1 SAMUEL MASA 30 - Tedim Bible

David in Amalek-te Zo

¹ David le a mite a ni thum ni-in Ziklag hong tun uh ciangin, Amalek-te in Negeb le Ziklag na sim khin uh hi. Amaute in Ziklag zo-in mei tawh na hal uh a,

² numei khempeuh le tua khuasunga omteng a neu a lianin man uh hi. Amaute in khat zong that lo uh a, ahih hangin amaute khempeuh paikhiatpih uh hi.

³ David le a mite khuapi a tun uh ciangin a khuapi uh mei tawh na kihalin, a zite uh, a tanute uh, le a tapate uh salin a kimat khitna thei uh hi.

⁴ Tua ciangin David le amah tawh a om mite in a aw uh gingsakin a tha bei dongun kap uh hi.

⁵ David’ zi nihte, Jezreel khuami Ahinoam le Karmel khuami Nabal’ zi meigongnu Abigail zong salin kiman hi.

⁶ David nakpitakin lungkham hi. Bang hang hiam cih leh mi khempeuh a tanu a tapate uh hangin lungsimsia uh ahih manin amaute in suang tawh amah den ding gen uh hi. Ahih hangin Topa a Pasian in David thakhauhsak hi.

⁷ Tua ciangin David in Ahimelek tapa Abiathar kiangah, “Siampipuan hong paipih in,” a ci hi. Tua ahih ciangin Abiathar in David kiangah siampipuan a paipih hi.

⁸ Tua ciangin David in Topa thu dong a, “Hih mihonte ka delh ding hiam?” a ci hi. Amah in dawngin, “Delh in; bang hang hiam cih leh na pha taktak ding a, na mite na honkhiazo taktak ding hi,” a ci hi.

⁹ Tua ahih ciangin David le amah tawh a om mihing za gukte kuankhia uh a, Besor lui-ah tungin, tua lai-ah mi pawlkhat kinusia uh hi.

¹⁰ Ahih hangin David le mi za lite a delhin paisuak uh a, Besor lui a galkah dingin a gimlua mi zanih kinusia uh hi.

¹¹ Amaute in Egypt mi khat gamlakah mu uh a, David kiangah amah paipih uh hi. Amaute in an pia uh a, amah in ne hi. Amaute in tui dawn ding zong a pia uh hi.

¹² Theimoh khat le leenggahkeu bawk nih zong a pia uh hi. Amah in tuate a nek khit ciangin a tha hong dimkik hi. Bang hang hiam cih leh an ahi a, tui ahi zongin sun thum le zan thum ne lo dawn loin om hi.

¹³ Tua ciangin David in ama kiangah, “Nang kuate na hi hiam? Koi pan na hi hiam?” a ci hi. Amah in, “Kei pen Amalek-te khat’ nasem, Egypt mi tangval khat ka hi hi. Tuma ni thum lai-in ka ci na ahih manin ka topa in hong nusia hi.

¹⁴ Kote in Khereth mite’ Negeb gam le Judah-te’ gam sung le Kaleb mite’ Negeb gam ka sim uh a, mei tawh Ziklag ka hal uh hi,” a ci hi.

¹⁵ Tua ciangin David in ama kiangah, “Hih mite kiangah nong paipih suk nuam ding hiam?” a ci hi. Amah in, “Nangmah in kei nong thahlohna ding ahi a, ka topa’ khut sungah nong apkik loh nading ahi zongin Pasian’ min tawh kei tungah hong kiciam peuh lecin hih mihonte kiangah nang kong paipihsuk ding hi,” a ci hi.

¹⁶ Tua ciangin amah in David paipih suk hi. Filistia-te’ gam le Judah gam panin a lak uh na tampite hangin amaute gam sung khempeuhah kithehthangin an ne, tuidawn, laamin na om uh hi.

¹⁷ Tua ciangin David in a zing ciang phalvak a kipan nitak dong amaute vatgawp a, kalaoh tung tuangin a tai tangval za lite simloh amaute khat zong suakta lo uh hi.

¹⁸ David in Amalek-te’ laksa khempeuh ngahkik a, a zi nihte honkhia hi.

¹⁹ A neu a lian, tanute tapate nate ahi a, a kila khat peuhpeuh ahi zongin a kisam khat zong om lo a, David in a vekpi-in ciahpih kik hi.

²⁰ David in tuuhonte le bawnghonte khempeuh zong man hi. Mite in tua ganhingte ama mai-ah hawl uh a, “David’ na lakte ahi hi,” a ci uh hi.

²¹ Tua ciangin, David a zui dingin a gimlua, Besor lui-ah a kinusia mihing za nihte kiangah David tung hi. David le amah tawh a om mite a dawn dingin amaute hong kuankhia uh a, a nai a tun ciangin David in amaute hopih hi.

²² Tua ciangin David tawh a pai mite lak panin a gilo le mi ginalote khempeuh in, “Amaute pen eite tawh hong paisuak lo uh ahih manin, amaute in a zite le a tate uh la-in a paikhiatpih uh cih simloh, eite’ ngahkik nate khat zong amaute i pia kei ding hi,” a ci uh hi.

²³ Ahih hangin David in, “Ka sanggamte aw, Topa in eite hong piaksa nate tua bangin na hih kei ding uh hi. Amah in eite hong kemin eite a do dinga hong pai mihonte i khut sungah hong pia khin hi.

²⁴ Hih thu-ah kua in no’ thu hong ngai ding ahi hiam? Bang hang hiam cih leh gal sungah a kuan mipa’ tanh zah mah, van a ngak mipa in tang ding a, amaute in a kibangin ngah ding uh hi,” a ci hi.

²⁵ Tua ni a kipanin tuni dongin amah in Israel-te a dingin thukham le biakna ngeina kipin a bawl hi.

²⁶ Ziklag a tun ciangin David in Judah upa a lawmte kiangah a na lakte pawlkhat khakin, “Topa’ galte’ na a kilate sung panin hih lai-ah note a’ ding letsong a om hi,” a ci hi.

²⁷ Tua nate pen Bethel, Negeb gam sunga om Ramoth, le Jattir,

²⁸ Aroer, Sifmoth, Eshtemoa,

²⁹ Karmel, Jerahmeel khuapite, Ken khuapite,

³⁰ Hormah, Borashan, Athak,

³¹ Hebron sunga omte, David le a mite a pai ngeina mun khempeuhte a’ ding ahi hi.