Yohanɛsɛ 19 - ONUGBÙ NYƐNYÃ VUVƆ

Be Bu Yesu Kɛpɔ Sɛ Tɛ Bakplaɛasɔ

¹ Ɔkɛlɛ Pilato ayɛkɔ Yesu klɛ akɔ lɛ tu yɛ.

² Keyutugbani be yu ewui ohwui abhɛtɛ ekusi kutu klɛ ba yɛkɔ atrɔ yɛ tɔkpu. Bakpɛ awui dzɛdzã akɔ yɛ,

³ klɛ be wu avɛ yɛ ɔbha avɛ etsodzini avɛ, klɛ ba ɖɔ sɛ, “Obui, Yuɖanɛ ekusi!” Klɛ be hui yɛ dɔ nɛ amɛ nɛ mɛ.

⁴ Pilato eze koeyi klɛ aɖɔ tsre Yuɖanɛ na asɛ, “Nɔ di, ɛyɛkɔ yɛ mɛna ɔtɔ kɔ nɔ tɛ nɔ ti sɛ ɛdɛ mɔ kizizi nɛ yɛ shu.”

⁵ Gɛ Yesu ekoeyi ɔtɔ gɛ ekumu ewui kutu klɛ akpɛ awui dzɛdzã, Pilatio aɖɔ tsre alɛ asɛ, “Anyɛ nɛ na.”

⁶ Gɛ kpayaɔzakɔanɔ ekusi nɛ̀ baxwɛwa nɛ amɔ yɛ ba kpɛ ogugu sɛ, “Kplayɛɔsɔ! Kplayɛɔsɔ!” Pɔ Pilato ebushunu asɛ, “Wunɔ nɔ yɛkɔ yɛ klɛ tɛ nɔ kplayɛ. Mɛ xũ nɛ, ɛdɛmɔ ɔzakɔ kɔ kibui nɛ gɛ nɔ yɛkɔ nɛ yɛ shu.”

⁷ Yuɖanɛ baza ɖɔ sɛ, “Ɔshã lɛ bulɔ ahwɛ, klɛ nɛ ɔshã nɛ nu alasɛ tɛ etsi, alasɛ aɖɔ sɛ enu Kpaya yɛ Yi.”

⁸ Gɛ Pilato enu kibui nɛ, eze sifu atrɔ,

⁹ klɛ etsodzi avɛ yɛ ekusiupa nɛ mɛ. “Fakɔ wɔ de?” ebisi Yesu, pɔ Yesu adɛ builɛnu.

¹⁰ Pilato aɖɔ sɛ, “Ɔdɛ dɛmɛ sɛ tɛ ɔɖɔaɖɔ nɛ mɛ?” “Ɔdɛ mɔɛlɛ sɛ kemi lɛ mɛ ahwɛ sɛ tɛ ɛshɛnahwɛ wɔ shu pɔnɔ tɛ ɛkpla wɔ sɔ?”

¹¹ Yesu ebushunu asɛ, “Kemi tɛ ba za wɔ ahwɛ nɛ mɛabha onugɛ ba dɛ kɔ wɔ denɔ kabha. Kɛlɛso agɛ yɛ ayɛkɔ mɛ akpahwɛ kɔ wɔ be bu yɛ buzizi pɔ gbɛgbladɛ.”

¹² Denɔ kɛlɛ nɛabha ɔvɛnɔ, Pilatio awlãkɛ sɛ tɛ ashɛ̃nahwɛ Yesu shu, pɔ Yuɖanɛ ba zɛ lɛabha kpɛ ogugu asɛ, “Onugɛ ɔkɔ anyɛa nɛ ashɛ̃ ɔtio dzi Kaizaro ɔbhɛya. Anɔnyanɔ gɛ ayɛ kɔ shu asɛ enu ekusi alɔɛtiti nɛ Kaizaro shu.”

¹³ Gɛ Pilato enu ebuia nɛ, agbanɛ Yesu ekoeyi nɔ klɛ ada za ebhuiklu kegbu nɛabha nɛ ekusiupa nɛ mɛ gɛ beklu asɛ Aklãgbu Lulu (gɛ be klu nɛ Aramaik sɛ, Gabbata).

¹⁴ Kiwui lɛlɛ nɛ dzi Tɛbɛbala kɔ Tɛfɛflawi Ɔgɔnɛ, aba za anasɛ ɛɖa tɛta lɔfɔntɛbha nɛ kɛmuze mɛ. Pilatio etsre Yuɖanɛ asɛ, “Wɔnɔ ekusi nɛ naa.”

