Yohanɛsɛ 20 - ONUGBÙ NYƐNYÃ VUVƆ

Odzre Kpɛkpa

¹ Olizatɔ nɛ kiwui tɛtɔpu nɛ ɔgɔnɛ nɛ mɛ, gɛ otumu ɔkɔ̀ dɔ, Maria Magadalena avɛ odzire nɛ ɔbha klɛ ada mɔ sɛ befeke kɛklãgbu nɛ odzire nɛ kedunu.

² So akpanisi aba Simɔn Petro nɛ̀ adɔkpasɛ bhlatɔ agɛ Yesu adɛmɛnɔ nɛ ɔkɔ klɛ aɖɔ sɛ, “Ba debu Apalete nɛ́ odzire nɛ mɛ, klɛ bu tɛ nyi ɔkɔnɔ gɛ bɛ lu yɛ!”

³ So Petro anɛ adɔkpasɛ bhlatɔ ba tɔnɛ dzo avɛ odzre nɛ ɔbha.

⁴ Balɛ tɛabha nɛ ba kpanisi, pɔ adɔkpasɛ bhla nɛ esi afla Petro klɛ eputɔ eku odzire nɛ ɔbha.

⁵ Akpãwudi odzire nɛ mɛ klɛ edi ɔlɛ mɛ klɛ amɔ kɛpɔtɛ frɛrɛ nɛ ɔlɛ mɛ, pɔ edi tsoku ɔlɛ mɛ.

⁶ Ɔkɛlɛ Simɔn Petro gɛ aza yɛede, edeku klɛ etsoku odzire nɛ mɛ. Amɔ kɛpɔtɛ frere nɛ ɔlɛ mɛ,

⁷ nɛ tɛvuvubɔ pɔtɛ gɛ ba yɛkɔ anya Yesu kɛtɔkpu. Kɛpɔtɛ nɛ kɛ ka shu lu, kɛ lɛ ɔtɔ nɛ kɛpɔtɛ frɛrɛ nɛ shu.

⁸ Gɔgɔɛ adɔkpasɛ bhla nɛ gɛ eku odzire nɛ shu eputɔnɔ, tsyɛ etsoku odzire nɛ mɛ. Amɔ klɛ ayɛkɛ aŋa.

⁹ (Ba zadɛ yɛkɛŋa denɔ Kpayɛbui sɛ Yesu alɛ kɔ sɛ tɛ anyɛmɛ denɔ be tsitsi nɛ shi.)

Yesu Ebushu Akasɛ Maria Magadalena

¹⁰ Nɛ ɔkɛlɛ badɔkpasɛ be tsodzi ashɛ̃ vɛ balɛ bapa nɛ mɛ,

¹¹ pɔ Maria aza odzre nɛede eze biyo. Gɛ èbiyo, abubɔ sɛ tɛ akpãwudi odzre nɛ mɛ

¹² klɛ amɔ baxwɛdɛ tɛabha gɛ bakpasɛ kɛdɔ frere mɛ, ba zaesi nɛ ɔkɛlɛ gɛ Yesu tsitsi nɛ aza, Terikpo alɛ kɛtɔkpu ɔkɔ klɛ abhla nalɛ tɛtsre kɔ.

¹³ Be bisi yɛ asɛ, “Adzɛ, kɛdɛso gɛ obiyo?” Aɖɔ sɛ, “Bayɛkɔ mɛ Apalete nɛ ashɛ̃nɔ, klɛ ɛtinyi ɔkɔ nɔ gɛ be de lu yɛ.”

¹⁴ Nɛ kɛ lɛ mɛ etsyina di ɛbha klɛ amɔ Yesu alɔ kɛtiti nɛ ɔkɛlɛ, pɔ ɛdɛ kpɛ yɛ kɛxãwũ sɛ Yesu na lɛlɛ.

¹⁵ Yesu aɖɔ sɛ, “Adzɛ, kɛdeso gɛ obiyo? Ane wɔ pɛɛ?” Maria yɛ tɔkpuimɛ sɛ anɔ nɛ gɛ epo ɔvubɔkɔ, Maria aɖɔ sɛ, “Apalete, onugɛ wɔ otuku yɛ ɔshɛ̃nɔ, tsre mɛ ɔkɛlɛ gɛ ɔyɛkɔ yɛ odo lu, klɛ tɛ ɛdayɛkɔ yɛ.”

¹⁶ Yesu aɖɔ sɛ, “Maria.” Etsyina tɔ yɛ klɛ akpɛ ogugu gɛganɛ eklu yɛ nɛ Aramik bunuhu mɛ sɛ, “Rabboni!” (kɛlɛesi klɛ nu sɛ Adɔkasɛ).

