2 KHANG TANGTHU NIHNATE 18 - Tedim Bible

Mikaiah in Ahab le Jehoshafat a Kizawhna ding Genkhol

¹ Jehoshafat hau-in hong minthan’ ciangin Ahab tawh numei-a kizopna a bawl hi.

² Kum tawmkhat khit ciangin Samaria-a Ahab kiangah amah paisuk hi. Tua ciangin Ahab in amah le amah tawh a hong pai mite a dingin tuu tampi le bawngtal tampi go a, Ramothgilead a sim dingin amah a zol hi.

³ Israel kumpipa Ahab in Judah kumpipa Jehoshafat kiangah, “Ramothgilead-ah kei tawh nong kuan ding hiam?” a ci hi. Amah in dawngin, “Kei pen nangmah bang ka hi a, ka mite zong nangma mite mah bang ahi hi. Kote pen galsimna ah nang tawh kong kuan ding uh hi,” a ci hi.

⁴ Tua ciangin Jehoshafat in Israel kumpipa kiangah, “Topa thu dong masa ni,” a ci hi.

⁵ Tua ciangin Israel kumpipa in kamsangte mihing zali khawmin amaute kiangah, “Ramothgilead a sim dingin kuanto ding ka hi hiam, tua ahih kei leh thuak ding ka hi hiam?” a ci hi. Tua ciangin amaute in, “Kuanto in; bang hang hiam cih leh Pasian in kumpipa’ khut sungah hong pia ding hi,” a ci uh hi.

⁶ Ahih hangin Jehoshafat in, “Eite in i dot theih ding Topa’ kamsang adang hih lai-ah om nawn lo ahi hiam?” a ci hi.

⁷ Tua ciangin Israel kumpipa in Jehoshafat kiangah, “Eite in Topa thu i dot theih nading Imlah’ tapa Mikaiah a kici mi khat omlai hi. Ahih hangin amah in kei tawh kisai a hoih thu gen ngei loin a sia bekbek gen tawntung ahih manin amah ka mudah hi,” a ci hi. Tua ciangin Jehoshafat in, “Tua bangin kumpipa in ci kei in,” a ci hi.

⁸ Tua ciangin Israel kumpipa in ulian khat samin, “Imlah’ tapa Mikaiah manlang takin hong paipih in,” a ci hi.

⁹ Tu-in Israel kumpipa le Judah kumpipa Jehoshafat a kumpi tokhom tung uhah tu-in a puantualpi uh tawh kizem uh hi. Samaria kulhkongpi lutna munah amaute tu uh a, amaute’ mai-ah kamsangte khempeuh in thu a gen uh hi.

¹⁰ Tua ciangin Khenaanah’ tapa Zedekiah in sik kite bawl tawmin, “Topa in hih bangin ci hi: ‘Amaute a siat matengin hihte tawh Syria mite na nawt ding hi,’ ci hi,” a ci hi.

¹¹ Tua ciangin kamsang khempeuh in zong tua bangmahin gen uh a, “Ramothgilead-ah kuanto inla, gualzo in. Topa in kumpipa’ khut sungah hong pia ding hi,” a ci uh hi.

¹² Tua ciangin Mikaiah a sam dingin a pai kamtai pa in ama kiangah, “En in, thu kikhatin kamsangte’ thugen pen kumpipa a dingin a hoihlam ahi hi. Nang zong amaute’ gen bangin gen inla, a hoihlamin gen in,” a ci hi.

¹³ Ahih hangin Mikaiah in, “Topa a nungta ahih mah bangin, ka Pasian’ gen thu bek ka gen ding hi,” a ci hi.

¹⁴ Kumpipa kiangah amah hong tun ciangin kumpipa in ama kiangah, “Mikaiah aw, Ramothgilead-ah galsim dingin kuan ding ka hi hiam, tua ahih kei leh thuak ding ka hi hiam?” a ci hi. Tua ciangin amah in dawngin, “Kuanto inla va gualzo ve! Na khut sungah amaute hong kipia ding hi ve’n,” a ci hi.

¹⁵ Ahih hangin kumpipa in ama kiangah, “Topa’ min tawh thudang gen loin thuman bek kei tungah nong genna ding bangzah vei hong thuhilh ding ka hi hiam?” a ci hi.

¹⁶ Tua ciangin amah in, “A cing nei lo tuute bangin mualte tungah Israel mi khempeuh a kithehthang ka mu hi. Tua ciangin Topa in, ‘Hihte in to nei lo hi; nuamtakin a inn ciat uhah ciahsak un,’ ci hi,” a ci hi.

