Yohanɛsɛ 3 - ONUGBÙ NYƐNYÃ VUVƆ

Yesu Akasɛ Nikodemosɛ Kɛdɔ

¹ Ɔtsɔnɛ anyɛ teli gɛ enu Farisi eyi, yɛ nyi kɛlɛnu Nikodemosɛ, alɛ Yuɖanɛ bamani nɛ shi.

² Aba Yesu ɔbha elishi teli klɛ aɖɔ sɛ, “Rabbi, bunyi sɛ wɔnu adɔkasɛ gɛ ede Kpaya kɔ. Alasɛ anɔnyanɔ atɛ bana ebuiyinɔanɔ kɛdɔmumɔ nɛ gɛ ɔbhɛtɛ nɛ abhɛtɛ, onugɛ Kpaya ama plɛnɔ yɛ.”

³ Nɛ kɛlɛesi bubu Yesu ebuaɖɔ sɛ, “Itsre wɔ gbɛagba sɛ, anɔnyanɔ atɛ ba mɔ Kpaya Bukusiɔŋakɔ nedi odunu sɛ be tsodzinɛ yɛ amɔ́.”

⁴ Nikodemosɛ ebisi asɛ, “Kɛlɛ ba betsodzi amɔ anɔ nɛ gɛ ɛti she?” “Kɛgbɛagba atɛ be tsodzi ede tsoku yɛ ni ɛyɛmɛ sɛ tɛ betsodzi nɛ yɛ amɔ!”

⁵ Yesu ebui lɛ nu asɛ, “Itsre wɔ kɛgbɛagba sɛ, anɔnyanɔ atɛ be tsoku Kpaya bukusiɔŋakɔ odɛ nu sɛ be ditsodzi yɛ amɔ nɛ́ buni nɛ̀ Ɔfufɔɛ.

⁶ Ishuidzya mɔ ishuidzya, pɔ Ɔfufɔɛ mɔ ɔfufɔɛ.

⁷ Tɛ kɔ lɛ yinɔ wɔ nɛ́ mɛ bui ɖɛɖɔɛ mɛ sɛ, ‘Alasɛ tɛ be tsodzi wɔnɔ amɔ.’

⁸ Kɛlɛ́ kɛ fu vɛnɔ ɔkɛlɛ gɛ kɛ pɛɛ. Ɔnu kɛlɛ dɔ sɛ kɛfu, pɔ ɔtɛ nyi ɔkɔnɔ gɛ kide, pɛnɔ ɔkɔnɔ gɛ kɛ vɛ. Kana kɛ lɛ kɔ anɔnyanɔ gɛ bamɔ nɛ Ɔfufɔɛ mɛ.”

⁹ Nikodemosɛ ebisi yɛ asɛ, “Kɛlɛ kibui nɛ ba ba lɛ mɛ?”

¹⁰ Yesu aɖɔ sɛ, “Wɔ onu Izraɛl anɛ adɔkasɛ, klɛ odunu kibui nɛesi?

¹¹ Itsre wɔ gbɛagba sɛ, bu ɖɔ kɛdɔnɔ gɛ bu nyi, klɛ bu ɖɔ ɛbuimɔɖɔ kɔ kɛgɛ bu mɔ, pɔ tsyɛ wunɔ banɔ anɛ nɔ dɛ yɛkɛ bulɔ kibuimɔɖɔ.

¹² Ɛɖɔ kaɖɔ kɔ nɔ nɛ kanɔ mɛ ebui shu klɛ nɔ dɛ yɛkɛŋa, kɛlɛ nɔ bɔ yɛkɛŋa onugɛ ɛɖɔ owũsise bui?

¹³ Anɔnyanɔ aka vɛ owũsise ɔyɛkɔdɛ agɛ ede owũsise aba—Anɔdzyrame Eyi.

¹⁴ Anasɛ gɛ Mose efeke eblidzya akpɛ kabha nɛ odzogbe nɛ mɛ, so ba be feke Anɔdzyrame Yi akpɛ kabha,

¹⁵ sɛ anɔnyanɔ gɛ ayɛkɛ yɛ abhaŋa aba mɔ ɛkpã mabeke.”

¹⁶ “Alasɛ Kpaya adɛmɛnɔ nɛ kanɔ sɛ ayɛkɔ yɛa yɛ gɛ enu Eyianyɛ terikpo akɔ, sɛ tɛ anɔnyanɔ gɛ ayɛkɛ yɛabha ŋa eti be tsi pɔ aba mɔ ɛkpã mabeke.

¹⁷ Alasɛ Kpaya adɛ sɛsɛ yɛ Eyianyɛ nɛ kanɔ nɛ mɛ sɛ tɛ ebe zi kanɔ, pɔ apɛa sɛ tɛ ebhui kanɔ nayɛkɛ aganɔ yɛ abha.

¹⁸ Anɔ nɛ gɛ ayɛkɛ yɛ abha ŋa be di bu yɛ kɛpɔ, pɔ anɔ nɛ gɛ adɛ yɛkɛ aŋa be ti bu yɛ pɔ kukuku alasɛ adɛ yɛkɛ Kpaya Yɛeyi terikpo nɛ kinyi nɛa bha ŋa.

