1 కొరింథీ 16 - తెలుగు సమకాలీన అనువాదము

ప్రభువు ప్రజల కొరకు కానుక సేకరించుట

¹ ప్రభువు ప్రజలకు కానుక ప్రోగుచేయడం గురించి: గలతీయలోని సంఘాలకు నేను ఏమి చేయమని చెప్పానో మీరు కూడా అది చేయాలి.

² ప్రతి వారంలో మొదటి రోజున మీలో ప్రతి ఒక్కరు తాము సంపాదించిన దానికి అనుగుణంగా కొంత ధనాన్ని ప్రక్కన పెట్టి దాచి ఉంచండి. దానివల్ల నేను వచ్చినపుడు కానుకలు సేకరించాల్సిన అవసరం ఉండదు.

³ నేను వచ్చిన తరువాత, మీరు ఆమోదించిన వారికి నేను పరిచయ పత్రికలను ఇచ్చి, మీ కానుకలతో వారిని యెరూషలేముకు పంపుతాను.

⁴ నేను కూడా వెళ్ళడం అవసరం అయితే, వారు నా వెంట వస్తారు.

వ్యక్తిగత విజ్ఞాపనలు

⁵ నేను మాసిదోనియాకు వెళ్లాలని అనుకుంటున్నాను గనుక మాసిదోనియాకు వెళ్ళినపుడు మీ దగ్గరకు వస్తాను.

⁶ బహుశ మీతో కొంత కాలం గడుపుతాను లేదా చలికాలమంత ఉండవచ్చు, అప్పుడు నేను ఎక్కడికి వెళ్తానో, నా ప్రయాణంలో మీరు నాకు సహాయం చేయగలరు.

⁷ మార్గమధ్యలో మిమ్మల్ని చూసి వెంటనే వెళ్ళిపోవాలని నేను అనుకోవడం లేదు. ప్రభువు అనుమతిస్తే మీతో కొంత కాలం గడపాలని అనుకుంటున్నాను.

⁸ అయితే పెంతెకొస్తు దినం వరకు ఎఫెసులోనే ఉంటాను.

⁹ ఎందుకంటే చాలామంది నన్ను వ్యతిరేకించినా, ఫలవంతమైన పని చేయడానికి ఒక గొప్ప ద్వారం నాకు తెరవబడింది.

¹⁰ తిమోతి వచ్చినప్పుడు, అతడు మీతో నిర్భయంగా ఉండేలా చూడండి. నాలాగే అతడు కూడా ప్రభువు పని చేస్తున్నాడు.

¹¹ కనుక ఎవరూ అతని పట్ల నిర్లక్ష్యంగా ప్రవర్తించవద్దు. అతడు నా దగ్గరకు తిరిగివచ్చునట్లు అతన్ని సమాధానంగా తన మార్గంలో పంపించండి. అతడు సహోదరులతో పాటు వస్తాడని నేను ఎదురు చూస్తున్నాను.

¹² మన సహోదరుడైన అపొల్లో విషయం ఏంటంటే: సహోదరులతో పాటు మీ దగ్గరకు వెళ్ళమని అతన్ని నేను చాలా బ్రతిమాలాను. కాని ఇప్పుడే బయలుదేరడం అతనికి ఏ మాత్రం ఇష్టం లేదు. అయితే సరియైన అవకాశం లభించినపుడు అతడు వస్తాడు.

¹³ మెలకువగా ఉండండి; విశ్వాసంలో నిలకడగా ఉండండి; ధైర్యం కలిగి బలవంతులై ఉండండి.

¹⁴ ప్రేమ పూర్వకంగా అన్నిపనులు చేయండి.

¹⁵ స్తెఫను అతని ఇంటి వారు అకయలో మొదటిగా క్రీస్తును స్వీకరించారని మీకు తెలుసు. వారు దేవుని ప్రజల సేవకు తమను తాము అర్పించుకున్నారు. సహోదరీ సహోదరులారా, మిమ్మల్ని బ్రతిమాలుతున్నాను,

¹⁶ అలాంటి వారికి, వారితో పాటు పని చేసి సేవ చేసేవారికి మీరు లోబడి ఉండండి.

¹⁷ స్తెఫను, ఫొర్మూనాతు మరియు అకాయికు అనేవారు రావడం నాకు సంతోషం ఎందుకంటే మీరు లేని కొరత వారు నాకు తీర్చారు.

¹⁸ నా ఆత్మకు, మీ ఆత్మకు కూడా వారు నూతన ఉత్తేజం కలిగించారు. అలాంటివారు గౌరవించదగినవారు.

చివరి అభినందనలు

¹⁹ ఆసియా ప్రాంతంలోని సంఘాలు మీకు తమ అభినందనలు పంపుతున్నారు. అకుల, ప్రిస్కిల్ల అనేవారు, వారి ఇంట్లో సమావేశమయ్యే సంఘం మీకు ప్రభువులో హృదయపూర్వక అభినందనలు పంపుతున్నారు,

²⁰ ఇక్కడి సహోదరీ సహోదరులందరు మీకు అభినందనలు పంపుతున్నారు. పవిత్రమైన ముద్దు పెట్టుకొని ఒకరిని ఒకరు అభినందనలు తెలుపుకోండి.

²¹ పౌలు అను నేను నా స్వహస్తంతో ఈ శుభములు వ్రాస్తున్నాను.

²² ప్రభువును ప్రేమించనివారు శపింపబడును గాక! ప్రభువా రమ్ము!

²³ ప్రభువైన యేసు కృప మీతో ఉండును గాక.

²⁴ క్రీస్తు యేసులో మీ అందరికి నా ప్రేమను తెలియజేస్తున్నాను. ఆమేన్.