2 KHANG TANGTHU NIHNATE 13 - Tedim Bible

Abijah’ Ukna

¹ Israel Kumpi Jeroboam’ uk kum sawm le giatna kumin Abijah in Judah tungah uk ding kipan hi.

² Amah in Jerusalem-ah kum thum sung uk hi. Ama nu’ min Mikaiah hi a, Gibeah khuami Uriel’ tanu ahi hi. Tu-in Abijah le Jeroboam kikalah galkidona om hi.

³ Galsim dingin Abijah kuankhia a, a kitengkhia mi tul zali a pha, a thahat galhang galkap hon a nei hi. Tua ciangin Jeroboam in Abijah a do dingin a kitengkhia galhang tul zagiat tawh a pang hi.

⁴ Tua ciangin Efraim mualtung gamah a om Zemaraim Mual tungah Abijah dingto-in, “Jeroboam le Israel mi khempeuh aw, ka thu ngai un!

⁵ Israel Topa Pasian in David le a suante tungah Israel kumpi hih ding thuciamna kip tawh a piakna na theih ding uh kilawm hi lo ahi hiam?

⁶ Ahi zongin David’ tapa Solomon’ nasempa, Nebat’ tapa Jeroboam kipanin a topa lehdo hi.

⁷ Rehoboam khangno lai a, thu khentat thei nai loin, amaute a nial zawh nai loh hun laitakin mi ginalo honkhat Solomon’ tapa Rehoboam’ kiimah kikhawmin amah dem uh hi.

⁸ Note mi tampi na hihna uh le note’ pasian dingin Jeroboam in hong bawlsak kham bawngnote note tawh a om manin, David’ suante’ khut sungah a om Topa’ kumpi gam do ding tu-in na ngaihsun uh hi.

⁹ Note in Aaron’ suan, Topa’ siampite, le Levi mite hawlkhia-in, gamdang mite bangin note a dingin siampite bawl khin hi lo na hi uh hiam? Bawngtalno khat tawh ahi a, tuutal sagih tawh ahi zongin a ki-ap dingin a hong pai peuhpeuh, pasian a hilote’ siampi suak pahpah hi.

¹⁰ “Ahih hangin kote ahihleh, Topa pen ka Pasian uh hi a, amah ka nusia kei uh hi. Topa’ na a sem, Aaron’ suan ahi siampite le amau’ nasepna-ah a huh dingin Levi mite ka nei uh hi.

¹¹ Amaute in Topa tungah zing le nitak simin meihal biaknate le a namtui nate ahi paknamtuite pia uh a, kham citak sabuai tungah Ompihna Anlum koihin, a meivakte a kuan nadingin nitak simin kham meivakkhuamte a don uh hi; bang hang hiam cih leh kote in Topa Pasian’ hong sawlnate ka zui uh a, ahih hangin note in amah na nusia uh hi.

¹² En un, kote’ lutangin kote tawh Pasian hong omkhawm a, note a do ding sapna peengkul a tum dingin a siampite a galkap peengkulte uh tawh hong om uh hi. Israel mite aw, na pu na pate uh Pasian, Topa do kei un; bang hang hiam na cih uhleh na tangtung kei ding uh hi,” a ci hi.

¹³ A nunglam panin amaute a hih dingin a pangsim ding pawlkhat Jeroboam in kual paisak hi. Tua ahih ciangin Judah mite’ mai-ah ama galkapte om a, a pangsimte amau’ nungah om hi.

¹⁴ Judah mite a khuadak uh ciangin, amau’ mai le a nung uhah gal a omlam mu uh hi. Tua ciangin Topa’ tungah amaute kiko uh a, siampite in a peengkulte uh a tum uh hi.

¹⁵ Tua ciangin Judah mite in galdona aw kiko uh hi. Judah mite a kiko uh ciangin Abijah le Judah mite’ mai-ah Pasian in Jeroboam le Israel khempeuh zo hi.

¹⁶ Judah mite’ mai-ah Israel-te tai uh a, Pasian in amau’ khut sungah Israel-te a pia hi.

¹⁷ Abijah le a mite in Israel-te tampi tak that uh hi. Tua ahih ciangin Israel mi a kitengkhia mihing tul zanga a kithatin tuk hi.

¹⁸ Judah mite in a pu a pate uh Pasian, Topa suang uh ahih manin gualzo uh a, tua hunin Israel mite kizo hi.

¹⁹ Tua ciangin Abijah in Jeroboam delh a, ama tung panin khuapite, Bethel a khuaneute tawh, Jeshanah a khuaneute tawh, le Efron a khuaneute tawh a la hi.

²⁰ Jeroboam in Abijah’ hun sungin ama vangliatna ngahkik lo hi. Tua ciangin Topa in Jeroboam vat a, amah a si hi.

²¹ Ahih hangin Abijah a thahatna a khang hi. Amah in zi sawm le li la a, tapa sawmnih le nih le tanu sawm le guk a nei hi.

²² Abijah’ gamtatna a omlaite, ama ziate le a thugente, Kamsang Iddo’ Tangthu sungah kigelh hi.