2 KHANG TANGTHU NIHNATE 19 - Tedim Bible

Kamsang Jehu in Jehoshafat Tai

¹ Judah kumpipa Jehoshafat lungmuang takin Jerusalem-a ama inn-ah ciahkik hi.

² Ahih hangin amah a dawn dingin Hanani’ tapa, thumu pa Jehu hong paikhia a, Kumpi Jehoshafat kiangah, “Mi gilote huhin Topa a mudahte it ding na hi hiam? Hih thu hangin Topa’ hehna nang tungah hong tungzo hi.

³ Ahi zongin nang na hoihna pawlkhat om hi; bang hang hiam cih leh nangmah in gam sung panin Asherah milimte nusia-in Pasian zon ding na lungsimah na ngaihsun hi,” a ci hi.

Jehoshafat in Thukhen dingte Seh

⁴ Jerusalem-ah Jehoshafat teng hi. Tua ciangin Beersheba panin Efraim mualtung gam ciang dong mite lakah zin kawikawi a, amau’ pute pate’ Pasian, Topa kiangah amaute tunpihkik hi.

⁵ Amah in gam sunga Judah khuapi kulhnei khempeuh a khuapi a khuapi-ah thukhen dingte seh a,

⁶ thukhente tungah, “Note in mi a’ ding hi loin Topa a dingin a khen na hih manun na hih dingte uh limtakin ngaihsun un; thukhenna na piak laitakun note kiangah amah hong om hi.

⁷ Tu-in note in Topa zahtak unla, na hihnate uhah kingaihsun un. Bang hang hiam cih leh Topa i Pasian in thuman heikhiatna, mi deidanna, le sumgolh laknate deih lo hi,” a ci hi.

⁸ Tua tham loin, Topa a dingin thukhenna a pia ding le thuneite a khensak dingin Levi mite le siampite le Israel mi beh lutangte pawlkhat, Jehoshafat in Jerusalem-ah a seh hi. Amaute in Jerusalem-ah a phual ding uh nei uh hi.

⁹ Tua ciangin amah in amaute thuhilh a, “Topa zahtakna, cihtakna, le na lungsim khempeuh uh tawh hih bangin na hih ding uh hi:

¹⁰ A khuapi uhah a teng na sanggamte uh tung panin mi kithahna thu, thukham ahih kei leh thupiakna, upadi ahih kei leh biakna ngeina kipte tawh kisai-in thu khat peuhpeuh note tungah hong tun ciangin, amaute in Topa’ mai-ah mawhna a piansak loh nading le note le na sanggamte uh tungah hehna hong tun loh nadingin amaute na hilh ding uh hi. Tua bangin na gamta ding uh a, mawhna na piangsak kei ding uh hi.

¹¹ En un, Topa’ thu tawh kisai thute khempeuhah siampi lian Amariah note tungah om hi. Tua ciangin kumpipa tawh kisai khempeuhah Judah mite a ukpa Ishmael’ tapa Zebadiah om hi. Tua ciangin Levi mite in note tungah ulian na hong sem ding uh hi. Hang takin gamta un; thuman mite tawh Topa hong om ta hen!” a ci hi.