Yohanɛsɛ 10 - ONUGBÙ NYƐNYÃ VUVƆ

Ibhoshi Agbɛgbanɔ Nɛ Yɛ Ibhoshiha

¹ “Itsre nɔ kɛgba nɛ sɛ, ánɔ gɛ adɛ ga kedunu flogo gɛ etsoku obhoshi buka nɛ mɛ, pɔ ewu buka aga kidzo bhlatɔ etsoku, enu ezi nɛ edzobhui.

² Anɔ nɛ gɛ aga kedunu yɛ nu ibhoshi nɛ agbɛgbanɛ.

³ Epupo nɛ adanɛ buka nɛ akɔ lɛ, klɛ ibhoshi nɛ nu yɛ olimɛ. Eklu yɛ nahwɛ ibhoshi nɛ kinyi gɛ akɔɛ lɛ klɛ agbanɛ lɛ koeyi.

⁴ Kibelɛlɛ gɛ agbanɔ yɛ nahwɛ yɛ petee koeyi, eputɔ kɔɛ lɛ klɛ yɛ ibhoshi nɛ lɛ yɛede alasɛ lɛ nyi yɛ olimɛ.

⁵ Pɔ ibhoshi lɛ tɛ ba tɔnɔ efu, kɛgbɛagba, lɛ ba butsrɛ mɛ alɔ yɛ, alasɛ lɛ tɛ nyi efu nɛ olimɛ.”

⁶ Yesu akpɛ kɛkpalɛ nɛ akɔ alɛ, pɔ be dinu kibui nɛ gɛ etsre alɛ nɛesi.

⁷ Kɛlɛso Yesu aza ɖɔ sɛ, “Itsre nɔ kɛgba sɛ, mɛ nu kedunu kɔ ibhoshi.

⁸ Banɔ petee gɛ beputɔ kɔ mɛ benu bezi nɛ bevuyɛ, pɔ ibhoshi nɛ dɛ nu balɛ ilimɛ.

⁹ Mɛ nu kedunu, ánɔ gɛ aga mɛabha etsoku ba ba yɛkɛ kɔ yɛ. Ebe tsoku klɛ ebe koeyi klɛ atɛpɛɛ kɛdɔ ŋɛŋa.

¹⁰ Ezi aba ko sɛ tɛ ebe zuru klɛ tɛ eyi anɔ nɛ tɛ ezidɔ. Ɛba sɛ tɛ banɔ ba mɔ ɛkpã, klɛ tɛ bayɛkɛ lɛ tɛ lɛ na.

¹¹ Mɛ nu ibhoshi agbɛgbanɔ dzyɔgo. Agbɛgbanɔ dzyɔgo ayɛkɔ yɛ kpã akɔ ibhoshi.

¹² Anɔ nɛ gɛ ba yɛkɔ sɛ agbanɔ ibhoshi ganɛ yɛ enu ibhoshi nɛ elete. So kibe lɛ gɛ amɔ ayakpamɛ kakudzɔgɛ nɛ gɛ kaa ba, áshɛ̃nahwɛ ibhoshi nɛ shu klɛ eesi ashɛ̃. Ɔkɛlɛ ayakpamɛ kakudzɔgɛ nɛ kee ku ibhoshiha nɛ mɛ klɛ kaa pɔɛ lɛ ehle.

¹³ Anɔ ebe bu tɛtsrɛmɛ ashɛ̃ alasɛ ba yɛ kɔ yɛ asɛ tɛ edi lɛabha klɛ adɛ yɛkɔ kibuinyɛbui nɛ ibhoshi nɛ mɛ.

¹⁴ “Mɛ nu ibhoshi agbɛgbanɔ dzyɔgo, inyi mɛ ibhoshi klɛ mɛ ibhoshi nɛ nyi mɛ—

¹⁵ anasɛ gɛ Aka nɛ nyi mɛ klɛ inyi Aka—klɛ ɛyɛkɔ mɛ kpã kɔ ibhoshi.

¹⁶ Ibhoshi bhlatɔ lɛ mɛ ahwɛ gɛ lɛ ma ibhoshi buka nɛ mɛ. Ɛba tɛ gbanɛ lɛ tsyɛ mɛna. Ɛlɛ tsyɛ ba nu mɛ olimɛ, klɛ ibhoshiha tirikpo nɛ agbɛgbanɔ Terikpo.

¹⁷ Kibui nɔ nɛ so gɛ ma Aka adɛmɛ mɛ bui kɛlɛ nu sɛ ɛshɛnahwɛ mɛ kpã shu—tɛ ɛtsodzi ɛlɛ ayɛkɔ ko.

¹⁸ Anɔnyanɔ adɛ yɛkɛ ɛkpã nɛ mahwɛ, pɔ mɛ nahwɛ mɛ dɛmɛ ashɛ̃nahwɛ lɛ shu. Kabhaŋɛŋa lɛ mahwɛ sɛ tɛ ɛshɛnahwɛ ɛlɛ shu klɛ kabhaŋɛŋa lɛ sɛ tɛ ɛtsodzi yɛ kɔɛ lɛ. Ɔshãa nɛ mɛ yɛkɛ denɔ mɛ Aka nɔ kɔ.”

