Yohanɛsɛ 18 - ONUGBÙ NYƐNYÃ VUVƆ

Bevu Yesu

¹ Kɛbelɛlɛ gɛ eklukpaya beke, Yesu nɛ yɛ badɔkpasɛ ba shɛ̃ klɛ ba da tsyɔkɛ Kidrɔnɛ Bukana. Nɛ kapɛ bhla olivɛ buya tuli za ɔkɛlɛ, klɛ yɛ nɛ yɛ badɔkpasɛ betsoku bulɛ mɛ.

² Ɔtsɔnɛ Yuɖasɛ, gɛ ayɛkɔ yɛ akpɛahwɛ, enyi ɔkɛlɛ, alasɛ Yesu aganɛ tsya nɛ ɔkɛlɛ nɛ̀ yɛ badɔkpasɛ.

³ Kɛlɛso Yuɖasɛ aba buya lɛlɛ nɛ mɛ, agbanɛ keyutugbani nɛ baxwɛwa denɔ kpayaɔzakɔanɔ gbla anɛ Farisianɛ ata shu. Be vunɔ ɛbɛya, bakanɛgbɛ ne keyuitadɔ.

⁴ Yesu eti ebui petee gɛ laba ba yɛabha, kɛlɛso avɛ ede bisi balɛ asɛ, “Ane nɔ pɛɛ?”

⁵ Baɖɔ sɛ, “Yesu gɛ ede Nazarɛtɛ.” Yesu aɖɔ sɛ, “Mɛ nu yɛ.” (Klɛ Yuɖasɛ agɛ akpɛ Yesu ahwɛ aza kititi nɛ balɛ ɔbha.)

⁶ Gɛ Yesu aɖɔ sɛ, “Mɛ nu yɛ,” balɛ petee bavɛ kide klɛ badɔ oboe.

⁷ Ɛze bisi ale sɛ, “Ane nɔ pɛɛ?” Klɛ baɖɔ sɛ, “Yesu gɛ ede Nazarɛtɛ.”

⁸ Yesu aɖɔ sɛ, “Ɛtɛ tsre nɔ sɛ Mɛ nu yɛ.” “Onugɛ mɛ nɔ pɛɛ, kɛlɛalɛ kɔ banɔa na shɛ̃.”

⁹ Kɛɛ nɛ kɛ bhɛtɛ sɛ tɛ ebui nɛ gɛ ba ɖɔ nɛ abɛ lɛ mɛ: “Ɛka lɛla bagɛ ɔkɔ mɛ nɛ ɔmɛayɛ kanyaka.”

¹⁰ Ɔkɛlɛ Simɔn Petro, gɛ kɛpamɛ lɛ yɛ shu, ayɛkɔɛ lɛ klɛ afatɛ anɔ gbɛgbla nɛ axwɛdɛ yɛ kɛŋa batɔ. (Bɛ klu axwɛdɛ asɛ Malkus.)

¹¹ Yesu ɛtsre Petro sɛ “tsodzini wɔɛ pamɛ nɛ ɔkpɛ kɛlɛ ɔzakɔ! Kɛma sɛ tɛ ɛwɔɛ̃ butɔ kantsye gɛ Aka na kɔ mɛ?”

Bagbanɔ Yesu Avɛnɔ Anas Ɔkɔ

¹² Ɔkɛlɛ kɛyutugbani nɛ agɛ alɛ balɛ nu nɛ Yuɖanɛ baxwɛwa be vu Yesu. Ba nya yɛ

¹³ klɛ be putɔ agbanɛ yɛ amɛna Anas ɔkɔ, gɛ enu Kɛfas yɛ anɔ gɛ aŋa kusi nɛ kɛgɔɛ lɛlɛ nɛ mɛ.

¹⁴ Kayafasɛ yɛ edzi anɔ nɛ gɛ akpɛ kibui nɛ Yuɖanɛ nɛ butɔ mɛ sɛ kɛba pɛ̃ onugɛ anɔ terikpo etsi nɛ banɔ nɛ tɔkpu.

