1 SAMUEL MASA 3 - Tedim Bible

Topa in Samuel Sam

¹ Tu-in Eli’ khutnuai-ah naupang Samuel in Topa’ na sem hi. Tua hun lai-in Topa in thu genmun lo a, maangmuh ommun lo hi.

² Tua hunin a mit a maang dingin a kipan khin Eli in khua mu thei lo a, ama omna tuamah lum hi.

³ Pasian’ meivak mit nai lo a, Pasian’ Thuciamna Singkuang a omna mun Topa’ mun siangtho sungah Samuel lum hi.

⁴ Tua ciangin Topa in, “Samuel! Samuel!” ci-in sam ahih manin amah in, “Hih lai-ah om ing!” ci-in

⁵ Eli kiangah tai a, “Hih lai-ah om ing, nong sam hi,” a ci hi. Ahih hangin amah in, “Kong sam kei hi; lumkik in,” a ci hi. Tua ahih ciangin amah pai-in a lum hi.

⁶ Tua ciangin Topa in sam kikin, “Samuel!” a ci hi. Samuel tho-in Eli kiangah pai-in, “Hih lai-ah om ing, nong sam hi,” a ci hi. Ahih hangin amah in, “Kong sam kei hi, ka tapa aw; lum kik in,” a ci hi.

⁷ Tua laitakin Samuel in Topa thei nai lo hi. Bang hang hiam cih leh Topa in amah hopih ngei nai lo hi.

⁸ Topa in Samuel a thum veina sam kik hi. Amah tho-in Eli kiangah pai-in, “Hih lai-ah om ing, nong sam hi,” a ci hi. Tua ciangin Topa in naupang a sapna thu Eli in a thei hi.

⁹ Tua ahih ciangin Eli in Samuel kiangah, “Pai-in lum in; amah in nang hong sap leh nangmah in, ‘Hong gen in, Topa aw, na nasempa in za hi,’ na ci ding hi,” a ci hi. Tua ahih ciangin Samuel pai-in ama omna-ah lumsuk hi.

¹⁰ Topa hong pai-in hong ding a, a hun dangte-a mah bangin, “Samuel! Samuel!” ci-in a sam hi. Tua ciangin Samuel in, “Hong gen in, na nasempa in za hi,” a ci hi.

¹¹ Tua ciangin Topa in Samuel kiangah, “En in, a za mite khempeuh’ bil nihte a vut ding na khat Israel-te’ sungah a sem ding ka hi hi.

¹² Tua ni ciangin ama innkuan tawh kisai ka gensa khempeuh a patna pan a tawpna dong Eli tungah ka tungsak ding hi.

¹³ A tapate in Pasian mindaisak a, amah in a tate kham lo ahih manin, ama theih a mawhna hangin ama innkuan gimna a pia tawntung ding ka hihna ama kiangah ka gen hi.

¹⁴ Tua ahih ciangin Eli innkuante’ mawhna pen biakna ahi a, piakna in ahi zongin a maisak zawh ngei loh nading thu Eli’ innkuante tungah ka kiciam hi,” a ci hi.

¹⁵ Samuel zong zingsang dong lum hi. Tua ciangin amah in Topa’ inn kongkhakte hong hi. A maangmuhna Eli’ kiangah a gen ding Samuel lau hi.

¹⁶ Ahih hangin Eli in Samuel samin, “Ka tapa Samuel aw,” a ci hi. Amah in, “Hih lai-ah om ing,” a ci hi.

¹⁷ Eli in, “Amah in nang kiangah hong gen bang ahi hiam? Kei kiangah hong im kei in. Amah in nang tungah hong gente khempeuh kei kiangah ip nong neih leh, Pasian in nang hong dawm kei ta hen,” a ci hi.

¹⁸ Tua ahih ciangin Samuel in ama kiangah a vekpi-in genin bangmah im lo hi. Tua ciangin Eli in, “Amah pen Topa ahi hi. Amah in hoih a sak bangin hih ta hen,” a ci hi.

¹⁹ Samuel khang a, Topa in amah ompihin, Samuel’ thugente khat zong lei-ah kiasak lo hi.

²⁰ Tua ciangin Dan le Beersheba kikal-a om Israel-te khempeuh in Topa’ kamsangin Samuel a kikipsakna thei uh hi.

²¹ Tua ciangin Shiloh-ah Topa kilang kik zelzel hi. Shiloh-ah Topa mahmah Samuel tungah kilangin thu gen a, Samuel in mite tungah gensawn hi. Tua ciangin Israel-te khempeuh in Samuel’ thu a zui uh hi.