1 SAMUEL MASA 25 - Tedim Bible

David le Abigail

¹ Tu-in Samuel si a, Israel-te khempeuh kikhawmin ama hangin kap uh a, amaute in Ramah-a a inn-ah amah a vui uh hi. Tua ciangin Paran gamlakah David paisuk hi.

² Karmel mualah nasep a nei mi khat Maon khua-ah a om hi. Tua pa hau mahmah a, amah in tuu tulthum le keel tulkhat nei hi. Amah in Karmel-ah a tuumul a met hi.

³ Tua mipa’ min Nabal hi a, a zi’ min Abigail ahi hi. Tua numei, tei le melhoih a thuah khat hi a, ahih hangin a pasal pen a ki-uk zo lo mi le a gamtatsia khat hi a, amah Kaleb mi ahi hi.

⁴ Nabal in a tuumul a metna thu David in gamlakah a za hi.

⁵ Tua ahih ciangin David in a tangvalte sawm sawl hi. David in a tangvalte kiangah, “Karmel-ah paito-in Nabal kiangah pai unla, keima min tawh amah va hopih un.

⁶ Hih bangin amah na hopih ding uh hi: ‘Nang tungah nopna om ta hen, na innkuan tungah nopna om ta hen, na neih khempeuh tungah zong nopna om tahen.

⁷ Gan mul mette na neihna ka za hi. Na tuucingte kote tawh omin amaute tungah siatna ka bawl kei uh a, Karmel-ah a om sungteng uh amaute in bangmah mansuah lo uh hi.

⁸ Na tangvalte uh dong lecin amaute in nang kiangah hong genthei ding uh hi. Tua ahih ciangin ka tangvalte maipha na musak in; bang hang hiam cih leh pawi ni-in kong pai uh hi. Na neih sung pan nong piak theih peuhpeuh na nasemte le na tapa David tungah pia in,’ ci un,” a ci hi.

⁹ Tangvalte hong tun ciangin amaute in hih thu khempeuh David’ minin Nabal kiangah gen uh a, tua ciangin amaute in ngak uh hi.

¹⁰ Tua ciangin Nabal in David’ nasemte dawngin, “David kua ahi hiam? Jessi’ tapa kua ahi hiam? Tulai-in a tote kiang panin a taikhia nasem tampi om hi.

¹¹ Ka anlum le ka tui le ka gan mul meette a dingin ka gawh ka sate la-in koilai panin hong pai cih ka theih loh mite tungah pia ding ka hi hiam?” a ci hi.

¹² Tua ahih ciangin David’ tangvalte ciahkikin hih thu khempeuh ama kiangah a gen uh hi.

¹³ David in a mite kiangah, “Mi khempeuh in na namsau uh kuah ciat un!” a ci hi. Amaute khempeuh in a namsau uh kuah uh a, David in zong a namsau a kuah hi. Mihing zali bang David’ nungah paito uh a, mihing za nihte van ngakin om uh hi.

¹⁴ Ahih hangin Nabal’ nasem tangvalte khat in Nabal’ zi Abigail kiangah thu genin, “En in, ka topa uh a hopih dingin gamlak panin David in kamtaite hong paisak a, amah in amaute na tai hi.

¹⁵ Ahi zongin kote tungah tua mite hoih mahmahin kote in siatna ka thuak kei uh a, amaute tawh ka pai laiteng uh gamlakah ka om sungun bangmah ka mansuah kei uh hi.

¹⁶ Tuute kemin amaute tawh ka omsung khempeuh uh sun le zanin amaute in kote hong hu uh hi.

¹⁷ Tua ahih ciangin hih thu thei inla, na hih ding ngaihsun in. Bang hang hiam cih leh ka topa le a innkuan khempeuh tungah siatna tunsak ding kingaihsun a, amah a khansia ahih manin kuamah in hopih thei lo hi,” a ci hi.

¹⁸ Tua ciangin Abigail kinawhin, anlum lum zanih, leenggahzu savun thawl nih, a han’ minsa tuu nga, ankan lawh nga, leenggahkeu bawk zakhat, le theimoh zanih la-in late tungah tuate a guang hi.

¹⁹ Tua nu in a tangvalte kiangah, “Keima mai-ah na paisuak un; note’ nungah kei kong pai ding hi,” a ci hi. Ahih hangin amah in a pasal Nabal hilh lo hi.

²⁰ Amah la tungah tuangin mual liahah a paisuk laitakin, en in, David le a mite ama lamah hong paisuk uh hi; amah in amaute na dawn hi.

²¹ Tu-in David in, “Ama neihsa khempeuh khat zong a mangthang lo dingin hih mipa’ neih khempeuh gamlakah a mawkna-in ka cing a, amah in hih thuhoihte a sia tawh kei tungah hong thuk hi.

²² Zing ciangin ama neihsa khempeuh lakah pasal khat zong ka siit taak leh Pasian in keimah David hong dawm kei ta hen,” na ci khin hi.

²³ Abigail in David a muh ciangin kinawh a, a la tung panin tuakin David’ mai-ah puk a, leilakah a kun hi.