Petro Kadadɛda Tɛtɔpu

¹⁵ Simɔn Petro nɛ adɔkpasɛ bhlatɔ ba za Yesu ede. Alasɛ kpayaɔzakɔanɔ ɖɛɖama nɛ onyi adɔkpasɛ bhla, atɔnɛ Yesu avɛ kpayaɔzakɔanɔ ɖɛɖama nɛ kebhui oklukɔ kapɛɛ mɛ,

¹⁶ pɔ Petro awɔ bu pa nɛ kedunu. Adɔkpasɛ bhla gɛ kpayaɔzakɔanɔ ɖɛɖama nɛ enyi yɛ, etsodzi aba, ada ɖɔaɖɔ nɛ adzɛnɛvɔɛ gɛ epo kedunu klɛ agbanɔ Petro avɛnɔ bupa nɛ mɛ.

¹⁷ Adzɛnɛvɔɛ gɛ epo kedunu ebisi Petro sɛ, “Wɔ tsyɛ onu yɛ badɔkpasɛ anɔ, sɛ wɔ?” Petro ebushunu asɛ, “Ganɛ Mɛ.”

¹⁸ Kanɔ nɛ mɛ ayɔ, klɛ axwɛ nɛ bepupo bakpɛ fu gɛ baa ŋanɛ sɛ tɛ kɛ kpɛ buhuhu. Petro tsyɛ alɔɛtiti nɛ balɛ ɔbha aŋanɛ fu.

Kpayaɔzakɔanɔ Ɖɛɖama Ebisi Yesu Ebui

¹⁹ Nɛ kɛlɛ mɛ, kpayaɔzakɔanɔ ɖɛɖama ebisi Yesu ebui denɔ yɛ badɔkpasɛ nɛ yɛ dɔ kɛkasɛ shu.

²⁰ Yesu ebuilɛnu asɛ, “Ɛɖɔaɖɔ wee kɔ kanɔ. Mɛ kibenyɛbe ɛkasɛ dɔ nɛ́ oxogokɔvu anɛ̀ Kpayavu nɛ mɛ, ɔkɛlɛ Yuɖanɛ petee ba be xogo aza. Ɛtɛ ɖɔaɖɔ nɛ okpukpukɔ.

²¹ Kɛdeso gɛ obisi mɛ ebuianɛ? Bisi banɔ nɛ gɛ benu mɛ bui. Benyi ebui nɛ gɛ ɛɖɔ.”

²² Gɛ Yesu aɖɔ kibuinɛ, epupo teli gɛ eli balɛ bha ehu yɛ dɔ nɛ amɛ klɛ ebisi yɛ asɛ “Kana wɔ bɔ ɖɔaɖɔ ɔvɛnɔ kpayaɔzakɔanɔ ɖɛɖama nɛ kɔ?”

²³ Yesu ebu ishu nu asɛ, “Onugɛ kibuizizi mɛ ɖɔ, bu kizizi gɛ kɛkpasɛ lɛmɛ ɔɖɔ tsiɖe banɔ petee. Pɔ onugɛ kibui gbɛagba mɛ ɖɔ, kɛlɛalɛ kɛdɛso gɛ ohu mɛ dɔ?”

²⁴ Kɛlɛlɛ nɛede Anas asɛsɛ yɛ nɛ Kefas kpayaɔzakɔ ɖɛɖama nɛ ɔkɔ.

Petro Kadadɛda Bubhla Nɛ Butramɛ

²⁵ Simɔn Petro eli ɔkɛlɛ aŋanɛ fu, klɛ bebisi yɛ asɛ, “Wɔ anɛ Yesu badɔkpasɛ teli wɔ nu?” Adɛɛada, aɖɔ sɛ, “Ganɛ mɛ.”

²⁶ Anɔ gbɛgbla nɛ axwɛdɛ teli, anɔ nɛ gɛ yɛ shopo batɔ Petro afatɛ, ebisi yɛ asɛ, “Sɛ ɛmɔ wɔ nɛ yɛ ɔbha nɛ́ olivɛ buya nɛ mɛ?”

²⁷ Petro aza da kada, nɛ ɔkɛlɔlɛ ɛkukɔ tenɛ bɔ.

Bagbanɛ Yesu Avɛnɔ Pilato Ɔkɔ

²⁸ Ɔkɛlɛ Yuɖanɛ nɛ agbanɔ Yesu edenɔ Kayafasɛ ɔkɔ avɛnɔ Romanɛ ekusi nɛ ɔkɔ. Kibe lɛ nɛ mɛ dzi kɛvlɔ pinii, klɛ tɛ ba tɛ ba da nɛ ishu mabhui mabhui begu nɛ shu so Yuɖanɛ ne di tsoku bupa nɛ mɛ, ba pɛɛ sɛ tɛ ba mɔɛ dzo aŋa Tɛfɛflaɛwui.

