi ciang dong pi zaguk sung Jerusalem kulh a phelkhia hi.

²⁴ Tua ciangin amah in kham le ngun khempeuh, le Pasian’ biakinn sungah a kimu umlebeel khempeuhte tawh Obededom mankhawm hi. Amah in kumpipa’ inn-a vanmanphate la-in luang khapna ding mite zong man a, tua ciangin Samaria-ah a ciahkik hi.

²⁵ Israel kumpi, Jehoahaz’ tapa Joash a sih zawh Judah kumpi Joash’ tapa Amaziah kum sawm le nga sung hinglai hi.

²⁶ Tu-in Amaziah’ nasep a omlaite, a patna panin a tawpna dong, Judah le Israel Kumpite’ Khang Tangthu Laibu sungah kigelh hi.

²⁷ Topa kiang panin amah a kihei khiat a kipanin amaute in amah sawmsimna khat Jerusalem-ah nei uh ahih ciangin Lakhish-ah amah tai hi. Ahih hangin amaute in Lakhish-ah amah nungdelh sak uh a, tua lai-ah amah that uh hi.

²⁸ Tua ciangin sakolte tungah amah pua-in kiciahpih a, David khuapi sungah a pate tawh kivui hi.