Yohanɛsɛ 4 - ONUGBÙ NYƐNYÃ VUVƆ

Yesu Aɖɔaɖɔ Nɛ̀ Samaria Adzyɛ Teli

¹ Farisianɛ be nu asɛ Yesu aŋɛabha klɛ akpɛ buni kɔ baxwɛdɛ gelee dɛ Yohanɛsɛ,

² nɛ kɛlɛmɛ kɛgbɛagba sɛ anɛ Yesu yɛ akpɛ buni kɔ banɔ pɔ yɛ badɔkpasɛ.

³ Gɛ Apalete enu ebuia nɛ, ashɛ̃ nɛ Yuɖea klɛ aza etsodzi avɛ Galelia.

⁴ Ɔtsɔnɛ alasɛ tɛ ada ga Samaria.

⁵ Kɛlɛso aba ɔma toli nɛ Samaria gɛ be klu sɛ Sitsya, gɛ lotsobunɔ kɛsukpa tieli gɛ Yakobo akɔ yɛ eyi Yosɛfu.

⁶ Yakobo buniozi za ɔkɛlɛ, klɛ Yesu, atɔ nɛ kidzo nɛ gɛ aga so ada za buniozi nɛɔbha. Aba za anasɛ kemuze ɛɖa lɔfɔnɛtɛabha mɛ.

⁷ Kibelɛlɛ Samaria adzɛ teli aba sɛ tɛ ebe shui buni, Yesu aɖɔ tsre asɛ, “Ɔtɔkɔmɛ buni bɔɛ tɛ ɛwɔɛ?”

⁸ (Yesu badɔkpasɛ ba tɛ vɛ ɔma nɛ mɛ sɛ tɛ be de dzi kɛdɔ ŋɛŋa.)

⁹ Samaria adzɛ etsre yɛ asɛ, “Yuɖaeyi wɔ nu klɛ mɛ ɛnu Samaria adzɛ. Kɛlɛ kɛbaza sɛ tɛ obisi mɛ buni wuwɔɛ?” (Alasɛ Yuɖanɛ nɛ Samarianɛ batɛ bhɛtɛ kidɔ tirikpo.)

¹⁰ Yesu ebuilɛnu kɔ adze nɛ asɛ. “Ɔtɔsɛ onyi Kpaya dɔ kukɔ klɛ agɛ yɛ bisi wɔ buni wuwɔɛ, wɔ ɔtɔ bisi yɛ klɛ ata kɔ wɔ ɛkpa buni.”

¹¹ Adzɛ nɛ aɖɔ sɛ, “Apalete, kɛdɔnyɛdɔ ma wɔ ahwɛ gɛ ɔbɔ yɛkɔ oshui buni nɛ nɔ klɛ kizi nɛ dzu. Fakɔ ɔbɔ dɛnɔ ɛkpã ni nɛ?

¹² Wɔ otri dɛ bulɔ aka Yakobo, gɛ yɛ akɔ lɔ kizi klɛ yɛnahwɛ awɔ̃ɛ buni denɔ kɛlɛ mɛ, klɛ ye yialɛ nɛ̀ yɛ baga nɛ banɔ nɛ gɛ be di baga nɛabha?”

¹³ Yesu ebuilɛnu asɛ, “Anɔnyanɔ gɛ awɔ̃ɛ buni nɛ oniwɛ nɔ ziɔ ta yɛ,

¹⁴ pɔ anɔ nɛ gɛ awɔ̃ɛ buni gɛ ɛba kɔ yɛ oniwɛ ɔtɛɔ ta yɛ. Kɛgbɛagba, buni nɛ gɛ ɛba kɔ yɛ bu badzi buni tɛtade tisimɛ gɛ bu baza yɛ shu mɛ ɔdɔtɔnɔ ɛkpã mabeke mabeke mɛ.”

¹⁵ Adzɛ nɛ aɖɔ tsre yɛ asɛ, “Apalete, kɔ mɛ buniu nɛ sɛ tɛ oniwɛ tɔta mɛ tɛ ɛfla zɛ ba ɔkɛ nɛ tɛ ɛba shu ni.”

¹⁶ Yesu etsre yɛ asɛ, “Vɛ, odo klu wɔenyine tɛ otsodzi ɔba.”

¹⁷ Adzɛ nɛ aɖɔ sɛ, “Anyɛ ama mɛahwɛ.” Yesu etsre yɛ asɛ, “Kɛlɛ mɛ bhui ɔɖɔ sɛ anyɛ ama wɔahwɛ.

¹⁸ Kɛgbɛagba kɛlɛ nu sɛ, ɔtɛ zanɔ banyɛ tieti, klɛ agɛ alɛ wɔ ahwɛ ɔtsɔ̃nɛ edinu wɔ enyine. Kibui nɛ gɛ ɔɖɔ ɔtsɔ̃nɛ kɛgbɛagba lɛ nu.”