²⁹ Kɛlɛso Pilato ekoeyi avɛ balɛ ɔbha klɛ ebisi alɛ sɛ, “Kibui ɖuweɖu nɔ yɛkɔ nɛ anyɛa na shu?”

³⁰ Baɖɔ sɛ, “Ɔtɔsɛ adɛ bhɛtɛ kibui kpã,” “bɔ gɛta gbanɛ yɛ mɛna wɔ.”

³¹ Pilatio etsre alɛ sɛ, “Nɔ yɛkɔɛ yɛ ɔvɛnɔ tɛ wɔnɔ nahwɛ no do klu kebhui nɛ yɛ nɛ́ wɔnɔ ɔshã nɛ nu.” Yuɖanɛ na dɛ yɛkɛ lɛ, “Kidzo ma bulɔ ahwɛ sɛ tɛ bu yi anɔnyanɔ.”

³² Kibui nɛ bɛlɛmɛ sɛ tɛ ebui nɛ gɛ Yesu aɖɔ lu nɛ̀ yɛ butsi nɛdi gɛ ebe tsi tɛ kɛ bɛlɛmɛ.

³³ Pilato etsodzi avɛ bukusiupa nɛ mɛ, klɛ eklu Yesu amɛna yɛ ɔbha klɛ ebisi asɛ, “Wɔ nu Yuɖanɛ ekusi?”

³⁴ Yesu ebisi asɛ, “Wɔnahwɛ wɔɛ buititi, dɛ sɛ anɔteli yɛ aɖɔ kibui tili denɔ mɛshu kɔ wɔ?”

³⁵ Pilato ebushunu ebisi asɛ, “Yuɖaeyi mɛ nu?” “Wɔ banɔ nɛ̀ wɔ kpaya ɔzakɔanɔ ɖɛɖama bala kɔ wɔ akpɛ mɛ ahwɛ. Kɛde wɔ bhɛtɛ?”

³⁶ Yesu aɖɔ sɛ, “Mɛ bukusi nɛ dɛde kanɔa nɛ mɛ, Ɔtɔsɛ bu de kanɔɛanɛ mɛ, mɛ baxwɛdɛ ba ta wlãkɛ mɛ tɔkpu gɛ Yuɖanɛ bagɛ te vu mɛ. Pɔ mɛ bukusi nɛ dɛ ɔkɔ bhlatɔ.”

³⁷ Pilato ebisi asɛ, “Kɛlɛso ekusi wɔ nu?” Yesu ebushunu asɛ, “Kibui gbɛagba wɔɖɔ Ɛnu ekusi. Kɛgbɛagba kɛlɛso gɛ bamɔ mɛ, nɛ kɛlɛso gɛ ɛba kanɔ nɛ mɛ, sɛ tɛ ibu kɛgbɛagba nɛ kasɛ. Anɔnyanɔ gɛ alɛ kibui gbɛagba nɛede ata mɛatɔ.”

³⁸ Pilato ebisi asɛ, “Kɛde kɛlɛ nu kɛgbɛagba?” Nɛ kɛlɛede etsodzi ekoeyi avɛ Yuɖanɛ nɔ bha klɛ aɖɔ sɛ “Ɛdɛ mɔ kɛdɔnɔ gɛ kɛlɛ so gɛ nɔ yɛ kɔ kibui nɛ yɛ shu.

³⁹ Pɔ kɛ nu wunɔ bugu sɛ tɛ ba ashɛ̃nahwɛ anɔ gɛ bakpɛ buvu terikpo shu kɔ nɔ nɛ Tɛfɛfla wui nɛabha. Nɔ pɛɛ sɛ ɛshɛ̃nahwɛ Yuɖanɛ ekusi nɛ shu’?”

⁴⁰ Ba kpɛ ogugu asɛ, “Oo anɛ yɛ! Yɛkɔ Barabas kɔ lɔ!” Barabas enu anɔ gɛ akpɛ onugbu nɛ ɔma yɛyɛ bui mɛ.