1 KHANG TANGTHU MASATE 9 - Tedim Bible

Babylon Panin Hong Ciahkikte

¹ Israel mi khempeuh khangsimna-ah kiciamteh a, Israel Kumpite’ Laibu sungah tuate kigelh hi. Amau thuman lohna hangin gimpiakna-in Babylon-ah salin Judah mite kipaipih hi.

² Tu-in amau’ neihsa amau’ khuapite sungah a tengkik masate pen Israel nautangte, siampite, Levi mite, le biakinn nasemte ahi uh hi.

³ Tua ciangin Judah, Benjamin, Efraim, le Manasseh mi pawlkhat Jerusalem-ah teng uh a, tua a tengte:

⁴ Judah tapa Perez’ tapate sung panin Bani’ tapa Imri, a tapa Omri, a tapa Ammihud, a tapa Uthai a makai ahi hi.

⁵ Tua ciangin Judah tapa Shelah mite sung panin: Innkuan lutang Asaiah a makai ahi hi.

⁶ Judah tapa Zerah mite sung panin: Jeuel a makai ahi hi. Judah minam sung panin innkuan zaguk le sawmkua ahi hi.

⁷ Benjamin mite sung panin: Hassenuah’ tapa Hodaviah, a tapa Meshullam, a tapa Sallu ahi hi.

⁸ Tua ciangin Jehoram’ tapa Ibneiah, Makri’ ta Uri, a tapa Elah, le Ibnijah’ ta Reuel, a tapa Shefatiah, a tapa Meshullam ahi hi.

⁹ Benjamin minamte sung panin innkuan zakua le sawmnga le guk ahi hi. Hih min kilote khempeuh pen amau’ beh ciatah beh lutangte ahi uh hi.

¹⁰ Siampite’ sung panin: Jedaiah, Jehoiarib, Jakhin,

¹¹ le Ahitub’ tapa Meraioth, a tapa Zadok, a tapa Meshullam, a tapa Hilkiah’ tapa Azariah, (Pasian’ biakinn sung a ukpipa)

¹² le Malkhijah’ tapa Pashhur, a tapa Jehoram’ tapa Adaiah, le Immer’ tapa Meshilemith, a tapa Meshullam, a tapa Jahzerah, a tapa Adiel’ tapa Maasai ahi hi.

¹³ Hihte banah amau’ behte, a beh lutangte, Pasian’ biakinn-ah nasep nadingin a siam mahmah mihing tulkhat le zasagih le sawmguk ahi hi.

¹⁴ Levi mite sung panin: Merari’ tapate sung pan Hashabiah, a tapa Azrikam, a tapa Hasshub’ tapa Shemaiah,

¹⁵ le Bakbakkar, Heresh, Galal, le Asaf’ tapa Zikri, a tapa Mika’ tapa Mattaniah,

¹⁶ le Jeduthun’ tapa Galal, a tapa Shemaiah’ tapa Obadiah, le Netofah khuaneute sungah a teng, Elkanah’ tapa Asa’ tapa Berekhiah ahi hi.

¹⁷ Kulhkongpi cingte: Shallum, Akkub, Talmon, le Ahiman hi a, Shallum pen amau’ makai pa ahi hi.

¹⁸ Tu dongin Kumpipa’ Kulhkongpi nisuahna lampangah a omte ahi uh hi. Hihte pen Levi mite’ omna kongcingte ahi ngei uh hi.

¹⁹ A pu a pate uh, biakbuk lutna mun a cing, Topa’ phual a ukte ahih uh mah bangin Korah’ tapa Ebiasaf, a tapa Kore’ tapa Shallum, le a behte ahi Korah mite pen nasepna a uk, puanbuk kong a cingte ahi uh hi.

²⁰ Eleazar’ tapa Finehas pen a beisa hun sungah amaute a ukpa hi a, Topa in amah ompih hi.

²¹ Meshelemiah’ tapa Zekhariah pen kikhopna puanbuk lutna-ah kongcing pa ahi hi.