¹⁹ Kɛnɛ kɛlɛnu kibuimɛ bhubhui sɛ: Kifu ba kanɔ nɛ mɛ, pɔ banɔ ba dɛmɛ nɛ otumu bui ɔdɛ sɛ kifu bui alasɛ balɛ ebui bhɛbhɛtɛ nɛ nu ezizi.

²⁰ Anɔnyanɔ gɛ abhɛtɛ kibui zizi adɛ dɛmɛ kifui bui, klɛ atɛ ba ba obhubhui kɔ alasɛ esi kifu sɛ aba wɔɛ̃.

²¹ Pɔ anɔnɛ gɛ alɛ ɛkpã dzyɔgo abha aba obhubhui kɔ sɛ tɛ bamɔ lɛ wee sɛ kɛgɛ abhɛtɛ abhɛtɛ lɛ aganɔ Kpaya abha.”

Yohanɛsɛ Enikpɛ Yɛ Buiɖuɖɔ Denɔ Yesu Shu

²² Kɛlɛlɛ nɛede, Yesu nɛ yɛ badɔkpasɛ be koeyi avɛ Yuɖea ɛma nɛ mɛ, ɔkɛlɛ aza balɛ ɔbha ayɛkɛ kibe klɛ akpɛ buni kɔ alɛ.

²³ Ɔtsyɔnɛ Yohanɛsɛ tsyɛ akpɛ buni nɛ Aenon gɛ etsobunɔ Salim, alasɛ buni za ɔkɛlɛ gelee, klɛ banɔa ba ɔkɛlɛ kpi sɛ tɛ bakpɛ buni kɔ alɛ.

²⁴ (Kibuinɛ tɛ ba flogu gɛ ba kpɛ Yohanɛsɛ buvu.)

²⁵ Kɛbui wuwlãkɛ baku Yohanɛsɛɛ badɔkpasɛ nɛ Yuɖa eyi teli shi odenɔ bugu buniwuwlu shu.

²⁶ Ba ba Yohanɛsɛ ɔkɔ klɛ betsre yɛ asɛ, “Adɔkasɛ, anyɛ alɛlɛ gɛ aza wɔ bha nɛ Yɔdan kapɛ bhla—agɛ yɛ shu wɔ ɖɔaɖɔ denɔ—ɔtsɔ̃, akpɛ buni kɔ banɔ, klɛ anɔnyanɔ avɛ yɔ kɔ.”

²⁷ Kɔ kibui nɛ so Yohanɛs ebuilɛ nu aɖɔ sɛ, “Anɔ aba yɛkɛ kɛdɔnɔ ko gɛ bakɔ yɛ denɔ owũsise.

²⁸ Ɛnɔ nahwɛ nɔ bɔ na kaɖɔ ɖɔ sɛ, ‘Anɛ mɛ nu Kristo nɛ pɔ ba kpɛ mɛ asɛ iputɔ kɔ yɛ.’

²⁹ Anyɛedzini enu adzɛnyine nɛ́ ayɛ. Ɔbhɛya nɛ gɛ alɛ adzɛnyine nɛ shu epo klɛ atatɔ nɛ yɛ klɛ eyuku nɛ same kɛbelɛlɛ gɛ enu adzɛnyinɛ nɛ kaɖɔɖuɖɔ. Same alɛlɛ enu mayɛ, klɛ ɔtsɔ̃nɛ kɛna.

³⁰ Yɛ alasɛ tɛ ebedzi agbɛgbladɛ, mɛ alasɛ tɛ ezhiesi.

³¹ Anɔ nɛ gɛ aba denɔ kabha aba ɖama dɛ balɛ petee, agɛ ede kesukpa aɖama dɛ balɛ yɛ enu kɛsukpa nɛ ayɛ, klɛ aɖɔaɖɔ anasɛ agɛ ede kesukpa nɛ mɛ. Anɔ nɛ gɛ ede owũsise yɛ aɖama dɛ petee.

³² Yɛ aɖɔaɖɔ denɔ kɛ gɛ amɔ nɛ̀ enu, pɔ anɔnyanɔ atɛ yɛkɛ yɛ kaɖɔɖuɖɔ.

³³ Anɔ gɛ ayɛkɛ lɛ akasɛ asɛ Kpaya enu kɛgbɛagba.

³⁴ Alasɛ anɔ nɛ gɛ Kpaya asɛsɛ aɖɔ Kpaya ebui, alasɛ Kpaya akɔ Ɔfufɔɛ gɛ lɔ tɛ beke.

³⁵ Aka adɛmɛnɔ nɛ Eyi klɛ ayɛkɔ kɛdɔnyɛdɔ akpɛ yɛ ahwɛ.

³⁶ Anɔ nɛ gɛ ayɛkɛ Eyi nɛ abhaŋa ɛkpã mabeke lɛ yɛ ahwɛ, pɔ anɔ nɛ gɛ adɛ yɛkɛ Eyi atɛ bamɔ ɛkpã, alasɛ Kpaya obulo ɔwɔ yɛ abha.”