Yuɖa 1 - ONUGBÙ NYƐNYÃ VUVƆ

¹ Yuɖa, Yesu Kristo axwɛdɛ anɛ Yakobo yɛadzya, Kɔ bagɛ be kulu, gɛ Kpaya Aka nɛ aɖɔ klɛ Yesu Kristo anyɛna evunɔ:

² Eshutukubui didi, ishuyuyɔ anɛ tɛɖuɖɔ dzi wɔnɔɛ yɛ nɛ tɛkpikpe mɛ.

Bagɛ Kpaya Ama Balɛm Nɛ Ɔmunɔdudɔ

³ Ɛbhɛyalɛ dzyɔgo mɔ, kɛnyalɛ kɛlɛ mɛ sɛ ɛtrɔ gɛganɛɛ sɛ tɛ ɛŋlɔmɛ kɔ nɔ denɔ tɛyɛyɛkɛkɔ nɛ gɛ bu mɔ nɛ shu, ɛmɔ nɛ mɛ ishum sɛ alasɛ tɛ ɛŋlɔmɛ tɛ ɛyɛkɔ tsre nɔ sɛ tɛ nɔ wɛlãnkɛ kɔ tɛyɛyɛkɛŋa nɛ gɛ ba yɛkɔ nɛ kibe tirikpo mɛ petee akpɛ kpayabanɔ nɛ ahwɛ.

⁴ Alasɛ banɔ teli gɛ be bu kɛpɔ pɛ ba ŋlɔmɛ kɛdɔ nɛ balɛ shu kukuku, ba ga tɛkpukpu mɛ ashɔku wɔnɔɛ shi. Be nu banɔ gɛ kpaya ama balɛ mɛ, gɛ be tsyina Kpaya ɛyamyuyɔ nɛ edzi kidzokukɔ kɔ azhuzhɔlɛbui bhɛbhɛtɛ klɛ ba dɛ yɛkɛ Yesu Kristo bulɔ Ishuahwɛzɛza anɛ Apalete terikpo.

⁵ Kɛnya lɛ kɛlɛ mɛ sɛ no nyi kibui nɛ petee kukuku, ɛpɛ sɛ tɛ ɛbaka wɔnɔ sɛ Apalete nɛ ebu yɛanɔalɛ nɛ ekoeyi nɛ Egypte, pɔ nɛ kɛlɛede nɛɛ eyi bagɛ ba dɛ yɛkɛaŋa.

⁶ Klɛ kpayaxwɛdɛ nɛ gɛ ba dɛ nyɛna balɛ kabhaŋɛŋa ɛzakɔ nɛm evunɔ pɔ pɛ ba shɛnahwɛ balɛ nahwɛ bapa nɛ shu—balɛlɛ nɛ evu akpɛ otumu mɛ, gɛ akpɛ buɖɛ gɛ ba za vɛnɔ xũii kɔ kebhuikuklu nɛ Kiwigbla nɛa bha.

⁷ Nɛ kidzoe lɛlɛ nɛɛ dia bha, Soɖom anɛ Gomora anɛ ɛma nɛ gɛ kana lɛ na yɛkɔ balɛ shu akɔ azhuzhɔlɛbui anɛ buzizi. Be dzi ansɛ tɛdidibhɛtɛ kɔ bagɛ ba mɔ kifu mabeke mabeke mɛ batɔ tɛtɛtɛta.

⁸ Nɛ kidzoe lɛlɛ nɛ dia bha, bagɛ ba za balɛla anɛ bagɛ etutru balɛ nahwɛ shu, ba taa yɛkɛ ɔshã klɛ bee zi owũsise banɔnɛna nɛ shu.

⁹ Pɔ kpayaxwɛdɛgbla Mayɛkɛl tsyɛ, gɛ aza wũlankɛ bui nɛ ɔfufɔɛkpã denɔ Mose ishupi nɛ shu, adɛ bhɛtɛ edi asɛ ayɛkɔ ishuzizi kititilulɔ nɛ yɛ shu, pɔ aɖɔ asɛ, “Apalete nɛ etsrenɛ wɔ!”

¹⁰ Tsyɛ pɛ banɔa nɛ baa ɖɔ akulatua ayɛkɔ alɔ kititi nɛ kibuinyɛbui di gɛ be di nu kɛlɛesi nɛ shu; nɛ ebui nɛ gɛ be nu alɛesi ganɔ ishuidzyam, ansɛ baga gɛ be tee ti—ebuia nɛɛ di nɛ alɛ eezi balɛ.

¹¹ Butɔ kɔ alɛ! Ba tɛ yɛkɔ Kayɛ̃ dzo; be ti si akɔ ɔŋa mumɔ nɛ Balaam kito ebui nɛ gɛ abhɛtɛ nɛ mɛ; be ti zi alɛ nɛ Kɔra kititilulɔ nɛɛ di mɛ.

