2 KHANG TANGTHU NIHNATE 2 - Tedim Bible

Kumpi Hiram tawh Solomon’ Thukimna

¹ Tu-in Solomon in Topa’ min dingin biakinn khat le ama a dingin kumpi inn khat lam ding sawm hi.

² Tua ahih ciangin Solomon in van a pua ding mi tul sawmsagih le mualtung gamah suang a to ding mi tul sawmgiat, le tuate a van dingin mi tulthum le zaguk a seh hi.

³ Tua ciangin Solomon in Taia kumpi Hiram kiangah thu puak a, “Tenna ding inn khat a lam nadingin ka pa David tungah taamtak sing na puak mah bangin kei tungah zong hong puak in.

⁴ En in, Israel-te a dingin a tawntung a ding a kikipsaksa bangin, ama mai-ah a namtui nate ahi paknamtui halna ding, le Ompihna Anlum piak tawntungna ding, le Sabbath nite, Khadet nite, le Topa kote’ Pasian a dingin a kisehsa pawi nite-in zing le nitakin meihal biaknate piak nadingin Topa ka Pasian’ minin biakinn khat lamin ama tungah a ap ding ka hi hi.

⁵ Kote’ Pasian pen pasian dang khempeuh sangin lianzaw ahih manin ka lam ding biakinn zong lian ding hi.

⁶ Ahih hangin vantung, a sang pen vantung nangawn in amah huam zo lo ahih manin ama a dingin kua in biakinn lamzo ding ahi hiam? Ama mai-ah paknamtui halna ding cih simloh ama a dingin biakinn a lamsak dingin kei kua ka hi hiam?

⁷ Tua hi a, tu-in ka pa David in a sehsa, Judah le Jerusalem-ah kei tawh a om nasep siamte tawh a semkhawm dingin kham, ngun, sumngo, le sik, le a ausan, a dupsan, puandumte, le nasepna-ah zong siamna a nei mi khat hong puak in.

^8-9 Taamtak, taaksan, le cingsing zong, Lebanon panin hong puak in; bang hang hiam cih leh na nasemte in Lebanon sing phuk ding zia a theihna ka thei hi. Tua ahih ciangin kei a dingin sing tampi a sem dingin nangma nasemte pen keima nasemte tawh om ding uh hi; bang hang hiam cih leh ka lam ding biakinn pen lianin lamdang ding hi.

¹⁰ Sing nasem sing a phukte a dingin a kisuvui mangbuh beem tul sawmnih, mangbuhham beem tul sawmnih, leenggahzu tambong tul sawmli, le sathau tambong tul sawmli ka hong pia ding hi,” a ci hi.

¹¹ Tua ciangin Taia kumpipa Hiram in lai-in thuk-in Solomon kiangah khak a, “Topa in a mite it ahih manin amaute tungah kumpi-in nang hong koih hi,” a ci hi.

¹² Tua ciangin a lai sungah genthuah lai a, “Topa a dingin biakinn khat, le ama a dingin kumpi inn khat a lam ding, thutheihna le thutelna tawh a kidim mipil, David tungah a pia, van le lei a bawl Israel Topa Pasian in thupha ngah tahen.

^13-14 Tu-in Dan minam numei khat’ tapa, thutelna tawh a kidim, siamna a nei, siapa Huram kong puak hi. Ama pa pen Taia khuami ahi hi. Amah in kham, ngun, sumngo, sik, le sing, le a ausan, a dum, le a dupsan puante, le saihadial puan, le zepna nam khempeuh a sem ding le ka topa ahi na pa David’ mi khutsiamte tawh a semkhawm dingin ama tungah a kipia nasep khat peuhpeuh a sem dingin siamna a neisa ahi hi.

¹⁵ Tua ahih ciangin tu-in ka topa in a gensa mangbuh le mangbuhham, sathau le leenggahzute, na nasemte tungah hong puak in.

¹⁶ Tua ciangin na kisap sing peuhmah Lebanon panin kong phuk ding uh a, nangmah in Jerusalem-ah na puaktoh theih nadingin phongin tuipi tungah Joppa dong nang kiangah kong paipih ding uh hi,” zong ci lai hi.

¹⁷ Tua ciangin a pa David in mi phazah a sim mah bangin, Solomon in Israel gam sunga om gamdang mi phazah simna bawl a, mi tul zakhat le tul sawmnga le tulthum le zaguk pha hi.

¹⁸ Amah in van a pua dingin amaute tul sawmsagih, mualtung gamah suang a to dingin tul sawmgiat, le mite’ nasep a van dingin tulthum le zaguk a seh hi.