Yohanɛsɛ 15 - ONUGBÙ NYƐNYÃ VUVƆ

Vãyɛ̃ Nɛ Yɛ Ɛshɛ̃

¹ Me nu vãyɛ̃ kɛgbɛagba, klɛ ma Aka yɛ nu ɔlɛ ayadɛ.

² Ete ɔshɛ̃nyɔshɛ̃ nɛ mɛ mɛ gɛ lɔ dɛ yu nɛ ebu, nɛlɛmɛ lɛ gɛ yu akanɛ lɛ sɛ tɛ lɛ yu gelee.

³ Wunɔ shu tɛ bhui alasɛ ebui nɛ gɛ ɛɖɔ ɛtsre nɔ so.

⁴ Nɔ za mɛ́ mɛ, klɛ ɛba za wɔnɔ mɛ. Ɔshɛ̃ kanyaka ɔtɛ bɔ na yu nɛ ɔlɛ nahwɛ shuahwɛ; alasɛ tɛ lɔ ta vãyɛ̃ nɛ shu. Kanake no ti bo yu eyuyu odinu ɔkpasɛ mɛ́ mɛ.

⁵ “Mɛ nu vãyɛ̃, wɔnɔ nu ɛshɛ̃. Onugɛ anɔ teli alɛ mɛ́ mɛ klɛ ɛlɛ yɛ mɛ, ebe yu eyuyu gelee, nɛ mɛede nɔ tɛ bɔ na kɛdɛnyɛdɔ bhɛtɛ.

⁶ Onugɛ anɔ teli ama mɛ shui mɛ, alɛ anasɛ ɔshɛ̃ gɛ be te atɛ̃ klɛ lɔ kpã, ɛshɛ̃ lɛlɛ nɛ di ba tɔkɛ lɛ atɛ̃ akpɛ kifu mɛ klɛ lɛ tã.

⁷ Onugɛ nɔ wɔ mɛ́ mɛ klɛ mɛ ebui na lɛ wunɔɛ mɛ, bisi kɛdɔnyɛdɔ gɛ nɔ pɛɛ, klɛ ba bakɔ nɔ.

⁸ Kɛnɛ kɛnu kɔ mɛ Aka nɛ kabhakpɛkpɛ, gɛ nɔ yu eyuyu gelee dɛ, gɛ nɔ kasɛ wunɔɛ shu sɛ nɔ nu mɛ badɔkpasɛ.

⁹ “Anasɛ gɛ Aka nɛ adɛmɛnɔ nɛ mɛ, kana mɛ tsyɛ ɛdɛmɛnɔ nɛ wunɔ. Ɔtsyɔnɛ nɔ za mɛ́ tɛdɛdɛmɛ mɛ.

¹⁰ Onugɛ nɔ bhɛtɛ trɔ mɛ ɛshã nɛabha, nɔ bɔ wɔ mɛ tɛdɛdɛmɛnɔ mɛ, anasɛ gɛ ɛbhɛtɛ trɔ mɛ Aka nɛ ɛshã nɛabha klɛ ɛwɔ́ yɛ tɛdɛdɛmɛnɔ mɛ.

¹¹ Ɛtɛ̀ tsre nɔ anɛ sɛ tɛ mɛ same aza wunɔ mɛ, klɛ tɛ wunɔ same aba na.

¹² Mɛ ɔshã ɔlɛ nu sɛ: Nɔ za tɛdɛdɛmɛnɔ nɛ aglɔ anasɛ gɛ ɛdɛmɛnɔ nɛ nɔ.

¹³ Tɛdɛdɛmɛnɔ gbɛgbladɛ nɛ anɔ vama dɛ kɛnɛ, sɛ ayɛkɔ yɛ kpã etsye yɛ ɛbhɛya.

¹⁴ Nɔ nu mɛ ɛbhɛya onugɛ nɔ bhɛtɛ trɔ ɛshã gɛ ɛkɔ nɔ nɛabha.