²² Kongcingin a kiteel hih mite khempeuh zanih le sawm le nih ahi hi. Amaute pen a khuaneute uha khangsimna-ah kiciamteh uh hi. David le thumu pa Samuel in amau’ panmun-ah amaute phut hi.

²³ Tua ahih ciangin amaute le a suan a khakte uh Topa’ biakinn kulhkongpite a uk, a cingte ahi uh hi.

²⁴ Kongpi cingte pen a pang li, nisuahna, nitumna, leilu, le leitaw lamah om uh hi.

²⁵ Tua ciangin amau’ khuaneute sungah a om a behte uh hih mite tawh a om dingin a hun hunin ni sagih simin a hong pai ding uh a kisam ahi hi.

²⁶ Bang hang hiam cih leh Levi mi kongpi a cing ukpi lite pen biakinn sungte le Pasian’ biakinn van manpha koihnate a uk ahi uh hi.

²⁷ Pasian’ biakinn kiimah amaute giak uh hi; bang hang hiam cih leh amaute tungah vilna nasep, le zingsang simin kong a hon ding uh nasep kiguan hi.

²⁸ Amaute pawlkhat in biakinn sunga kizang umlebeelte uk uh hi; bang hang hiam cih leh tua nazatte hong kitumpih ciang hitaleh a kilakkhiat ciang hitaleh a malzah a sim ding uh kisam hi.

²⁹ Amau sung pan adang pawlkhatte pen tutphah sabuaite, le a kituam koih umlebeel, annelte, leenggahzute, sathaute, paknamtuite, le a namtui nate zong a en dingin kiseh hi.

³⁰ Siampite’ ta a dangte in a namtui nate hel dingin bawl uh a,

³¹ tua ciangin Levi mite lak pan Korah mi Shallum’ tacil Mattithiah in biakna ding moh pheengte bawl ding uk hi.

³² Kohath mi amau’ behte pawlkhat in zong Sabbath simin koih ding Ompihna Anlum uk uh hi.

³³ Tu-in hihte pen lasate, Levi mi beh lutangte, nasep dangte panin pengin biakinn deite sungah a tengte ahi uh hi. Bang hang hiam cih leh amaute in sun le zanin na sem uh hi.

³⁴ Hihte pen Jerusalem-ah a teng amau’ khang tawh kizui-in makaite, Levi mi beh lutangte ahi uh hi.

Saul’ Khangsimna

³⁵ Gibeon-ah tua khuapi a satpa Jeiel teng a, ama zi’ min Maakah hi-in,

³⁶ a tapa upa pen Abdon, tua ciangin Zur, Kish, Baal, Ner, Nadab,

³⁷ Gedor, Ahio, Zekhariah, le Mikloth ahi uh hi.

³⁸ Mikloth pen Shimeah’ pa ahi hi. Amau’ suanlekhakte zong Jerusalem-a a behte uh galkhatah a behte uh tawh teng uh hi.

³⁹ Ner pen Kish’ pa, Kish pen Saul’ pa ahi hi. Saul pen Jonathan, Makhishua, Abinadab, le Eshbaal’ pa ahi hi.

⁴⁰ Jonathan’ tapa Meribbaal hi a, Meribbaal pen Mikah’ pa ahi hi.

⁴¹ Mikah’ tapate: Pithon, Melek, Tahrea, le Ahaz ahi uh hi.

⁴² Ahaz pen Jarah’ pa hi a, Jarah pen Alemeth, Azmaveth, le Zimri’ pa ahi hi. Zimri pen Moza’ pa ahi hi.

⁴³ Moza pen Binea’ pa ahi hi. A tapa Refaiah, a tapa Eleasah, a tapa Azel ahi hi.

⁴⁴ Azel in tapa guk nei a, tuate’ min: Azrikam, Bokheru, Ishmael, Sheariah, Obadiah, le Hanan ahi uh hi. Hihte pen Azel’ tapate ahi uh hi.