¹⁵ Pɔ ba kpɛ ogugu asɛ, “Yɛkɔɛ ɔshɛ̃ nɔ! Yɛkɔɛ ɔshɛ̃ nɔ! Kplayɛ ɔsɔ!” Pilatio ebisi alɛ sɛ, “Ɛkpla wɔnɔ ekusi nɛ sɔ dza?” Kpayaɔzakɔ banɔkusi nɛ aɖɔ sɛ, “Ekusi kanyaka ama lɔ ahwɛ pɔ Kaizaro.”

¹⁶ Gɔgɔɛ Pilato ayɛkɔ yɛ akɔ sɛ tɛ ba kplasɔ.. So keyutugbani ba yɛkɛ Yesu.

Yesu Tɛkpɛkplasɔ

¹⁷ Etuku yɛ nahwɛ butsiosi, ekoeyi avɛ Atɔkpuaxwa ɔzakɔ (gɛ beklu nɛ Aramaikɛ bunuhu mɛ asɛ Golgata).

¹⁸ Ɔkɛnɛ ba kplayɛasɔ, klɛ ɔplɛnɔ yɛ banɔ bhlatɔ tɛabha— terikpo nɛ kapɛ kanyaka klɛ Yesu akpasɛ kishitɛbha.

¹⁹ Pilatio aŋlɔmɛ kɛdɔ ata butsiosi nɛ shu. Kɛlɛ tɛkɛkla nɛ ɖɔ sɛ: Yesu Nazarɛtɛeyi, Yuɖanɛ Ekusi.

²⁰ Yuɖanɛ gelee ba kla kɛdɔ ŋuŋlɔmɛ, alasɛ ɔkɛlɛ gɛ ba kpla Yesu asɔ nɛ otsobunɔ ɔmagbla, klɛ ba ŋlɔmɛ kɛdɔ nɛ Aramaɛkɛ, Latɛn anɛ Griki bunuhu mɛ.

²¹ Yuɖanɛ kpayaɔzakɔanɔ kusi nɛ ba dɛ dɛmɛ akɔ Pilatio kɛdɔ ŋuŋlɔmɛ nɛ shu, “Tɛ ŋlɔmɛ sɛ ‘Yuɖanɛ Ekusi,’ pɔ ŋlɔmɛ ɔsɛ aɖɔ sɛ yɛ enu Yuɖanɛ ekusi.”

²² Pilato ebuilɛnu asɛ, “Kɛdɔ nɛ gɛ ɛŋlɔmɛ, ɛtɛ ŋlɔmɛ lɛ.”

²³ Gɛ keyutugbani ba kpla Yesu beke, bayɛkɔ yɛ apɔtɛ dɔ ama kpɛ ɛzakɔ tɛlɛ̃, kapɛ tierikpo kɔ akanyaka, yɛ akpɛkpɛ dzidze yɛ agɔ. Awui kpɛkpɛ alɛlɛ ba dɛ kamɛ yɛ, be yui yɛ denɔ kabha ɔmɛna kesi.

²⁴ Baɖɔ tsee ɛhaglɔ sɛ, “Nɔ tɛ kɔlɔ tsyuɛ̃ yɛ. Nɔ kɔlɔ bisi dɔ agɛ yɛabha lɛ dɔ yɛ ayɛkɔ.” Kɛnɛ kɛ bɛlɛmɛ sɛ kpayakeplukpa nɛ bui bɛlɛmɛ gɛ kɛɖɔ sɛ, “Ba yɛkɔ mɛ kɛdɔ kpɛkpɛ akpɛ aglɔmɛ klɛ bawlãkɛ mɛdɔ kpɛkpɛ dzidze.” So kɛnɛ keyutugbani nɛ abhɛyɛ.

²⁵ Yesu yɛeni, yɛenida, Maria gɛ enu Klopasɛ yɛedzini, anɛ Maria Magdaline be li kititi nɛ tsobunɔ yɛ butsiosi.

²⁶ Gɛ Yesu amɔ yɛ ni nɛ ɔkɛlɛ, anɛ badɔkpasɛ nɛ gɛ adɛmɛ alɛ bui gɛ be li yɛ ɔbha, aɖɔ tsre yɛeni asɛ, “Adzɛ mumɔa, wɔeyi nɛ naa,”

²⁷ klɛ ɛtsre adɔkasɛ nɛ asɛ, “Wɔɛ ni na.” Denɔ kɛbe lɛlɛ nɛabha ɔvɛnɔ adɔkpasɛ anɛ agbanɛ yɛ avɛnɔ yɛ bupɛ mɛ.

Yesu Butsi

²⁸ Kɛlɛede, gɛ be nyi sɛ kibuinyɛbui beke, klɛ sɛ tɛ Kpayaplukpa nɛ bɛlɛ mɛ, Yesu aɖɔ sɛ, “Oniwɛ ɔta mɛ.”