²⁴ Ama khe phungah pukin, “Kei tung bekah, ka topa aw, mawhna om tahen. Na kiangah na nasemnu thu hong gensak inla, na nasemnu’ thugente hong ngai in, ci-in kong thum hi.

²⁵ Ka topa in hih a khansia mipa Nabal ngaihsun kei in; bang hang hiam cih leh ama min mah bangin amah zong a tuaci mah ahi hi. Nabal ama min hi a, haina in amah vukcip hi. Ahih hangin na nasemnu keimah in nangma hong sawl na tangvalte ka mukha kei hi.

²⁶ Tua ahih ciangin tu-in, ka topa aw, Topa nungta-in, nang zong na nuntak mah bangin, mi na thahloh nading le nangma khut tawh thukkikna na hihloh nadingin Topa in nang hong kho ahih manin, tu-in na galte le nangma tungah siat nading a zongte khempeuh Nabal bang tahen.

²⁷ Tu-in na nasemnu keimah in nangmah ka hong puak hih letsong nangma nung hong zui tangvalte hong piasak in.

²⁸ Na nasemnu’ khialhna hong maisak in, ci-in kong thum hi. Bang hang hiam cih leh nangmah in Topa’ galte do na hih manin Topa in na suanlekhakte kipsak paisuak ding a, na nuntak laiteng nang sungah siatna kimu lo ding hi.

²⁹ Nangmah delhin hong that dingin mite hong kipat leh, nang pen Topa na Pasian’ kepna sung a hing mite lakah na om ding a, amah in suanglotna tawh lotkhiat bangin na galte lawnkhia ding hi.

³⁰ Topa in nangmah tawh kisai thu a hoih a gente khempeuh tawh kizui-in hong hihin, Israel-te tungah ulianin nang hong koih khit ciangin,

³¹ thu om lopi-in mi thahna ahi a, nangmahmah in phulakna hangin ahi zongin, dah nading thu ahi a, lungsim nat nading thu ahi zongin na nei kei ding hi. Topa in limtakin nang hong bawl ciangin na nasemnu hong phawk in,” a ci hi.

³² Tua ciangin David in Abigail kiangah, “Tuni-in keimah a dawn dingin nang a hong sawl Israel-te’ Pasian, Topa in thupha ngah ta hen!

³³ Tuni-in mi thahna le keima khut tawh phulak nading panin keimah hong kem nangma ngaihsutna in thupha ngah ta hen!

³⁴ Bang hang hiam cih leh nang kong gimsak nading panin hong kho Israel Pasian, Topa a nungta taktak ahih mah bangin, nang hong kinawhin keimah a dawn dingin hong pai lo hi lecin, zing ciangin Nabal sung pan pasal khat zong hing nawn lo ding hi,” a ci hi.

³⁵ Tua ciangin David in ama tung panin amah a puakte a sang hi. Amah in tua nu kiangah, “Lung nuamin na inn-ah ciahto ta in. Na thu ka ngai a, nong thumna kong pia khin hi,” a ci hi.

³⁶ Tua ciangin Nabal kiangah Abigail hong tungkik hi. Kumpipa’ pawi tawh kibangin amah in a inn sungah pawi na kham hi. Nabal lungnuam mahmah hi. Bang hang hiam cih leh amah in zu kham mahmah hi. Tua ahih ciangin zingsang khuavak mateng ama kiangah bangmah gen peuhmah lo hi.

³⁷ Zingsang ciang, Nabal’ zukhamna a ven’ ciangin a zi in ama kiangah hih thute gen a, thakhatin a lungtang si-in amah suangtum bang hi.

³⁸ Tua khit ni sawm bang ciangin Topa in Nabal vat a, amah a si ta hi.

³⁹ Nabal a sihna thu David in a zak ciangin amah in, “Nabal khut tung panin ka ngah zahkohna hong thuksakin, siatna panin a nasempa a lenkik Topa in thupha ngah tahen. Topa in Nabal’ gamtat siatna ama lu tung mahah tungkiksak hi,” a ci hi. Tua ciangin David in mi sawlin ama zi dingin Abigail helsak hi.

⁴⁰ David’ nasemte Karmel-a Abigail’ kiang a tun ciangin amaute in tua nu kiangah, “David in ama zi dingin a la dingin kote nang kiangah hong sawl hi,” a ci uh hi.

⁴¹ Tua ciangin amah dingin lei-ah maikun a, “En un, na nasemnu uh ka topa’ nasemte’ khe a silsak ding nasem ahi hi,” a ci hi.

⁴² Tua ciangin Abigail kinawhin dingin la tungah tuang a, ama nasem numei nga in amah a kem hi. David’ kamtaite’ nung zui-in pai a, tua ciangin ama zi a suak hi.

⁴³ David in Jezreel khuami Ahinoam zong la a, amau tegel ama zi a suak uh hi.

⁴⁴ Saul in ama tanu Mikhal, David’ zi pen, Gallim khuami Laish’ tapa Palti tungah na pia khin hi.