1 SAMUEL MASA 27 - Tedim Bible

Filistia-te Lakah David Teng

¹ David in a lungsim sungah, “Saul’ khut tawh ni khat ni ciangin ka si theikha ding hi. Kei a dingin Filistia-te’ gamah tai ding sangin a hoihzaw dang om lo hi. Tua hileh Saul in Israel gamgi huam sungah kei hong zon niloh lungkia ta ding a, ama khutsung panin ka suakta ding hi,” a ci hi.

² Tua ahih ciangin David kithawi a, amah tawh a om mihing za gukte tawh Gath kumpipa, Maok’ tapa Akhish kiangah a pai hi.

³ Tua ciangin David, a innkuanpihte le a mite a innkuanpih ciat tawh, David zong a zi nihte, Jezreel khuami Ahinoam le Nabal’ zi meigongnu, Karmel khuami Abigail tawh, Gath-a Akhish kiangah va teng hi.

⁴ Gath-ah David tai hi, ci-in Saul kiangah a kigen ciangin amah in David zong nawn lo hi.

⁵ Tua ciangin David in Akhish kiangah, “Nong hehpih zawh leh, ka ten theih nadingin gam sung khuate khatah kei a’ ding mun hong pia in; bang hangin na nasempa nang tawh kumpi khua sungah tengkhawm ding ahi hiam?” a ci hi.

⁶ Tua ahih ciangin Akhish in tua ni-in ama tungah Ziklag khua a pia hi. Tua ahih manin tuni dongin tua khua pen Judah kumpite a’ ahi hi.

⁷ Filistia gam sungah David a ten hunsung pen kum khat le kha li sung ahi hi.

⁸ Tu-in David le a mite paito-in Geshur mite, Girzi mite, le Amalek mite va sim hi; bang hang hiam cih leh hih mite pen Egypt lam Shur ciang dongah tanglai a kipanin a teng mite ahi uh hi.

⁹ Tua ciangin David in tua gam vatgawp a, numei ahi a, pasal ahi zongin hingkhawi loin, ahih hangin tuute, bawngtalte, late, kalaohte, le puante la-in Akhish kiangah hong ciahkik hi.

¹⁰ Akhish in, “Tuni-in kua va sim na hi uh hiam?” ci-in a dot ciangin David in, “Judah mite’ Negeb gam,” ahih kei leh, “Jerahmeel mite’ Negeb gam,” ahih kei leh, “Ken mite’ Negeb gam,” a ci hi.

¹¹ David in, “Amaute in kote’ thu genin, ‘David in tua bangin hih hi,’ ci ding uh ahih ciangin,” ci-in ngaihsun ahih manin Gath-ah thu a puak thei ding numei ahi a, pasal ahi zongin hingkhawi lo hi. Filistia-te’ gam sungah a ten sungteng tua bang gamtatna pen ama ngeina ahi hi.

¹² Akhish in David muangin, “Ama mipih Israel-te in a muhdah theih nadingin amahmah kibawl khin hi. Tua ahih ciangin amah ka nasem hi tawntung ding hi,” ci-in a ngaihsun hi.