1 KHANG TANGTHU MASATE 26 - Tedim Bible

Kongcingte le a Ukte

¹ Kongcingte a kisehkhenna hih bang ahi hi: Korah behte, Asaf’ innkuan sung panin Kore’ tapa Meshelemiah ahi hi.

² Meshelemiah’ tapate: Zekhariah a tacil, Jediael a nihna, Zebadiah a thumna, Jathniel a lina,

³ Elam a ngana, Jehohanan a gukna, Eliehoenai a sagihna ahi hi.

⁴ Obededom’ tapate: Shemaiah a tacil, Jehozabad a nihna, Joah a thumna, Sakar a lina, Nethanel a ngana,

⁵ Ammiel a gukna, Issakhar a sagihna, Peullethai a giatna ahi hi.

⁶ Ama tapa upa pen Shemaiah sung panin zong a beh sungah ukte ahi tapate a suak hi; bang hang hiam cih leh amaute pen siamna lian a nei mite ahi uh hi.

⁷ Shemaiah’ tapate: Othni, Refael, Obed, le a sanggamte siamna a nei ahi Elzabad, Elihu, le Shemakhiah ahi hi.

⁸ Hihte khempeuh pen Obededom’ tapate le amau’ tapate le a sanggamte uh tawh, nasep nadingin siamna a nei mi kician ahi uh hi. Obededom sung panin sawmguk le nih pha uh hi.

⁹ Meshelemiah in siamna a nei tapate le sanggamte, sawm le giat nei hi.

¹⁰ Merari innkuan sung panin Hosah’ tapate: Shimri a ukpi (amah tacil ahih loh hangin a pa in a ukpi-in amah bawl hi),

¹¹ Hilkiah a nihna, Tebaliah a thumna, Zekhariah a lina ahi hi. Hosah’ tapate le a sanggamte khempeuh sawm le thum a pha uh hi.

¹² Innkuan pasal lutangte pen kongcingte ahi uh hi. Amaute in a sanggamte uh tawh Topa’ biakinn sungah nasep nei uh hi.

¹³ Amaute in a neu a lian a kibangin a pate uh innkuankuanin amau’ kongpi cin ding ai san uh hi.

¹⁴ Nisuahna lama dingin ai, Shelemiah tungah tu hi. A tapa, a pil thulamlak pa Zekhariah a dingin zong ai san uh a, leilu lama dingin ai pha hi.

¹⁵ Obededom a dingin leitaw lamah hong suak a, a tapa tungah vankoihna inndei kipia hi.

¹⁶ Shuppim le Hosah a dingin lampi a paitohna, Shallekheth kongpi san, nitumna lamah kia hi. Galvil le galvil kimaituah uh hi.

¹⁷ Vankoihna inndei kongah nih nihin a om mah bangin nisimin nisuahna lamah guk omin, nisim mahin leitaw lamah li om hi.

¹⁸ Tua ciangin nitumna lama om lampi inn-a dingin a lampi-ah li omin a inn-ah nih om hi.

¹⁹ Hihte pen Korah mite le Merari’ tapate lakah kongcingte a kisehkhenna ahi hi.

²⁰ Tua ciangin Levi mite sung panin Ahijah in Pasian’ biakinn vanmanpha koihnate le a ki-ap letsong koihnate uk hi.

²¹ Gershon-te beh sung panin Ladan pen innkuan tampi a piankhiatna mi khat hi a, Jehiel innkuante zong ama sung panin a piang ahi hi.

²² Jehiel’ tapa Zetham le a sanggampa Joel in Topa’ biakinn vanmanpha koihnate uk uh hi.

²³ Amram mite, Izhar mite, Hebron mite, le Uzziel mite sung panin:

²⁴ Moses’ tapa Gershom-te beh sung panin Shebuel pen vanmanpha koihna a ukte lakah a ukpi ahi hi.

²⁵ Gershom’ sanggam Eliezer’ suan Shelomith tawh zong beh kinai ahi hi. Eliezer’ sung panin a tapa Rehabiah, a tapa Jeshaiah, a tapa Joram, a tapa Zikri, a tapa Shelomith ahi hi.

²⁶ Hih Shelomith le a sanggamte in, Kumpi David, beh lutangte, le a tultul le a zaza-a uk uliante, le galkap a ukte in a ap uh ahi, a ki-ap letsongte a kikoihna khempeuh uk uh hi.

²⁷ Gal sungah a ngah uh van kinusiate sung panin Topa’ biakinn puah nadingin amaute in letsongte ap uh hi.

²⁸ Thumu pa Samuel, Kish’ tapa Saul, Ner’ tapa Abner, le Zeruiah’ tapa Joab in a apsate khempeuh zong, a ki-ap letsong khempeuh Shelomith le a sanggamte’ kepna sungah om hi.

²⁹ Izhar mite sung panin Khenaniah le a tapate pen Israel a dingin uliante le thukhente-in a pualam nasepna-ah kiseh hi.

³⁰ Hebron mite sung panin Hashabiah le a sanggamte, siamna a nei mihing tulkhat le zasagih in Jordan nitumna lam Israel tungah Topa’ nasepna khempeuh le kumpipa’ nasepna-ah uk uh hi.

³¹ Hebron mite sung panin Jerijah a ukpi ahi hi. (David’ uk a kum sawmlina kumin kikantelna bawl uh a, Gilead gam sung Jazer-ah amaute sung panin siamna lian a nei mihing kimu hi.)

³² Kumpi David in Jerijah le a sanggamte, siamna a nei mihing tulnih le zasagih, a beh sungah lutang ahite pen Pasian tawh a kisai na khempeuh le kumpipa’ vaite-ah, Reuben mite, Gad mite, le Manasseh minam alangte tungah a uk dingin a seh hi.