¹⁹ Adzɛ nɛ aɖɔ sɛ, “Apalete,” “Ɛmɔ sɛ atɔnu anɔ wɔ onu.

²⁰ Bulɔ akalɛ ba sɔlɛ nɛ butu nɛabha, pɔ wunɔ Yuɖanɛ nɔ yɛ kɔ sɛ ɔkɛlɛ gɛ bu ba sɔlɛ ɔlɛ nu Yerusalɛm.”

²¹ Yesu ebuaɖɔ asɛ, “Yɛkɛ mɛabha ŋa, adzɛ, kibe tili ba gɛ ɔbɔ kpɛ kɛtɔkpuesi kɔ Aka ganɛ butu nɛabha ɔdɔgɔsɛ Yerusalɛm.

²² Wunɔ Samarianɛ nɔ sɔlɛ kɔ kɛdɔnɔ gɛ nɔ ti nyi, bulɔ bu nyi anɔ nɛ gɛ bu sɔlɛ kɔ, alasɛ tɛyɛyɛkɛkɔ de Yuɖanɛ nɛ mɛ.

²³ Pɔ kibe tili ba, klɛ ɔtsɔ̃ nɛ kɛ tɛ ba gɛ kɛgbɛagba basɔlɛsɔlɛ ba basɔlɛ kɔ Aka nɛ̀ ɔfufɔɛ nɛ̀ kɛgbɛagba mɛ, alasɛ balɛ nu basɔlɛsɔlɛ anɛɛ di gɛ Aka na pɛɛ.

²⁴ Kpaya enu ɔfufɔɛ, klɛ yɛ basɔlɛsɔlɛ basɔlɛ nɛ́ ɔfufɔɛ nɛ̀ kɛgbɛagba mɛ.”

²⁵ Adzɛ nɛ aɖɔ sɛ, “Ɛnyi Mezaya alɛlɛ (beklu sɛ Kristo) aaba. Kibelɛlɛ nɛ gɛ aba, ebe bu kibuinyɛbui esi kɔ lɔ.”

²⁶ Kɛlɛ Yesu ebuɖɔ asɛ, “Mɛ gɛ ɛɖɔaɖɔ kɔ wɔ mɛ nu yɛ.”

Badɔkpasɛ Betsodzi Avɛ Yesu Ɔbha

²⁷ Kibe dɛdze yɛ badɔkpasɛ be tsodzi avɛ yɛ ɔbha, klɛ kɛbhɛtɛ alɛ bi sɛ ba mɔ yɛ aɖɔɛaɖɔ nɛ adzɛ. Pɔ anɔnyanɔ edi bisi asɛ, “Kide wɔ pɛɛ?” pɛnɔ “Kideso gɛ ɔɖɔaɖɔ nɛ yɛ?”

²⁸ Ɔkɛlɛ, adzɛ nɛ ashɛ̃ alɔ yɛ bunietsukpu, etsodzi avɛ ɔma nɛ mɛ klɛ ada ɖɔ tsre banɔ asɛ,

²⁹ “Nɔ ba, tɛ nɔ bɔ di anɔ gɛ etsre mɛ ebui nɛ petee gɛ ɛtɛ bhɛtɛ di. Yɛ ebe dzi Kristo?”

³⁰ Be koeyi nɛ ɔma nɛ mɛ klɛ ba tɔnɛ balɛ dzo avɛ yɛ ɔbha.

³¹ Kibelɛlɛ yɛ badɔkpasɛ nɛ tsre yɛ asɛ, “Adɔkasɛ, pɛɛ kɛdɔ tili ɔŋa.”

³² Pɔ etsre alɛ sɛ, “Kɛ dɔ ŋɛŋa lɛ mahwɛ gɛ noti nyi buinyɛbui denɔ lɛ shu.”

³³ Kɛlɛ yɛ badɔkpasɛ baɖɔ tsre ɔhaglɔ asɛ, “Kɛbadzi sɛ anɔ teli atɛ mɛna yɛ kɛdɔŋɛŋa?”

³⁴ Yesu aɖɔ asɛ, “Mɛ dɔŋɛŋa, ” kɛlɛ nu sɛ “tɛ ebhɛtɛ trɔ agɛ akpɛ mɛ nɛ tɛpɛpɛɛ abha klɛ tɛ ɛwa yɛ axwɛ nɛ beke.

³⁵ Anɛ buɖɔ wɔ ɖɔ sɛ, ‘Woele tɛalɛ̃ yɛ agɔ klɛ tɛ be buidɔ’? Itsre nɔ sɛ, nɔ danɛ awɔ̃hu tɛ no di baya nɛ mɛ! Kɛdɔ nɛ zhi kɔ kɛlɛ tɛbubu.

³⁶ Ɔtsɔnɛ kuratsyɛ agɛ ebebuidɔ atɛ yɛkɛ yɛ bhɛ, eti xogo yɛ dɔ kɔ ɛkpã mabekemabeke, sɛ tɛ ayadɛ nɛ̀ be bubu ba ba mɔ same tsu.

