1 SAMUEL MASA 5 - Tedim Bible

Filistia-te’ Gamah Thuciamna Singkuang Om

¹ Filistia mite in Pasian’ Thuciamna Singkuang a mat uh ciangin Ebenezer panin Ashdod-ah pua uh hi.

² Tua ciangin Filistia-te in Pasian’ Thuciamna Singkuang la-in Dagon inn sungah paipihin Dagon kiangah koih uh hi.

³ Ashdod mite a zing ciang zingsang tungin a thawh uh ciangin, Topa’ Thuciamna Singkuang mai leilakah Dagon na maipuk hi. Tua ahih ciangin amaute in Dagon phongto-in ama omna munah koihkik uh hi.

⁴ Ahih hangin a zing ciang zingsang tungin amaute a thawh uh ciangin Topa’ Thuciamna Singkuang mai leilakah Dagon na maipuk leuleu a, Dagon lutang le a khut tegel kitankhia-in sangkil gei-ah om a, Dagon a pumpi bek omlai hi.

⁵ Tuni dongin Dagon siampite le Dagon inn-ah a tumte khempeuh in hih thu hangin Ashdod a Dagon sangkil tung sik lo uh hi.

⁶ Topa in Ashdod khua mite nakpitakin gawt a, amah in uilut tawh Ashdod khua le a gam sung lausakin gimsak hi.

⁷ Ashdod mite in hih bang thute a muh uh ciangin amaute in, “Israel-te’ Pasian’ Thuciamna Singkuang eite kiang panin a paikhiat loh phamawh hi. Bang hang hiam cih leh amah in eite le i pasian Dagon hong gawt hi,” a ci uh hi.

⁸ Tua ahih ciangin amaute in mi sawlin Filistia uliante khempeuh khawm uh a, “Israel-te’ Pasian’ Thuciamna Singkuang bang cih ding ihi hiam?” a ci uh hi. Amaute in dawngin, “Israel-te’ Pasian’ Thuciamna Singkuang Gath-ah koihsak ni,” a ci uh hi. Tua ahih ciangin amaute in Israel-te’ Pasian’ Thuciamna Singkuang tua lai-ah paipih uh hi.

⁹ Ahih hangin amaute in tua Gath khua-ah a tunpih khit uh ciangin Topa in tua khuapi langpanin apkhapna lianpi piangsak a, amah in khuapi mite a moi a hamin gimsakin amaute in uilut vei uh hi.

¹⁰ Tua ahih ciangin amaute in Pasian’ Thuciamna Singkuang Ekron-ah puak uh hi. Ahih hangin Pasian’ Thuciamna Singkuang Ekron a tun ciangin Ekron mite kiko uh a, “Kote le ka mite uh a that dingin amaute in Israel-te’ Pasian’ Thuciamna Singkuang ko kiangah hong paipih uh hi,” a ci uh hi.

¹¹ Tua ahih ciangin amaute in mi sawlin Filistia uliante khempeuh khawmin, “Kote le ka mite uh hong thahloh nadingin Israel-te’ Pasian’ Thuciamna Singkuang puakkhia unla, ama omna munah ciahkiksak un,” a ci uh hi. Bang hang hiam cih leh a khuapi sung khempeuhah si dektak a apkhapna om hi. Pasian in tua lai-ah amaute nak gawt mahmah hi.

¹² A si lo sunte in uilut vei uh a, khuapi sunga kahna awging vantung dongah kizato hi.