1 SAMUEL MASA 22 - Tedim Bible

¹ David tua lai panin kihemkhia-in Adullam leihawmah tai hi. A sanggamte le a pa’ innkuante khempeuh in a zak uh ciangin ama kiang tua lai munah paisuk uh hi.

² Tua ciangin a lungkham mi khempeuh, leiba a nei mi khempeuh, le a lungkim lo mite khempeuh ama kiangah hong kikhawm uh hi. Amah pen amaute tungah a ukpa a suak hi. Tua lai-ah amah tawh mihing zali bang a om hi.

³ Tua lai mun panin Moab gam Mizpah-ah David a pai hi. Amah in Moab kumpipa kiangah, “Pasian in kei a dingin hong sepsak ding ka theih matengin ka nu le ka pa na kiangah hong omsak in, ci-in kong thum hi,” a ci hi.

⁴ Amah in Moab kumpipa kiangah amaute nusia a, munmuanhuaina sungah David a om sungteng amah tawh omkhawm uh hi.

⁵ Tua ciangin kamsangpa Gad in David kiangah, “Munmuanhuai sungah om nawn kei in; kihem inla, Judah gamah pai in,” a ci hi. Tua ahih ciangin David kihemkhia-in Hereth tulakah a pai hi.

Saul in Nob khua Siampite That

⁶ Tu-in David le amah tawh a om mite a kimuhna thu Saul in za hi. A khut sungah a teipi tawi-in, a nasemte khempeuh a kimkotah dingin Gibeah khua a sangna mun makeng kung nuai-ah Saul a tu hi.

⁷ Tua ciangin Saul in a kimkotah a ding a nasemte kiangah, “Tu-in za un, no Benjamin-te aw; Jessi’ tapa in note khempeuh’ lote le leenggui lote hong pia-in, note khempeuh a tul a uk, a za a ukin hong koih dingin um a,

⁸ note khempeuh in kei hong sawmsim na hi uh hiam? Tuni-a bangin hong pangsim dingin ka tapa in Jessi’ tapa tawh thukimna a bawl ciangin kuamah in kei kiangah hong pulak loin, ka tapa in keimah a do dingin ka nasempa a hanthotna-ah note kuamah dah loin, kei kiangah zong nong pulak kei uh hi,” a ci hi.

⁹ Tua ciangin Saul’ nasemte’ kiangah a ding, Edom mi Doeg in dawngin, “Ahitub’ tapa Amalek’ kiang, Nob khua-ah Jessi’ tapa a pai ka mu a,

¹⁰ amah in ama a dingin Topa’ tungah thu dotsakin, anletui pia a, Filistia mi Goliath’ namsau ama tungah pia hi,” a ci hi.

¹¹ Tua ciangin kumpipa in Ahitub’ tapa siampi Ahimelek le a pa’ innkuante ahi Nob-a om siampi khempeuh a sam dingin mi sawl a, kumpipa kiangah amaute khempeuh hong pai uh hi.

¹² Tua ciangin Saul in, “Ahitub’ tapa aw, tu-in za in,” a ci hi. Amah in dawngin, “Hih lai-ah om ing, topa aw,” a ci hi.

¹³ Tua ciangin Saul in ama kiangah, “Tuni-a bangin hong pangsimin kei a do dingin hong kipat theih nadingin bang hangin nang le Jessi’ tapa in kei hong sawmsim a, ama tungah an le namsau pia-in, ama a dingin Pasian kiangah thu dotsak na hi hiam?” a ci hi.

¹⁴ Tua ciangin Ahimelek in kumpipa dawngin, “Na nasemte khempeuh lak panin kumpipa’ makpa ahi nangmah hong cingte a ukpa David bangin kua thumanin, na inn sungah kua kipahtawi ahi hiam?

¹⁵ Ama a dingin Pasian’ kiangah thu ka dotsak a masa pen tuni ahi hiam? Hilo hi. Kumpipa in a nasempa ahi a, ka pa’ innkuante khempeuh ahi zongin ngawh kei in; bang hang hiam cih leh na nasempa in a tam hitaleh a tawm hitaleh hih thu khempeuh bangmah thei lo hi,” a ci hi.

¹⁶ Tua ciangin kumpipa in, “Ahimelek aw, nang le na pa’ innkuante na si taktak ding uh hi,” a ci hi.

¹⁷ Kumpipa in ama kiimah a ding a cingte kiangah, “Kihei unla Topa’ siampite that un; bang hang hiam cih leh amaute zong David tawh pangkhawm uh a, amaute in ama tailam thei napi-in kei kiangah hong pulak lo uh hi,” a ci hi. Ahih hangin kumpipa’ nasemte in Topa’ siampite tung a tu dingin a khut uh taangkhiasak lo uh hi.

¹⁸ Tua ciangin kumpipa in Doeg kiangah, “Kihei inla, siampite hih in,” a ci hi. Edom mi Doeg kihei-in siampite hih a, tua ni-in saihadial siampipuan a silh mihing sawmgiat le nga a that hi.

¹⁹ Amah in siampite’ khuapi Nob khua sunga om nuntakna a nei khempeuh numei le pasal, naupang le nawine, bawngtalte, late le tuute, namsau tawh a that khin hi.

²⁰ Ahih hangin Ahitub’ tapa Ahimelek’ tapate lakah Abiathar a kici khat suakta-in David kiangah a tai hi.

²¹ Saul in Topa’ siampite a thah khitna thu Abiathar in David kiangah a gen hi.

²² David in Abiathar kiangah, “Tua ni-in Doeg tua lai-ah om ahih ciangin Saul’ kiangah gen taktak ding hi, ci-in ka thei hi. Na pa’ innkuanpih mite khempeuh’ sihna ka piangsakkha hi.

²³ Kei tawh hong om in; lau kei in; bang hang hiam cih leh kei a that dingin a hong zongte in nang zong thah dingin a hong zong ahi hi; kei kiangah om lecin lungmuanna sunga om na hi ding hi,” a ci hi.