¹² Banɔa nɛ be nu kibo nɛ wɔ anɔɛbui dɛdɛmɛ kɛdɔŋakɔ, ba ŋa kɛdɔ nɛ wɔ nɛ kibui bhli kanyaka mamɔ mamɔ—baga agbɛgbanɔ gɛ ba nyunɔ balɛ shu tite. Be nu ɛmunɔ gɛ tɛ dɔ subha, gɛ kɛlɛɛ fu flanɔ; ɛkɔpɔɛfube besi, gɛ eyuyu ama ɛlɛm, klɛ la kpa ɛlɛ nɛ igu—lɛ tsi etsi tabha.

¹³ Be nu axuiabha alɛɛ gɛganɛ, bee bu balɛ kɛwɛ̃fɔ; awũwɛ gɛ aanyɔ afla, gɛ ba bala otumu tutu dɛ nɛ akɔ denɔ ɔtsɔ̃ nɛ ɔvɛnɔ.

¹⁴ Ɛnɔkɛ, egigenemi denɔ Aɖamu abha, aɖɔɛbuielu denɔ banɔa nɛ shu asɛ: “Di, Apalete nɛ aaba nɛ yɛ banɔ nɛ gɛ balɛ shu bhui nɛ akpã akpã mɛ

¹⁵ tɛ le be kulu kebhui nɛ anɔnyanɔ, tɛ ba kpɛ bagɛ ba ma nɛ kpaya nɛ petee bevu nɛ balɛ kpayam mazamaza ebui nɛ gɛ ba bhɛtɛ nɛ shu, anɛ onugbutsɔa ɖɔ nɛ gɛ kpayam maza maza banɔ zizi nɛ ba tɛ ɖɔ nɛ kititilulɔm nɛ yɛ shu.”

¹⁶ Banɔa be nu banɔ gɛ bee tsi ishu klɛ bee bu buzizi akɔa nɔ; ba lɛ balɛnahwɛ butsutsɔmɔ pɛpɛ nɛede; bee feke ishu klɛ baa kpɛ banɔ bhlatɔ nɛ bugã, kɔ balɛ nahwɛ kɛdzyɔgo mumɔ.

Tɛkukulu Kɔ Kanyɛtsitsi

¹⁷ Pɔ, ɛbhɛalɛ dzyɔgo mɔ, nɔ baka kɛgɛ bulɔ Apalete Yesu Kristo banɔkpɛkpɛ nɛ ba ɖɔ eputɔnɔ.

¹⁸ Be tsre nɔ asɛ, “Nɛ ebe gɔgɔɛ nɛ mɛ bagɛ ba kpɛ anɔ tsɔ ba ba za balɛ nahwɛ kpayamɛ mazamaza kɛdɔ tɛpɛpɛɛe de.”

¹⁹ Balɛ enu banɔ nɛ gɛ aba pɔɛ nɔɛ shi, gɛ baa tɔ nɔ kanɔa nɛm ishumɛ ebuie de klɛ Ɔfufɔɛ nɛ ɔma balɛ ahwɛ.

²⁰ Pɔ wɔnɔ, ɛbhɛyalɛ dzyɔgo mɔ, nɔ bhɔ wɔnɔ shu ɔtrɔ nɛ wɔnɔ tɛyɛyɛkɛŋa nɛna dɛ nɛm tɛ no kulukpaya nɛ Ɔfufɔɛ Dzyɔgo nɛm.

²¹ Nɔ nyɛna wɔnɔ shu ɔkpɛ Kpaya anɔ ɖuɖɔm nɛ kibe lɛ mɛ gɛ no dzi ozo po ApaleteYesu Kristo eshutukubui didi sɛ tɛ amɛna nɔ kɔ ɛkpã gɛ tɛ ba beke di.

²² Di bagɛ ba taa yɛkɛ aŋa nɛ eshutukubui;

²³ wũlankɛ banɔ bhlatɔ obu nɛ kifu nɛ mɛ tɛ ɔyɛkɛ kɔ alɛ; kɔ babhlatɔ nɛɛ di alɛ eshutukubui, gɛ be yuku nɛ kifu—ba dɛ pɛɛ apɔtɛ nɛ gɛ eyuku nɛ kibo ganɔ ishuidzya zizi mɛ.

Kabhakpɛkpɛ Kpayakukulu

²⁴ Kɔ anɔ nɛ gɛ anyɛna wɔnɔ evunɔ sɛ nɔ tɛ bɔ wɔlɛ klɛ tɛ ayɛkɔ nɔ akpɛ ahwɛ nɛ yɛ tɛzɛzamɔmɔ amɛ, butsutsɔmɔ maza kɛlɛ mɛ anɛ samemumɔ gbla—

²⁵ ishubhubhui, bukusi, kemi anɛ kabhaŋɛŋa kɔ Kpaya terikpo bulɔ Ayɛyɛkɛkɔ, ganɔ Yesu Kristo bulɔ Apalete, kɔ ebe nɛ petee, denɔ ɔtsɔ̃ ɔvɛnɔ mabeke mabekem! Tɛlɛbɛlɛm.