Yohanɛsɛ 13 - ONUGBÙ NYƐNYÃ VUVƆ

Yesu Eplu Butsrukpɔ Kɔ Yɛ Badɔkpasɛ

¹ Agɔ kiwui tirikpo tɛ baŋa Tɛfɛflawui. Yesu eti sɛ kibe na kɔ yɛ sɛ tɛ ashɛ̃ nɛ kanɔ nɛ mɛ tɛ avɛ Aka nɔ kɔ. Nɛ tɛdɛdɛmɛnɔ nɛ bagɛ benu yɛ ayɛ alɛ gɛ ba lɛ kanɔ nɛ mɛ, ɔtsɔ̃ nɛ akasɛ alɛ tɛdɛdɛmɛnɔ nɛna.

² Ba kɔ ɔwulagoe dɔ ŋɛŋa, klɛ ɔfufɔɛzizi nɛ tɛ tsoku Yuɖa Iskarɔtɛ, Simɔn yɛ yi nɛ mɛ sɛ tɛ akpɛ Yesu ahwɛ.

³ Yesu enyi asɛ, Aka nɛ ayɛkɔ kɛdɔ petee akpɛ yɛ kemi esi, klɛ sɛ ede Kpaya ɔkɔ klɛ etsodzi avɛ Kpaya kɔ,

⁴ so alɔ nɛ kɛdɔŋɛŋa nɛ shu, ebu yɛ kabha kɛdɔ kpɛkpɛ nɛ elu, klɛ ayɛkɔ kavlɔ atsakpɛ kashɛ̃.

⁵ Kɛlɛede, eshu buni akpɛ kewlutsukpu mɛ klɛ etenɔ butsurukpɔ eplu kɔ yɛ badɔkpasɛ, klɛ ayɛkɔ kavlɔ nɛ gɛ kalɛ yɛ ashɛ̃ etsuru butsrukpɔ nɛ kɔ alɛ.

⁶ Aba Simɔn Petro ɔkɔ, gɛ yɛ aɖɔ tsre yɛ asɛ, “Apalete, ɔbɔ plu mɛ butsrurukpɔ?”

⁷ Yesu ebushunu akɔ yɛ asɛ, “Ɔtɛ boti kɛdɔnɔ gɛ ɛbhɛtɛ ɔtsɔnɛ, pɔ kɛlɛede obo nu kɛlɛesi.”

⁸ Petro ɛtsre yɛ asɛ, “Ao, ɔtɛ bɔ plu mɛ butsurukpɔ di.” Yesu ebuilɛnu asɛ, “Ɛdɛ plu wɔ shu oti bo dzi mɛ adɔkpasɛ.”

⁹ Simɔn Petro aɖɔ sɛ, “Kɛlɛalɛ, Apalete, anɛ mɛ ɛtsrɛ tite pɔ mɛ ɛhwɛ nɛ mɛ tɔkpu nɛ plɛnɔ!”

¹⁰ Yesu ebuilɛnu asɛ, “Anɔ nɛ gɛ ewulu butsrukpɔ ko ezɛe plu, yɛ shu petee yi. Klɛ no yi, kɛlɛlɛmɛ sɛ anɛ anɔnyanɔ nɛ wunɔɛ mɛ yɛ yi.”

¹¹ Alasɛ enyi anɔ nɛ gɛ aba vɛ atɛ kpɛ yɛ ahwɛ, nɛ kɛlɛso gɛ aɖɔ sɛ, anɛ anɔnyanɔ yɛ yi.

¹² Gɛ eplu butsurukpɔ nɛ akɔ alɛ beke, ada yɛkɔ yɛ pɔtɛ dɔ nɛ akpɛ klɛ etsodzi avɛ yɛ ɔzakɔ. Ebisi balɛ sɛ, “Nɔ nu kɛdɔ nɛ gɛ ɛbhɛtɛ kɔ nɔ nɛesi?”

