1 TIMOTI MASA 1 - Tedim Bible

Hopihna

¹ Eite a hong Hon Pasian le eite’ lamet Khrih Jesuh’ thupiakna tawh Khrih Jesuh’ sawltak ahi keimah Paul in,

² Thu upna sungah ka tapa taktak ahi Timoti tungah lai ka hong khak hi. Pa Pasian le eite’ Topa Khrih Jesuh in dikna, hehpihna le nopsakna thupha, nangma tungah hong tungsak tahen.

Upna Man lo tawh Kisai Hilhkholhna

³ Masedonia gam lam manawhin ka pai lai-in Efesa khua-ah na om ding ka hong sawl mah bangin tu-in zong tua khua mahah na omlai inla, thu upna man lo a hilh mite, a thuhilh a khawl nadingun thu na pia in.

⁴ Phuahtawm tangthute le min tampipi kizom deudau-a khangsimnate in upna tawh i ngahtheih Pasian’ vaihawmnate tangtungsak loin, khatlekhat kitotna piangsak lel ahih manin, tua bang thute a manlahpih loh nadingun na gen in.

⁵ Hih bangin thupiakna pen, upna taktak le kisuanna om hetloin lungsim siangtho taktak tawh ngaihsutna panin a hong piangkhia ki-itna a khantheih nading deihna ahi hi.

⁶ Mi pawlkhatte, hih bang ngaihsutna panin peukhia-in bangmahin a kimang lo thu kikupna tawh nitum uh hi.

⁷ Thei kisa ngelin a gen kankan uh thute le amau kampauna mahmah zong bang gen ka hi hiam cih a thei het lo hinapi-in amaute pen Pasian’ thukhamte a hilh dingin utzaw lai uh hi.

⁸ Thukham pen a kizat nading a kilawm ciang ah zangthei lehang a hoih thu khat hi, ci-in i thei hi.

⁹ Ahi zongin i phawk dingah, mi hoihte a dingin thukham a kibawl hi lo a, thukham zui lote, thumang lote, Pasian’ deih bangin a gamta lote le mawhneite, biakna lungsim a nei lote le kam kilawm lo a paute, nute pate a thatte, midang a thatte,

¹⁰ nulepa mawhna a gamtate, palepa mawhna a bawlte, mi a gute, zuauthu a gente, mite’ siat nading thu a gente, le thuman tawh a kilehbulhin a gamta mite a dingin thukham a kibawl ahi hi.

¹¹ Thuman ka cih pen thupha tawh kidimin a minthang Pasian in ka hilh dingin kei tungah a hong piak Lungdamna Thu ahi hi.

Pasian’ Hehpih Manin Paul’ Lungdamna

¹² Hih bangin na sepzawh nadingin thatang hatna a hong pia i Topa Khrih Jesuh tungah ka lungdam hi. Ama nasem dingin kei hong muangin hong seh ahih manin ka nuam hi.

¹³ A beisa hunah amah gensia-in, simmawh bawlin, ama mite a bawlsia pa ka hih ngei tei hangin ama thu ka up nai loh manin theih lohna tawh a gamta ka hih manin Pasian in kei hong hehpih hi.

¹⁴ Pasian in genzawh lohin kei hong hehpih a, Khrih Jesuh tawh kipawlna hangin i ngahtheih upna le itna a hong guan hi.

¹⁵ Khrih Jesuh, mawhneite a honkhia dingin leitungah hong pai hi, cihna thu a man hi a, a uphuai a sanhuai thu ahi hi. Keimah zong tua mawhnei mite lakah a mawhpha bel ka hi hi.

¹⁶ A mawhnei pha bel ka hihna thu hang mahin, nidang ciangin amah umin nuntak tawntungna a ngah ding mite’ etteh theih dingin Khrih Jesuh in a lungduaina cingtakin kei tungah hong lahtheih nadingin Pasian in kei a hong hehpih ahi hi.

¹⁷ Amah bek Pasian ahi, a kimu thei lo, a si ngei lo, tawntung Kumpipa in minthanna le pahtawina ngah tawntung tahen. Amen.

¹⁸ Ka ta Timoti aw, tanglai pek a kipanin nang bang mite a dingin a kigensa thu tawh kizui-in nang tungah a thu ka hong ap hi. Hoihtakin gal na dozawh nadingin galhiamin tua thute zang inla,

¹⁹ na upna le lungsim kisuang loin na omna thu kiptakin len paisuak in. Mi pawlkhatte in a lungsim kitheihna uhah man a kisakna bangun gamta lo uh ahih manin a thu upna uh a mawkna a suah uh hi.

²⁰ Tua bang mite lakah Hymenaias le Alexander kihel uh a, Pasian gensiat nawn loh nading thu a phawktheih nadingun Satan’ khut sungah amaute ka ap hi.