¹⁷ Yesu aɖɔ sɛ, “Tɛ nyɛna mɛ, alasɛ ɛka tsodzi vɛ Aka nɔ kɔ. Kɛlɛɔzakɔ, vɛ madzya lɛ nɛ ɔkɔ tɛ otsre alɛ sɛ, ‘Itsodzi vɛ́ mɛ Aka anɛ̀ wunɔ Aka, mɛ̀ Kpaya anɛ̀ wunɔ Kpaya nɔ kɔ.’ ”

¹⁸ Maria Magadalena avɛ badɔkpasɛ nɛ ɔbha nɛ ebuia nɛ asɛ: “Ɛda mɔ Apalete!” Klɛ adzɛ nɛ etsre alɛ asɛ, Yɛsu tsre yɛ ebuia nɛ.

Yesu Ebushu Akasɛ Yɛ Badɔkpasɛ

¹⁹ Nɛ kiwui tɛtɔpu nɛ ɔgɔnɛ nɛ mɛ owulago, gɛ badɔkpasɛ nɛ be xogo, pɛ ba da ipupu nɛ akpɛ shu, alasɛ be si Yuɖanɛ nɛ fu so, Yesu aba ebe tsoku balɛ shi klɛ aɖɔ sɛ, “Ishuyuyɔ za plɛnɔ nɔ!”

²⁰ Gɛ aɖɔ kibui nɛ beke, akasɛ alɛ yɛ ɛhwɛ nɛ ɔwã nɛ mɛ. Gɛ badɔkpasɛ na mɔ Apalete same eku alɛ dɛ.

²¹ Yesu aza ɖɔ sɛ, “Nɔ lɛ mɔmɔ! Anasɛ gɛ Aka na kpɛ mɛ, ɛkpɛ nɔ tsyɛ.”

²² Klɛ nɛ kɛlɛlɛ afɔɛ kpɛ alɛ mɛ klɛ aɖɔ sɛ, “Nɔ yɛkɛ Ɔfufɔɛ Dzyɔgo.

²³ Onugɛ nɔ yɛ kɔ anɔ teli bui zizi otsye yɛ ba yɛ kɔ etsye yɛ, pɔ onugɛ nɔ dɛ yɛ kɔ tsye alɛ, ba dɛ yɛkɔ etsye alɛ.”

Yesu Ebushuakasɛ Toma

²⁴ Ɔtsyɔnɛ Toma (gɛ beklu yɛ asɛ Didamusɛ) Bakpɛkpɛ lɔfɔ̃nɛtɛabha balɛ mayɛ teli, adɛ za flogo gɛ Yesu aba.

²⁵ Klɛso badɔkpasɛ gugɔɛ nɛ tsre yɛ asɛ, “Bu mɔ Apalete!” Pɔ aɖɔ sɛ, “Ɛdɛ mɔ aɖakewui apɔ nɛ yɛ kekpli nɛ mɛ klɛ mɛ ɛyɛkɔ mawɛ nɛ kpɛ alɛmɛ klɛ mɛ zɛ yɛkɔ mɛ ɔhwɔɛ kpɛ yɛ ɔwã nɛ mɛ, ɛtɛ bayɛkɛ lɛabhaŋa.”

²⁶ Ɔgɔnɛ zɛzɛ ede yɛ badɔkpasɛ ba za bupa nɛ mɛ, klɛ Toma aza balɛ shi. Kɛlɛlɛmɛ sɛ bevu nɛ da, pɔ Yesu etsoku bale shi klɛ aɖɔ sɛ, “Nɔ lɛ mɔmɔ!”

²⁷ Ɔkɛlɛ ɛtsre Toma asɛ, “Yɛ kɔ wɔ awɔɛ nɛ kpɛ ɔkɛnɛ, di mɛ ekpli nɛ mɛ. Mɛna wɔ ɔhwɛ tɛ ɔyɛkɔ kpɛ mɛ ɔwã nɛ mɛ. Zɛkɔlɔ tɛmayɛkɛŋa mayɛkɛŋa klɛ tɛ ɔyɛkɛŋa.”

²⁸ Toma aɖɔ tsre yɛ asɛ, “Ma Apalete anɛ mɛ Kpaya!”

²⁹ Yesu ɛtsre yɛ asɛ, “Alasɛ ɔtsɔlɛ gɛ ɔmɔ mɛ, ɔyɛkɛŋa, tɛyuyula kɔ ba gɛ ba dɛ mɔ pɔ ba yɛkɛŋa.”

³⁰ Yesu abhɛtɛ ebuiyinanɔ dɔmumɔ gelee nɛ yɛ badɔkpasɛ nɛ amɛ gɛ ba de ŋlɔmɛ akpɛ keplukpa anɛ mɛ.

³¹ Pɔ ba ŋlɔmɛ anɛ sɛ tɛ nɔ zɔ yɛkɛŋa sɛ Yesu yɛenu Kristo, Kpaya yɛ Yi, klɛ nɛ yɛabha yɛyɛkɛŋa nɔbɔ mɔ ɛkpã nɛ yɛ nyi mɛ.