¹³ “No klu mɛ sɛ, ‘Adɔkasɛ’ anɛ ‘Apalete,’ klɛ kana kɛ lɛ, alasɛ kɛlɛ nu agɛ mɛ nu.

¹⁴ Ɔtsɔnɛ gɛ mɛ, wunɔ Apalete anɛ̀ Adɔkasɛ, ipulu nɔ butsurukpɔ, wunɔ tsyɛ nɔ plu wunɔ haglɔ butsrɛkpɔ.

¹⁵ Ɛbhɛtɛ dɔkasɛ nɛ sɛ tɛ wunɔ tsyɛ nɔ bhɛtɛ anasɛ gɛ ɛbhɛtɛ kɔ nɔ.

¹⁶ Itsre nɔ kɛgba sɛ, axwɛdɛ eti be tri dɛ apalete, pɛnɔ anɔ nɛ gɛ ba kpɛ xwɛ atɛ be tri adɛ agɛ àkpɛ yɛ.

¹⁷ Ɔtsyɔnɛ gɛ nɔ nyi ebuia nɛ, nɔ bɔ yɛkɛ tɛyuyula onugɛ nɔ bhɛtɛ alɛ.

Yesu Aɖɔ Yɛ Tɛkpɛkpɛahwɛ Elu

¹⁸ “Anɛ nɔ petee mɛ ɖɔ, enyi ba gɛ eklu. Pɔ sɛ tɛ Kpaya bui nɛ bɛlɛmɛ, ‘Anɔ nɛ gɛ bulɔ nɛ yɛ bu kpahwɛ kɛsugbɛ tirikpo mɛ, yɛ alɔ kititi nɛ mɛ shu.’

¹⁹ “Itsre nɔ ɔtsɔ̃ nɛ nɛ flogo kɛ ba bɛlɛmɛ, sɛ tɛ kibenɔ gɛ kɛ bɛlɛmɛ nɔ bɔ yɛkɛ lɛabhaŋa sɛ mɛ nu Yɛ.

²⁰ Itsre nɔ gbɛagba sɛ, anɔ nɛ gɛ ayɛkɛ anɔnyanɔ gɛ ɛkpɛ, ayɛkɛ mɛ, klɛ anɔ nɛ gɛ ayɛkɛ mɛ, ayɛkɛ agɛ akpɛ mɛ.”

²¹ Gɛ aɖɔ kibui nɛ bekɛ, Yesu dzyi ahwa nɛ́ ɔfufɔɛ mɛ, klɛ aɖɔaɖɔ sɛ, “Itsre nɔ kɛgba, wunɔ mayɛ terikpo aba yɛkɔmɛ atɛ kpɛ ahwɛ.”

²² Yɛ badɔkpasɛ be yele aglɔ, be di lɛmɛ sɛ tɛ be ti balɛ ɔmayɛ gɛ aɖɔ.

²³ Ba lɛ ɔmayɛ terikpo, adɔkpasɛ agɛ yɛ Yesu adɛmɛnɔ, aza kɛwã nɛ yɛ wã.

²⁴ Simɔn Petro ahwanɛ adɔkpasɛ alɛlɛ klɛ aɖɔ sɛ, “Bisi yɛ sɛ ane yɛ aɖɔ.”

²⁵ Ayɛkɔ kede akpaplɛnɔ Yesu, ebisi yɛ asɛ, “Apalete, ane na lɛ?”

²⁶ Yesu etsre alɛ sɛ, “Anɔ nɛ gɛ ɛba yɛkɔ gbɛ̃gbɛ̃vu kapɛa nɛ kɔ kibe lɛ gɛ ɛkpɛa lɛ nɛ kesugba nɛ mɛ beke.” Ɔkɛlɛ ayɛkɔ gbɛ̃gbɛ̃vu kapɛ nɛ etsu kesugba nɛ mɛ klɛ ayɛkɔ akɔ Yuɖasɛ Iskarɔtɛ, Simɔn yɛ yi.

