1 KHANG TANGTHU MASATE 16 - Tedim Bible

¹ Tua ciangin amaute in Pasian’ Thuciamna Singkuang hong tumpih uh a, David in ama a dingin a lamsak puanbuk sungah koih uh hi. Tua ciangin amaute in meihal biaknate le thunuama biaknate Pasian’ mai-ah pia uh hi.

² David in meihal biaknate le thunuama a biaknate a piak a man khit ciangin amah in Topa’ min tawh mite thupha pia a,

³ Israel mi numei le pasal khempeuhte tungah anlum khat, sa bak khat, le leenggahkeu bek khat ciat a hawm hi.

⁴ Tua tham loin amah in Topa’ Thuciamna Singkuang mai-ah na semin thu a ngen ding, lungdamna a ko ding, le Israel Pasian, Topa a phat dingin Levi mite pawlkhat a seh hi.

⁵ Asaf a ukpi hi a, ama zomah Zekhariah ahi hi. Jeiel, Shemiramoth, Jehiel, Mattithiah, Eliab, Benaiah, Obededom, le Jeiel, harp lasaknate le laiza lasaknate a tum dingte ahi uh hi. Asaf in daltuahte a tum ding hi a,

⁶ siampite Benaiah le Jahaziel-te in Pasian’ Thuciamna Singkuang mai-ah peengkulte a tum paisuak ding uh ahi hi.

David’ Lungdam Kohna La

⁷ Tua ciangin tua ni-in David in Asaf le a Levi mipihte in Topa tungah hih bangin lungdamkohna la a sa dingin a seh masa hi:

⁸ Topa’ tungah lungdamna ko-in, ama min lo unla, ama septe khempeuh mite’ lakah kitheisak un!

⁹ Amah la sak un. Phatna la amah sak unla, a lamdang a septe khempeuh mite tungah gen un!

¹⁰ Ama min siangtho hangin nuamin diang unla, Topa a zong mite khempeuh lungdam ta uh hen!

¹¹ Topa le ama hatna zong unla, ama ompihna zong den un!

¹² A lamdang a nasepte phawk unla, a lamdang ama genkhiat a thukhennate phawk un,

¹³ no ama nasem Abraham’ suante, Jakob’ suante, ama teeltuamte aw!

¹⁴ Amah, eite’ Topa Pasian hi a, ama thupiaknate leitung khempeuh a’ ding ahi hi.

¹⁵ Amah in a thuciamna phawk tawntung hi. Khang tul khat-a dingin a thupiakna kammal,

¹⁶ Abraham tawh a thuciamna, Isaac tungah a khapna,

¹⁷ Jakob tungah thu ciamin, amah in a kipsak, Israel tungah tawntung thuciamna-in a kipsak,

¹⁸ “Nangma tungah Kanaan gam hong pia-in, gamhluahin na tanh dingin kong pia ding hi,” a cihte phawk tawntung hi.

¹⁹ Amaute a mi-in tawmin, gentaak loin peemta hi uh a,

²⁰ minam khat pan nam khatah vak kawikawi-in, kumpi gam khat pan gamdang khatah a pai lai-un,

²¹ amaute kuamah nengniamsak lo hi. Amaute’ hangin amah in kumpite taigawp a,

²² “Ka sathau nilhte lawng kei unla, ka kamsangte tungah siatna hih kei un!” ci hi.

²³ Leitung mi khempeuh aw, Topa la sak un! A ni ni-in ama hotkhiatna thu gengen un.

²⁴ Minam dangte lakah ama minthanna genkhia unla, a lamdang ama septe mi khempeuh lakah gen un!

²⁵ Bang hang hiam cih leh Topa lian mahmah a, nakpitakin phat ding ahi hi; pasian khempeuh sangin lamdang sakzawk ding ahi hi.

²⁶ Bang hang hiam cih leh minam dangte’ pasian-te milim hi lel a, ahih hangin Topa ahihleh vantungte a bawlpa ahi hi.

²⁷ Pahtawina le minliatna in amah umcih a, thahatna le lungdamna in amah kimkot hi.

²⁸ Leitung mi khempeuh aw, Topa theitel unla, Topa’ minthanna le a thahatna theitel un!

²⁹ Amah in a ngah ding a kilawm minthanna Topa’ tungah pia un. Biakna puak unla, ama mai-ah pai un! Biakna puan silhin Topa bia un.

³⁰ Leitung mi khempeuh aw, ama mai-ah ling un; hi hi, leitung kip mahmah a, kilok ngei lo ding hi.

³¹ Vantung kipak hen la, leitung lungdam ta hen; minam khempeuhte lakah, “Topa maang hi!” amaute in ci ta uh hen.

³² Tuipi le a sunga om khempeuh awng uh hen la, gamlak le a sunga om khempeuh lungdamin diang ta uh hen!

³³ Tua ciangin gamlak singte in lungdamna tawh Topa’ mai-ah la sa ding uh hi; bang hang hiam cih leh leitung thu khen dingin amah hong pai hi.

³⁴ Amah hoih ahih manin Topa’ tungah lungdamna ko un; bang hang hiam cih leh ama itna kip a tawntungin a kho hi!

³⁵ “Kote hong khahkhia in, kote hong honkhia Pasian aw, minam dangte lak panin kote hong kaikhawm in. Na min siangtho tungah lungdam kong koh theih nading uh le, nangmah phatna-ah ka minthan nadingun kote hong hon in.

³⁶ Israel Pasian, Topa in thupha ngah ta hen, a tawntung pan a tawntung dongin!” zong ci lai un, a ci hi. Tua ciangin mi khempeuh in, “Amen!” ci-in Topa a phat uh hi.

Thuciamna Singkuang a dingin Levi Mite Kiseh

³⁷ Tua ahih ciangin David in nisima a kisam bangin Thuciamna Singkuang mai-ah na a sem tawntung dingin Asaf le a Levi mipihte Topa’ Thuciamna Singkuang mai-ah nusia a,

³⁸ Obededom le a behte sawmguk le giatte zong a nusia hi. Jeduthun’ tapa Obededom le Hosah-te pen kongpi cing dingte ahi uh hi.

^39-40 Tua ciangin amah in Topa’ thukham sungah a kigelh ama thupiak khempeuh bangin, zingsang le nitakin meihal biakna tau tungah Topa a dingin meihal biaknate a pia tawntung dingin, Gibeon-a om mual dawna Topa’ biakbuk mai-ah siampi Zadok le a sanggam siampite a nusia hi.

⁴¹ Tuate’ banah amaute tawh Heman le Jeduthun zong om a, ama itna kip kho tawntung ahih manin Topa’ tungah lungdamna a ko dingin a kiteel, a minin a kilokhia midang omlai hi.

⁴² Heman le Jeduthun inla aw dingin peengkulte le daltuahte nei uh a, biakna lasak nadingin lasakna nate nei uh hi. Jeduthun’ tapate kulhkongpi cing dingin kiseh hi.

⁴³ Tua ciangin mi khempeuh a inn ciat uhah ciah uh a, David zong a innkuante thupha a pia dingin a inn-ah a ciah hi.