Yohanɛsɛ 12 - ONUGBÙ NYƐNYÃ VUVƆ

Ba Balɛ Bubɔ Nɛ Yesu Abha Nɛ́ Betani

¹ Agɔ ewui tehlo tɛ ba ŋa Tɛfɛflawui, Yesu ede ku Betani, nɛ ɔkɛlɛ gɛ Lazarus alɛ, agɛ Yesu anyɛmɛ denɔ bekpu mɛ.

² Nɛ ɔkɛlɛ batɔɛdɔ aŋaɛwui sɛ tɛ bayɛkɔ akpɛ Yesu nyi nɛabha. Mata adɛ axwɛ, nɛlɛmɛ Lazarus aza kesi wɔɛ̃ nɛ kɛdɔnɛ ɔŋakɔ.

³ Ɔkɛlɛ Maria ayɛkɔ bubɔ huhu kɛbɔpuli tirikpo gɛ buŋaedzi, abalɛ Yesu butsrɛkpɔ nɛabha kɛlɛ ayɛkɔ yɛ kɛtɔkputɛka etsuru butsrɛkpɔ. Klɛ bupa nɛ mɛ petee yuku nɛ bubɔ nɛ fufa.

⁴ Pɔ yɛ adɔkpasɛ terikpo, Yuɖas Iskarɔtɛ, gɛ ebe dzi agɛ ába kpɛ yɛ ahwɛ nɛ adɛ dɛmɛ.

⁵ “Kɛde so gɛ bata yɛkɔ bubɔ nɛ adɛ klɛ bata yɛkɔ kɔba nɛ akɔ betsyutsyuini? Bu lɛe dzi ŋɛŋa nɛ kɛgɔ zɛzɛ bhɛ, ”

⁶ Adɛ ɖɔ kibui nɛ alasɛ ebu kitsyutsyuikpɛ̃ nɛ shu so, pɔ alasɛ edzi ezi, anasɛ agɛ edi kɔba ɔkpɛtɛ nɛabha, aganɛ ishu aplɛnɔ nɛ kɔba gɛ ba kpɛ ɔlɛ mɛ.

⁷ Yesu aɖɔ sɛ, “Shɛnahwɛ adzɛ nɛ shu. Kinu tɛtutrɔ sɛ tɛ abala bubɔ nɛ elu kɔ kiwi nɔɔ nɛ gɛ ba bá vubɔ mɛ.

⁸ Kibenyɛbe kitsyutsyuikpɛ̃ ba za wunɔ ɛshi, pɔ nɔ tɛ bɔ mɔ mɛ Kibenyɛbe.”

⁹ Nɛ kɛlɛ mɛ banɔɛza gbla tili gɛ nu Yuɖanɛ na ba mɔ asɛ Yesu aba klɛ alɛ ɔkɛlɛ, ganɛ sɛ yɛ tite ko so pɔ sɛ tɛ ba mɔ Lazarusɛ tsyɛ, gɛ Yesu anyɛmɛ denɔ bekpu mɛ.

¹⁰ Kɛlɛso kpayaɔzakɔanɔ gbla ba trɔ sɛ tɛ beyi Lazarus tsyɛ,

¹¹ alasɛ yɛ so Yuɖanɛ gelee bavɛ Yesu abha klɛ bayɛkɛ Yesu abhaŋa.

Tɛtsutsoku Yerusalɛm Nɛ Kabhaŋɛŋa

¹² Nɛ kiwui bhla nɛabha banɔɛza gbɛgbla ge ba ba kɔ kiwuiŋɛŋa be nu asɛ Yesu tsyɛ atɔnɛ dzo avɛ Yerusalɛm.

¹³ Bayɛkɔ inuwãmɔɛ klɛ bavɛ sɛ tɛ ba da tsyanɛ yɛ, nɛ egugu sɛ, “Hosanna!” “Tɛyuyula kɔ anɔ nɛ gɛ aba nɛ Apalete nɛ nyimɛ!” “Tɛyuyula kɔ Izraɛlanɛ Ekusi!”

¹⁴ Yesu amɔ kitukuaga kebite klɛ aza kalɛabha anasɛ gɛ baŋlɔmɛ,

¹⁵ “Nɔ to sifu, O Zion Beyiadzɛ, di wunɔ ekusi na ba, aza kitukuaga nɛabha.”

¹⁶ Nɛ kesikpɛkpɛ yɛ badɔkpasɛ be di nu ebuianɛ petee esi. Ba kpɛ Yesu nyi nɛbha kɛlɛede flogo gɛ be ti sɛ ebuinɛ gɛ ba ŋlɔmɛ nɛ yɛ shu klɛ agɛ ba bhɛtɛ ebuianɛ nɛ yɛ shu.

¹⁷ Ɔtsɔ̃nɛ banɔɛza nɛ gɛ baza yɛ ɔbha gɛ eklu Lazarus denɔ odzre nɛ mɛ klɛ anyɛmɛ yɛ edenɔ bekpuimɛ, ba za lɛabha nyɔnɛ kibui petee.