³⁷ Kɛlɛ kibuiɖɛɖɔ tili sɛ, ‘Anɔ teli aɖa klɛ abhlatɔ ebu’ kɛ gbɛagba lɛ nu.

³⁸ Ɛkpɛ nɔ sɛ no do buidɔ nɛ kɛ gɛ nɔ dɛ wa yɛ xwɛ kɔ. Banɔ teli ba waɛxwɛ gɛganɛ, klɛ wunɔ dɔ bu balɛdɔ gɛ ba ba mɔ.”

Samarianɛ Gelee Bayɛkɛŋa

³⁹ Samarianɛ gelee nɛ ɔma nɛ mɛ ba yɛkɛ Yesu yɛ abhaŋa alasɛ adzɛ nɛ ebuimɔɖɔ so, “Etsre mɛ kɛdɔnyɛdɔ gɛ ɛtɛ bhɛtɛ di.”

⁴⁰ Kɛlɛso gɛ Samarianɛ ba ba yɛ ɔbha, bapɛɛ denɔ yɛ ahwɛmɛ sɛ aza balɛ ɔbha, klɛ aza balɛ ɔbha ewui tabha.

⁴¹ Klɛ nɛ ebuianɛ so, banɔ gelee ba bedzi bayɛyɛkɛŋa.

⁴² Be tsre adzɛ nɛ asɛ, “Bu dɛ yɛkɛŋa sɛ wɔa ɖɔɖɛɖɔ nɛ so, ɔtsɔnɛ bulɔnahwɛ bu nu kɔ shu, klɛ bu ti sɛ kɛgbɛagba anɔanɛ enu Ebhubhuiyɛkɛ nɛ́ kanɔ nɛ mɛ.”

Yesu Ebu Bunya Nɛ Otugbanɔ Yeyi Mɛ

⁴³ Nɛ ewui tabha nɛede ashɛ̃ avɛ Galelia.

⁴⁴ (Ɔtsɔnɛ Yesu nahwɛ ebuaɖɔ sɛ atɔnu atɛ yɛkɛ kabhakpɛkpɛ nɛ yɛnahwɛ ɔma mɛ.)

⁴⁵ Gɛ edeku Galelia, Galelianɛ ba yɛkɛ yɛ mɔmɔ. Ba mɔ kɛdɔ nɛ petee gɛ ahbɛtɛ nɛ Yerusalɛm nɛ Tɛfɛfla Kiwuiŋɛŋa nɛabha alasɛ balɛ tsyɛ ba za ɔkɛlɛ.

⁴⁶ Bubhla Yesu etsodzi avɛ Kana nɛ Galelia, ɔkɛlɛ gɛ etsyina buni budzi bulu. Klɛ ɔkɛlɛ ɔma ekusi otugbanɔ teli yɛ yi adɔ bunya nɛ Kapɛnum.

⁴⁷ Gɛ anyɛa nɛ enu asɛ Yesu ede Yuɖea aba Galelia, avɛ yɛ ɔbha klɛ ada kpɛ kɛtɔkpuesi kɔ yɛ sɛ ebe beke yɛ eyi nɛ bunya nɛ akɔ yɛ, gɛ eku butsie dunu.

⁴⁸ Yesu etsre ye asɛ, “Odi nu sɛ nɔ mɔ ebui nɛ gɛ eyinɔanɔ anɛ ebui gɛ abhɛtɛbi, nɔ tɛ bɔ yɛkɛŋa.”

⁴⁹ Ekusiahu anɔ aɖɔ sɛ, “Apalete, zhi ba flogo tɛ mɛ yi nɛ ebe tsi.”

⁵⁰ Yesu ebuilɛnu asɛ, “Shɛ̃ fãa, wɔe yi nɛ aba za nɛ kpã.” Anyɛ na yɛkɛ Yesu kibui nɛabhaŋa klɛ ashɛ̃.

⁵¹ Gɛ anyɛ nɛ akalɛ kidzonɛmɛ avɛ, yɛ axwɛdɛ atsyanɛ yɛ nɛ kibui nɛ gɛ ba nɛ shu sɛ yɛ yianyɛ alɛ nɛkpã.

⁵² Gɛ ebisi kibe gɛ bunya nɛ tsɛ nɛ ye yi nɛabha, be tsre yɛ asɛ, “Buwui nya nɛ tsɛ nɛabha kivu kemuze gɛ bafla nɛ ɔɖa torikpo mɛ.”

⁵³ Ɔkɛlɛ aka abaka sɛ kibelɛlɛ Yesu etsre yɛ asɛ, “Wɔeyi aba za nɛkpã.” Ɔkɛlɛ yɛ anɛ yɛ bupa mɛ banɔ petee ba yɛkɛ aŋa.

⁵⁴ Kɛnɛ kɛlɛ nu kibuiyinanɔ dɔ mumɔ bhla gɛ Yesu abhɛtɛ, gɛ ede Yuɖea aba Galelia.