¹⁷ Tua ciangin Israel kumpipa in Jehoshafat kiangah, “Amah in kei tawh kisai a hoih gen loin a sia bek gen ding hi, ci-in nang kiangah hong gen hi lo ka hi hiam?” a ci hi.

¹⁸ Tua ciangin Mikaiah in, “Topa’ thugen za in: Topa a kumpi tokhom tungah tu a, a taklam le a veilamah vantung mihon khempeuh a ding ka mu hi.

¹⁹ Tua laitakin Topa in, ‘Israel kumpipa Ahab kuanto-in Ramothgilead-ah a pukna dingin kua in amah zol ding ahi hiam?’ a ci hi. Tua ciangin khat in thu khat gen a, adang khat in thudang khat a gen hi.

²⁰ Tua ciangin kha khat hong madawkin Topa’ mai-ah ding a, ‘Keimah in amah ka va zol ding hi,’ a ci hi. Tua ciangin Topa in ama kiangah, ‘Bang lam tawh zol ding na hi hiam?’ a ci hi.

²¹ Amah in, ‘Keimah paikhia-in ama kamsangte khempeuh’ kam sungah zuau thugen kha khat ka va hi ding hi,’ a ci hi. Tua ciangin amah in, ‘Nangmah in amah na va zol ding hi. Pai inla tua bangin va hih in,’ a ci hi.

²² “Tua ahih ciangin Topa in hih na kamsangte’ kam sungah zuauthu a gen kha khat koih khin ahihna thei in. Topa in nang na siatna ding gen khinzo hi,” a ci hi.

²³ Tua ciangin Khenaanah’ tapa Zedekiah a nai-ah hong pai-in Mikaiah a paang bengin, “Cik hun a kipan Topa’ kha in kei hong nusia-in, hih bang na gen nadingin nang tungah hong tung ahi hiam?” a ci hi.

²⁴ Tua ciangin Mikaiah in, “Nangmah a bu dingin inndei sungnungah na pai ni ciangin na thei ding hi,” a ci hi.

²⁵ Tua ciangin Israel kumpipa in, “Mikaiah man unla, khuapi ukpa Amon le kumpipa’ tapa Joash kiangah paipih kik un.

²⁶ Tua ciangin, ‘Hih bangin kumpipa in ci hi: Hih mipa thong sungah koih unla, lungnuam takin kong ciahkik mateng anletui tawmno bek tawh vak un, ci hi,’ ci un,” a ci hi.

²⁷ Tua ciangin Mikaiah in, “Lungnuam takin nong ciahkik leh kei tungtawnin Topa in thu a gen lo ahi hi,” a ci hi. Tua ciangin amah in, “Mi khempeuh aw, tu-a ka thugen za un!” a ci hi.

²⁸ Tua ciangin Israel kumpipa le Judah kumpipa Jehoshafat, Ramothgilead-ah a kuanto uh hi.

²⁹ Tua ciangin Israel kumpipa in Jehoshafat kiangah, “Kei pen mel kiseelin gal sungah kong kuan ding a, ahih hangin nangmah in na puantualpite nong silh ding hi,” a ci hi. Tua ahih ciangin Israel kumpipa a mel kiseel a, amaute gal sungah a kuan uh hi.

³⁰ Tu-in Syria kumpipa in a leeng a ukte thu pia khin a, “A neu tawh ahi a, a lian tawh ahi zongin kido loin, Israel kumpipa bek tawh na kido ding uh hi,” a ci hi.

³¹ Leeng galkap a ukte in Jehoshafat a muh uh ciangin, “Israel kumpipa hi,” a ci uh hi. Tua ahih ciangin amah a hih dingin amaute in naih uh hi. Tua ciangin Jehoshafat kikokhia a, Topa in amah huh hi. Pasian in ama kiang panin amaute kaikhia hi;

³² bang hang hiam cih leh Israel kumpipa ahih lohna leeng galkap a ukte in a theih uh ciangin amah a delhna panin kilehhei kik uh hi.

³³ Ahih hangin mi khat in a thal mawklot a, Israel kumpipa a galdal thep le a awmdal kikal a kha hi. Tua ahih ciangin amah in a leenghawl pa kiangah, “Kei liam ka hih manin kileh inla, galphual panin hong puakhia in,” a ci hi.

³⁴ Tua ni-in galkidona nasia mahmah a, nitak dong Syria mite maingatin a leeng sungah Israel kumpipa kingam hi. Tua hi a, nitum laitakin amah a si ta hi.