²⁹ Kɛkplui nɛ bulu nyɛnyɛnya tuli za ɔkɛlɛ, so ba yɛkɔ ɔkɔɛsa akpɛ bu lɛ mɛ, ba yɛkɔ ɔkɔɛsa nɛ atrɔ hisopu osi ɔtɛtrɛ klɛ be feke atɔ Yesu onugbu.

³⁰ Gɛ ayɛkɛ bulu, Yesu aɖɔ sɛ, “Kɛ beke.” Ɔkɛlɛ abubɔɛ tɔkpu klɛ ayɛkɔ yɛ ɔfufɔɛ nɛ akɔ.

³¹ Ɔtsɔ̃ nɛ kiwui lɛ nɛ dzi Tɛbɛbalawi, klɛ keli zɛza nɛ be dzi Kimuenewi bhlatɔɛ di. Alasɛ Yuɖanɛ ba dɛ pɛa sɛ tɛ banɔ tsitsi na wɔ butsiosi nɛ shu nɛ Kimuenewi nɛa bha so be bisi asɛ Pilatio akɔɛ dzo tɛ be de dzyini balɛ etsrɛ klɛ tɛ ba sɔkɛ alɛ lu kesi.

³² Kɛlɛso keyutugbani ba ba klɛ be dzyini anɔ tɛtɔpu nɛ ɛtsɛrɛ gɛ ba kpla nɛ Yesu klɛ kɛlɛede ɛtsɛrɛ gɔgɔɛ kɔ agugɔ.

³³ Pɔ gɛ be ku Yesu ɔbha bamɔ sɛ eti tsi, kɛlɛso be di dzyini yɛ ɛtsɛrɛ.

³⁴ Nɛlɛmaza, keyutugbanin teli ayɛkɔ kɛkpɛ ashɔ Yesu ɔwã nɛ mɛ klɛ buni anɛ dzyosu ekoeyi.

³⁵ Anɔ nɛ gɛ amɔɛ lɛ ada ɖɔ, klɛ yɛ kaɖɔɖuɖɔ nɛ nu kɛgbɛagba. Ɛnyi sɛ aɖɔ kɛbui gbɛagba, klɛ aɖɔaɖɔ sɛ tɛ wɔ tsyɛ ɔbɔ yɛkɛŋa.

³⁶ Kɛbui nɛ bɛlɛmɛ sɛ tɛ Kpayaplukpa bui nɛ bɛlɛmɛ, “Yɛ xwa terikpo tsyɛ be tibe dzyini,”

³⁷ klɛ kɛbhlatɔ tsyɛ ɖɔ sɛ, “Ba ba yɛkɔ awɔ̃hu atrɔ anɔ nɛ gɛ ba shɔ kɛkpɛ.”

Yesu Tɛvuvubɔ

³⁸ Nɛ kɛlɛede, Yosɛfu nɛ Arimatia ede bisi Pilato sɛ tɛ atsyɛnahwɛ Yesu tsitsi akɔ yɛ. Ɔtsyɔnɛ Yosɛfu edzi Yesu adɔkpasɛ, pɔ nɛ́ tɛkpukpuimɛ alasɛ esi Yuɖanɛ nɛ fu. Nɛ Pilato kidzokukɔ abha avɛ klɛ ada yɛkɔ Yesu tsitsi ashɛ̃nɔ.

³⁹ Nikodemosɛ gɛ adɛ Yesu ɔkɔ elishi teli, yɛ agbanɛ Yosɛfu avɛnɔ. Nikodemosɛ amɛna aɖuɖo nɛ ahaluwɔɛ, gɛ bu lɛ bupu ba za anasɛ pɔ̃ afɛtegene nɛ tieti.

⁴⁰ Banɔ tɛabha bayɛkɔ buwa nɛ asra kɔ Yesu tsitsi, klɛ ba yɛkɔ kɛpɔtɛ frɛrɛ anya yɛ. Kɛnɛ kɛlɛnu Yuɖanɛ nɛ anɔ vuvubɔ bugu.

⁴¹ Ɔkɛlɛ gɛ ba kpla Yesu asɔ nɛ kevude buya tuli za ɔkɛlɛ gɛ odzre ɔvuvɔ oli, baka vubɔ anɔ nɛ ɔlɛ mɛ edi.

⁴² Alasɛ kiwui nɛ nu Yuɖanɛ nɛ Tɛbɛbala wui klɛ odzre nɛ ɔzakɔ tsobunɔ ɔkɛlɛ, ba vubɔ Yesu nɛ ɔkɛ lɛ.