¹⁸ Banɔ gelee avɛ sɛ tɛ ba da tsyanɛ yɛ alasɛ be nu sɛ abhɛtɛ kɛdɔmumɔ ebui gɛ eyinɔanɔ.

¹⁹ Kɛlɛso Farisianɛ ba ɖɔ tsre ɛhaglɔ sɛ, “No di, kɛnɛ tɛ bagbanɛ lɔ vɛnɔ ɔkɔnyɔkɔ. Di kana gɛ kanɔ nɛ petee ba lɛ yɛ ede!”

Yesu Aɖɔ Yɛ Butsibui Elu

²⁰ Ɔtsyɔnɛ Griki anɛ teli ba vɛ sɛ tɛ ba da sɔlɛ nɛ Kiwui nɛ mɛ.

²¹ Ba ba Filipo gɛ ede Betaida nɛ Galelia ɔkɔ, nɛ tɛbibisi asɛ, “Apalete,” ba ɖɔ sɛ, “bu pee sɛ tɛ bu mɔ Yesu.”

²² Filipo avɛ ede tsre Andrɛasɛ, Andrɛasɛ nɛ Filipo ba vɛ ede tsre Yesu.

²³ Yesu etsre alɛ sɛ, “Kibe na sɛ tɛ bakpɛ Anɔdzyrame Yi nɛabha.

²⁴ Ɛtsre nɔ gbɛagba, ɔdɛsɛ kɛmɔɛyi wɔlɛ dɔ kesukpa klɛ kɛ tsi kɛ nu kiyi tirikpo ko. Pɔ onugɛ kɛ tsi kɛ ba yi klɛ kɛ ba yu gelee.

²⁵ Anɔ nɛ gɛ adɛmɛnɔ nɛ yɛ kpã aba lɛla lɛ, nɛlɛmɛ agɛ adɛ pɛɛ yɛ kpã nɛ kanɔ nɛ mɛ aba bala lɛ kɔ ɛkpã mabekemabeke.

²⁶ Anɔ nɛ gɛ aba dɛ xɔɛ kɔ mɛ alasɛ tɛ aza mɛede, ɔkɛlɛ gɛ ɛlɛ, mɛ axwɛdɛ nɛ tsyɛ ɔkɛlɛ aba za. Mɛ Aka aba kpɛ agɛ adɛ xwɔɛ kɔ mɛ nɛ nyi nɛabha.

²⁷ “Ɔtsɔnɛ mɛ dzyi amɔ butɔ, klɛ kide mɛ baɖɔ? Ɛbaɖɔ sɛ ‘Aka, bhui mɛ ɔyɛkɛ nɛ ɔɖɔ nɛ mɛ’? Ao, kɛnɛ nahwɛ so gɛ ɛba nɛ ɔɖɔ nɛ mɛ.

²⁸ Aka, kpɛ wɔɛ nyi nɛabha!” Ɔkɛlɛ olimɛ toli yi de owũsise sɛ, “mɛ kpɛ yɛ nyi nɛabha, klɛ kɛ zɛa tsodzi akpɛ yɛ nyi nɛabha.”

²⁹ Banɔɛza gɛ ba za ɔkɛlɛ gɛ be nu kibui, ba ɖɔ sɛ sɛbha yɛ alɛ, babhlatɔ tsye asɛ, kpayaxwɛdɛ yɛ aɖɔaɖɔ kɔ yɛ.

³⁰ Yesu aɖɔ sɛ, “Wunɔ tɛpɛpɛ̃ so gɛ olimɛ kaɖɔ nɛ yi, anɛ mɛ tɛpɛpɛ̃.

³¹ Ɔtsɔnɛ kɛbena kɔ kebhuikuklu nɛ kanɔ, ɔtsɔnɛ ba ba kɛka ekusieyi nɛ kanɔa nɛ mɛ.

³² Pɔ mɛ, kibelɛlɛ gɛ befeke mɛ avɛnɔ kabha denɔ kesukpɛa nɛ mɛ, ɛba gbanɔ banɔ petee ɛmɛna me shu.”

³³ Aɖɔ kibuinɛ sɛ tɛ akasɛ butsi nɛdi gɛ ebe tsi.

³⁴ Banɔɛza baɖɔ gɛganɛɛ sɛ, “Bunu denɔ Ɛshã nɛ mɛ sɛ Kristo aba za vɛnɔ mabeke, so kɛlɛ nɔ bɔ nɛ aɖɔ sɛ, ‘Ba be feke Anɔdzyrame Yi avɛnɔ kabha’? Anɛ yɛ nu ‘Anɔdzyrame Yi’?”

³⁵ Ɔkɛlɛ Yesu etsre alɛ sɛ, “Nɔ bɔ yɛkɛ kifu nɛ kibebhli ko. Ga kibelɛlɛ nɛ gɛ nɔ yɛkɛ kifu, flogo tɛ otumu lo bo vu nɔ. Anɔ nɛ gɛ aga nɛ otumuɛ mɛ eti nyi ɔkɔnɔ nɛ gɛ avɛ.

