2 KHANG TANGTHU NIHNATE 16 - Tedim Bible

Benhadad tawh Asa’ Kipawlna

¹ Asa’ uk a kum sawmthum le gukna kumin Judah a simin Israel kumpipa Baasha paito a, Judah kumpipa Asa kiang panin kuamah a paikhiat theih loh nading le ama kiangah kuamah a pai theih loh nadingin Ramah khua a phut hi.

² Tua ahih ciangin Asa in Topa’ biakinn le kumpipa’ inn-a vanmanpha koihnate panin ngun le kham la-in, Damaskas-ah a teng Syria kumpipa Benhadad kiangah tuate puakin,

³ “Ka pa le na pa a kipawl mah bangin kei le nang i kipawl hi. Tu-in ngun le kham kong puak hi. Kei kiang panin amah a nungkik theih nadingin pai inla Israel kumpipa Baasha tawh na kipawlna va sutat in,” a ci hi.

⁴ Tua ciangin Benhadad in Kumpi Asa’ thu ngai-in Israel khuapite a sim dingin a galkap ukte sawl a, amaute in Ijon, Dan, Abelmaim, le Naftali vankoihna khuapite a zo uh hi.

⁵ Baasha in tua thu a zak ciangin Ramah khua a lam khawl a, a nasep a tawpsak hi.

⁶ Tua ciangin Kumpi Asa in Judah mi khempeuh khawmin thu pia a, Baasha in lamna-a a zat Ramah suang le a singte amaute in puakhia uh a, tuate tawh Geba le Mizpah a lam uh hi.

⁷ Tua hun laitakin Judah kumpi Asa kiangah thumu pa Hanani hong pai-in ama kiangah, “Nangmah in Syria kumpipa suangin, Topa na Pasian suang lo na hih manin, Syria kumpipa’ galkapte in nang hong suaktasak hi.

⁸ Ethiopia mite le Libya mite pen leeng tampi tak le sakol tung tuang tampi tak tawh a om galkap tampi hi lo ahi hiam? Ahi zongin Topa suang na hih manin amah in na khut sungah amaute hong pia hi.

⁹ Bang hang hiam cih leh ama lamah a lungsim a paubaang lo mite’ tangin ama vangliatna a lak dingin Topa’ mit in leitung khempeuh en kawikawi hi. Hih thu-ah na hai gamtat khin hi; bang hang hiam cih leh tu a kipan gal na do ding hi,” a ci hi.

¹⁰ Tua ciangin thumu pa tungah Asa heh a, amah kol bulhin thong sungah a koih hi; bang hang hiam cih leh hih thu hangin ama tungah nakpitakin heh hi. Tua hun mahin Asa in mi pawlkhat zong gitlohna tawh a gimsak hi.

¹¹ Asa’ gamtatnate, a patna pan a tawpna dong, Judah le Israel Kumpite’ Tangthu sungah kigelh hi.

¹² Ama uk a kum sawmthum le kuana kumin Asa in a khe-ah natna nei a, a natna nasia mahmah hi. Ahi zongin ama nat hun nangawnah amah in Topa zong lo a, zato siamte’ huhna a zong hi.

¹³ Tua ahih ciangin Asa si a, ama uk a kum sawmli le khatna kumin a bei ahi hi.

¹⁴ David khuapi sungah amahmah in a khuak han sungah amaute in a vui uh hi. Paknamtui bawl siamte in a bawl a namtui a nam tuamtuamte tawh a kidim hankuang sungah amah a sial uh hi. Tua ciangin amah zahtakna-in amaute in meiphual lian mahmah khat a cih uh hi.