1 KHANG TANGTHU MASATE 22 - Tedim Bible

¹ Tua ciangin David in, “Hih lai-ah Topa Pasian’ inn om ding a, hih lai-ah Israel mite’ meihal biakna tau om ding hi,” a ci hi.

Biakinn Ding David’ Kiginna

² Israel gam sunga om gamdang mite a kikaihkhop nadingun David in thu a pia hi. Tua ciangin amah in Pasian’ biakinn lam nadingin suangseeksate a bawl dingin suangseekte a koih hi.

³ David in kongpi kongkhak-a zat dingin siktukkilh le gak nadingin sik tampi koihin, teh zawh lohin sumngo tampi tak zong koih a,

⁴ taamtak singte simzawh hi lo hi; bang hang hiam cih leh Sidon khuamite le Taia khuamite in David kiangah taamtak tampi tak puak uh hi.

⁵ Bang hang hiam cih leh David in, “Ka tapa Solomon khangno-in pumpi tawh sinna om nai lo a, Topa a’ ding a kilam biakinn pen gam khempeuhah minthanna le pahtawina-ah a lian mahmah ding ahi hi. Tua ahih ciangin tua biakinn dingin keimah ka kigingkhol ding hi,” a ci hi. Tua ahih ciangin David in a sih ma-in na tampi tak koihkhol hi.

⁶ Tua ciangin amah in a tapa Solomon sam a, Israel Pasian, Topa a dingin biakinn khat a lam ding a gen hi.

⁷ David in Solomon kiangah, “Ka ta aw, Topa ka Pasian’ min dingin biakinn khat lam ding ka lungsimah om hi.

⁸ Ahih hangin kei’ tungah Topa’ thu hong tung a, ‘Nangmah in gal lianpipi tampi simin mi tampi na that hi. Nangmah in keima mai leitungah sisan tua zahta luangsak na hih manin ka min dingin biakinn na lam kei ding hi.

⁹ En in, nangma sung panin tapa khat hong piang ding a, amah pen lungnopna a nei mi hi ding hi. Keimah in a kimkota a galte khempeuh panin ama tungah lungnopna ka pia ding hi; bang hang hiam cih leh ama min Solomon hi ding a, ama hun sungin Israel tungah lungnopna le daihna ka pia ding hi.

¹⁰ Amah in keima min dingin biakinn khat lam ding hi. Amah ka tapa hi-in, kei, ama pa ka hi ding a, Israel sungah ama kumpi tokhom ka kipsak paisuak ding hi,’ hong ci hi.

¹¹ Tu-in ka ta aw, amah in nangma thu a gensa bangin Topa na Pasian’ biakinn na lamna-ah na tangtun theih nadingin Topa in nang hong ompih tahen.

¹² Amah in Israel tungah nang hong uksak ciangin Topa na Pasian’ thukham na zuih theih nadingin Topa in ngaihsut pilna le thutelna nang tungah hong pia tahen.

¹³ Tua ciangin Israel-te a dingin Topa in Moses a piak thukhamte le biakna ngeina kipte zuih ding na kidop nakleh na maavang ding hi. Thakhauh inla hang in. Lau kei inla lungkia kei in.

¹⁴ Nakpi taka hanciamna le gimna lianpi tawh Topa’ biakinn dingin kham talen tul zakhat, ngun talen awn khat, le tehzawh lohin sumngo le sik ka koih khinzo hi; bang hang hiam cih leh tam mahmah hi; sing le suang zong ka koihzo hi. Nangmah in hihte na behlap ding hi.

¹⁵ Nangmah in na a sem ding mi tampi na nei hi; suangseekte, leilesuang innlam siamte, khutsiamte, le simzawh lohin siamna nam khempeuh a nei,

¹⁶ kham, ngun, sumngo, le sik sep a siamte na nei ding hi. Kithawi inla sem in! Topa in nang hong ompih ta hen!” a ci hi.

¹⁷ Israel makaite khempeuh in zong a tapa Solomon a huhna ding David in thu pia a,

¹⁸ “Topa na Pasian uh note tawh hong om hi lo ahi hiam? Amah in na kiim khempeuh uhah lungnopna hong pia hi lo ahi hiam? Bang hang hiam cih leh amah in gam sunga teng mite keima khut sungah hong pia khin a, Topa le ama mite’ mai-ah gam sung khempeuh kinuaisiah hi.

¹⁹ Tu-in Topa na Pasian uh a zong dingin na ngaihsutna uh le na lungsim uh kipsak un. Topa’ min dingin a kilam biakinn sungah Topa’ Thuciamna Singkuang le Pasian’ umlebeel siangthote a kipaipih theih nadingin kithawi unla Topa Pasian’ biakinn lam un,” a ci hi.