³⁶ Nɔ yɛkɔ wɔnɔ tɛyɛyɛkɛŋa nɛ ɔtrɔ kifu nɛabha nɛ kibe lɛ gɛ kɛ lɛ wɔ ahwɛ, sɛ tɛ no bo dzi kifu nɛ be yi.” Kibe lɛ nɛ gɛ aɖɔaɖɔ nɛ beke, Yesu ashɛ̃ klɛ ede kpu ishua lɔ balɛ.

Yuɖanɛ Ba Ka Za Balɛ Mayɛkɛŋa Nɛabha

³⁷ Kɛlɛede Yesu abhɛtɛ kɛdɔmumɔ ebui gɛ eyinɔanɔ ba lɛ amɛ tsyɛ, ɔdɔtɔnɔ ɔtsɔ̃ nɛ ba dɛ yɛkɛ yɛ abhaŋa.

³⁸ Kɛnɛ kɛlɛ nu kibui gɛ kɛ ba belɛmɛ gɛ atɔnu Yezaya aɖɔlu sɛ, “Apalete, ane gɛ ayɛkɛ bulɔ bui ɖɛɖɔ nɛabhaŋa klɛ kɔ ane be bu Apalete nɛ kemi nɛ akasɛ?”

³⁹ Alasɛ kibui nɛ so ba de yɛkɛŋa, alasɛ, anasɛ gɛ Yezaya aɖɔ nɛ ɔkɔ bhlatɔ sɛ

⁴⁰ “Epu ba lɛ awɔ̃hu klɛ eyi ba lɛ dzyi, so tɛ ba tɛ na kɛdɔ mɔnɛ balɛ awɔ̃hu, ɔdɔgɔsɛ be nu kibuiesi nɛ balɛ idzyi, ɔdɔgɔsɛ be tsyina—klɛ ɛba beke balɛ banya.”

⁴¹ Yezaya aɖɔ kibui nɛ alasɛ amɔ Yesu yɛ kabhaŋɛŋa klɛ aɖɔaɖɔ denɔ yɛ shu.

⁴² Nɛ kibe lɛlɛ mɛ be gelee tsyɛ nɛ bagbɛgbanɔ nɛ mɛ ba yɛkɛ yɛ abhaŋa. Pɔ alasɛ Farisianɛ nɛ so ba dɛ bu ba lɛ tɛyɛyɛkɛŋa na kasɛ, alasɛ bɛ sifu sɛ ba be bu alɛ nɛ oxogokɔvu nɛ mɛ,

⁴³ alasɛ ba dɛmɛnɔ kɛnyi kpɛkpɛ nɛabha denɔ banɔ kɔ dɛ kɛnyi kpɛkpɛ denɔ Kpaya kɔ.

⁴⁴ Ɔkɛlɛ Yesu akpɛ ogugu aɖɔ sɛ, “Kibenɔ nɛ gɛ anɔ ayɛkɛ mɛabhaŋa, adɛ yɛkɛ mɛ tite abhaŋa, pɔ ayɛkɛ anɔ nɛ gɛ akpɛ mɛ abhaŋa.

⁴⁵ Kibelɛlɛ nɛ gɛ edi mɛ, amɔ agɛ akpɛ mɛ.

⁴⁶ Ɛba kanɔ nɛ mɛ anasɛ kifu, sɛ tɛ anɔ nɛ gɛ ayɛkɛ mɛabhaŋa atɛ ba za otumuɛ mɛ.

⁴⁷ “Anɔ nɛ gɛ enu mɛ ebui pɔ adɛ nyɛna lɛ, mɛ ɛtɛ ba klu kebhui nɛ yɛ. Alasɛ ɛdɛ ba sɛ tɛ ɛba klu kebhui nɛ kanɔ, pɔ ɛba sɛ tɛ ɛba bhui alɛ yɛkɛ.

⁴⁸ Kebhui kuklu alɛ kɔ anɔ nɛ gɛ adɛ pɛɛ mɛ ebui klɛ adɛ yɛkɛ mɛ ebui, kɛ bui lɛlɛ nɛ gɛ ɛɖɔ kɛ ba bu yɛ pɔ nɛ kiwui gugɔɛ nɛabha.

⁴⁹ Alasɛ ɛdɛ ɖɔ kibui nɛ nɛmɛnahwɛ shu ahwɛ, pɔ Aka nɛ gɛ akpɛ mɛ yɛ akɔ mɛ ɔshã sɛ tɛ ɛɖɔ kɛ gɛ ɛba ɖɔ nɛ ka na gɛ ɛba ɖɔɛ lɛ.

⁵⁰ Ɛnyi sɛ yɛ ɛshã nɛ mɛna ɛkpã mabekemabeke. Kɛlɛso kibuinyɛbui gɛ ɛɖɔ kɛ nu kɛbui gbɛagba gɛ Aka nɛ tsre mɛ sɛ ɛɖɔ.”