²⁷ Yuɖasɛ gbɛ̃gbɛvu nɛ tɛyɛyɛkɛ ko, Satana etsoku yɛ mɛ. Yesu etsre yɛ asɛ, “Kɛdɔnɔ gɛ ɔpɛɛ sɛ tɛ ɔbhɛtɛ, bhɛtɛ zia, ”

²⁸ pɔ anɔnyanɔ nɛ kɛsugbɛ nɛesi edi nu lɛesi kɛdɔnɔ so gɛ Yesu aɖɔ kibui nɛ etsre yɛ.

²⁹ Gɛ Yuɖasɛ yɛ abala kɔba nɛ so, be teli ba yɛkɔɛ lɛ sɛ, Yesu etsre yɛ asɛ tɛ ada dzi kɛdɔ nɛ gɛ kɛlɛ shu xwɛ gɛ ba bawa nɛ Kiwui nɛ mɛ, pɛnɔ ada kɔ betsutsukpɛ̃ kɔba teli.

³⁰ Yuɖasɛ yɛ gbɛ̃gbɛ̃vu nɛ tɛyɛyɛkɛ ko, ekoeyi ashɛ̃. Klɛ kɛ dzi elishi.

Yesu Aɖɔaɖɔlu Denɔ Petro Kadadɛda Shu

³¹ Gɛ Yuɖasɛ àshɛ̃, Yesu aɖɔ sɛ, “Ɔtsɔlɛ be bu Anɔdzyrame Eyi nɛ shu bhubhui akasɛ klɛ be bu Kpaya tsyɛ shubhubhui akasɛ nɛ yɛ mɛ.

³² Onugɛ ba kpɛ, Kpaya aba kpɛ Eyi shu bhubhui nɛ kabha nɛ yɛ nahwɛ mɛ, klɛ aba kpɛ yɛ nɛabha ɔtsɔtsɛɔ̃.

³³ “Mɛ yialɛ, ɛba za nɔ bha kɛbɔɛ ko. Nɔ bɔ pɛɛ mɛ, klɛ anasɛ gɛ etsre Yuɖanɛ, so ɛtsre nɔ ɔtsɔ nɛ: Ɔkɛlɛ gɛ ɛvɛ, nɔ tɛ bɔna ba.

³⁴ “Ɔshã vuvɔ mɛ ɛkɔ nɔ: Nɔ dɛmɛnɔ ɔhaglɔ. Anasɛ gɛ ɛdɛmɛnɔ nɛ wunɔ, so nɔ dɛmɛnɔ nɛ ɛhaglɔ.

³⁵ Nɛkɛlɛmɛ banɔ petee ba beti sɛ mɛ badɔkpasɛ nɔ nu, onugɛ nɔ dɛmɛnɔ nɛ ehaglɔ.”

³⁶ Simɔn Petro ebisi Yesu asɛ, “Apalete, fakɔ wɔ vɛ?” Yesu ebushunu asɛ, “Ɔkɛlɛ gɛ ɛvɛ, nɔ tɛ bɔ na mɛ ɔtɔnɔ ɔtsɔ̃ nɛ, pɔ nɔ bɔ tɔnɔ mɛ ɔba kɛlɛede.”

³⁷ Petro ebisi asɛ, “Apalete, kɛdeso gɛ ɛtɛ ba za wɔede ɔtsɔ nɛ? Ɛba yɛkɔ mɛ kpã kɔ nɛ wɔɛ tɔkpu.”

³⁸ Ɔkɛlɛ Yesu ebuilɛnu sɛ, “Ɔbɔ yɛkɔ wɔ kpã kɔ kɛgbɛagba nɛ mɛ tɔkpu? Itsre wɔ gbɛagba, flogo tɛ ɔkukɔ bɔ bɔ, ɔbɔ daɛda nɛmɛ shu ada tata!