¹⁵ Ɛtɛa klu nɔ sɛ axwɛdɛ, alasɛ axwɛdɛ eti nyi yɛ apalete nɛ kɛxwɛwɛwa. Nɛ kɛlɛ ɔzakɔ, iklu nɔ sɛ ɛbhɛya, alasɛ kibuinyɛbui gɛ ɛkpasɛ denɔ mɛ Aka nɔ kɔ ɛkɔ nɔ ti.

¹⁶ Anɛ́ wunɔ klu mɛ, pɔ mɛ klu nɔ klɛ ebu nɔ sɛ nɔ vɛ klɛ tɛ nɔ yu eyuyu—eyuyu gɛ la ba za vɛnɔ. Kɛlɛ Aka aba kɔ nɔ kɛdɔnyɛdɔ gɛ nɔ bisi nɛ mɛ nyi mɛ.

¹⁷ Kɛnɛ kɛlɛ nu mɛ ɔshã: Nɔ dɛmɛnɔ nɛ ɔhaglɔ.

Kanɔ Negu Badɔkpasɛ

¹⁸ “Onugɛ kanɔ ne gu nɔ, nɔ yɛkɔ lɛ ɔkpɛ kɛtɔkpu mɛ sɛ mɛ ke putɔ egu.

¹⁹ Onugɛ nɔ nu kanɔ na yɛ, ka ba dɛmɛnɛ nɔ anasɛ kalɛ nahwɛ ayɛ. Anasɛ gɛ kɛ nu, nɔ dɛ nu kanɔ nɛ ayɛ, pɔ iklu nɔ denɔ kanɔ nɛ mɛ. Kɛlɛso gɛ kanɔ kegu nɔ.

²⁰ Nɔ baka kibui nɛ gɛ ɛɖɔ tsre nɔ: ‘Axwɛdɛ atɛ be triadɛ yɛ Apalete.’ Onugɛ ba kpatɔnɔ mɛ, ba ba kpatɔnɔ wunɔ tsyɛ. Onugɛ babhɛtɛ atrɔ mɛ kɛdɔkɛkasɛ nɛabha, ba ba bhɛtɛ atrɔ wunɔ yɛ tsyɛ abha.

²¹ Ba bakpɛ nɔ butɔ nɛ kidzoe nɛabha alasɛ nɛ mɛ nyi nɛ so, alasɛ be tinyi Anɔ nɛ gɛ yɛ akpɛ mɛ.

²² Onugɛ ɛdɛ ba klɛ ɛɖɔaɖɔ kɔ alɛ, be ti be bu balɛ kɛpɔ kɔ buzizi. Ɔtsɔnɛ, nɛlɛmɛ, kɛ bui ma gɛ ba bayɛkɔ akɔɛ dzo kɔ balɛ buzizi.

²³ Anɔ gɛ egu mɛ egu mɛ Aka nɛ tsyɛ aplɛnɔ.

²⁴ Ɔtɔsɛ ɛdɛ bhɛtɛ nɛ balɛ shi kɛ gɛ anɔ teli adɛ bhɛtɛ, batɛ ba bu alɛ pɔ kɔ buzizi. Pɔ ɔtsɔnɛ ba mɔ ebuiyinɔanɔ anɛ, klɛ tsyɛ be gu bulɔ tɛabha mɛ nɛ ma Aka.

²⁵ Pɔ kɛnɛ nɛ kɛlɛ nu sɛ tɛ kɛ bɛlɛmɛ kɛgɛ baŋlɔmɛ akpɛ balɛ ɛshã kɛkplukpa nɛ mɛ: ‘Be gu mɛ anɛ kibuinyɛbui shu so.’

²⁶ “Kɛbenɔ nɛ gɛ Apɛplɛnɔ aba ba, agɛ yɛ ɛba kpɛ nɛ wunɔ kɔ denɔ Aka nɔ kɔ, kɛgbɛagba Ɔfufɔɛ gɛ lɔ ga koeyi denɔ Kpaya ɔkɔ, aba ɖɔaɖɔ denɔ mɛ shu.

²⁷ Klɛ wunɔ tsyɛ tɛ nɔ bɔ ɖɔaɖɔ denɔ mɛ shu, alasɛ nɔ lɛ mɛ ɔbha denɔ kesikpɛkpɛ.