¹⁹ Nɛ ebuia nɛ so Yuɖanɛ nɛ za yɛ́ aglɔ mɛ.

²⁰ Be gelee aɖɔ sɛ, “Ɔfufɔɛzizi lɔlɛ yɛ ahwɛ klɛ lɔ kpɛ yɛ kegugu. Kideso gɛ nɔ tatɔ nɛ yɛ?”

²¹ Pɔ babhlatɔ asɛ, “Kaɖɔa nɛ ke di nu anɔ nɛ gɛ ɔfufɔɛzizi lo tsri yɛabha nɛa yɛ. Ɔfufɔɛzizi lɔ bɔ na awɔ̃hũ danɛ kɔ anhũpu?”

Yuɖanɛ Tɛ Mayɛkɛŋa

²² Ɔkɛlɛ Tɛbubukasɛ kiwui nɛ ba nɛ Yerusalɛm. Kibe lɛlɛ nɛ dzi bublɔɛ bɛ,

²³ klɛ Yesu anyɔ kpayavu nɛ be, nɛ Solomon Kagba nɛesi.

²⁴ Yuɖanɛ ba za kana yɛ, klɛ ba ɖɔ sɛ, “Kɛlɛ dze ɔpɛɛ sɛ tɛ lɛ dze flogo tɛ obu lɔ nɛ sasuma nɛ mɛ? Onugɛ wɔ nu Kristo tsre lɔ wee.”

²⁵ Yesu ebushunu sɛ, “Ɛtɛ tsre nɔ, pɔ nɔ dɛ yɛkɛŋa. Ebuiyinanɔ gɛ ɛbhɛtɛ nɛ mɛ Aka nɛ nyi mɛ kɛ ɖɔaɖɔ kɔ mɛ,

²⁶ pɔ nɔ dɛ yɛkɛŋa alasɛ nɔ dɛ nu mɛ ibhoshi.

²⁷ Mɛ ibhoshi nɛ nu mɛ olimɛ, ɛnyi lɛ klɛ lɛ za mɛede.

²⁸ Ɛkɔ alɛ ɛkpã mabeke mabeke, klɛ lɛtɛ ba tsi, anɔnyanɔ atɛ ba bhɛ lɛ nɛ mɛ ahwɛ.

²⁹ Mɛ Aka, gɛ akɔ mɛ alɛ, etri adɛ alɛ petee klɛ anɔnyanɔ atɛ ba bhɛ alɛ nɛ ma Aka nɛ ahwɛ.

³⁰ Mɛ nɛ Aka bunu anɔ terikpo.”

³¹ Yuɖanɛ ba za yɛkɔ aklãgbu sɛ tɛ bata hu yɛ,

³² pɔ Yesu etsre alɛ sɛ, “Ɛbhɛtɛ ebuiyinɔanɔ gelee kasɛ nɔ denɔ Aka nɔ kɔ. Kiɖueɖu shu so gɛ nɔ hu mɛ aklãgbu?”

³³ Yuɖanɛ ba ɖɔ sɛ, “Bu tɛ hu wɔ aklãgbu nɛ ebuanɛ shu,” “pɔ wɔ ebuisobui so alasɛ anɔ ko wɔ nu, ɔbhɛtɛ ishu anasɛ Kpaya.”

³⁴ Yesu ebushunu asɛ, “Ba dɛ ŋlɔmɛ akpɛ wunɔ Ɛshã nɛ mɛ sɛ, ‘Mɛ ɖɔ sɛ bakpaya no nu’?

³⁵ Onugɛ Kpaya eklu alɛ sɛ ‘bakpaya,’ gɛ Kpayɛbui nɛ ba kɔ—klɛ ba tɛ ba tsyina Kpayɛbui nɛ gɛ ba ŋlɔmɛ elu—

³⁶ kide nɔ ɖɔ denɔ agɛ Aka ebu lɛ ɔtɔ anasɛ yɛnahwɛ ayɛ klɛ akpɛ yɛ nɛ kanɔ nɛ mɛ? Kɛdɛso gɛ ɔtsɔlɛ nɔ butɔ mɛ sɛ ɛɖɔ ebuisobui alasɛ ɛɖɔ sɛ, Kpaya yɛ Yi mɛ nu?

³⁷ Nɔ tɛ yɛkɛ mɛabhaŋa ɔdɔtɔnɔ sɛ ɛbhɛtɛ ebui gɛ mɛ Aka sɛ ɛbhɛtɛ.

³⁸ Pɔ onugɛ ɛbhɛtɛ lɛ, tsyɛ kɛlɛmɛ nɔ dɛ yɛkɛ mɛabhaŋa, nɔ yɛkɛ ebuiyinɔanɔ nɛabhaŋa, sɛ tɛ nɔ bɔ ti tɛ nɔ nu kilɛesi sɛ Aka na lɛ mɛ mɛ klɛ mɛ lɛ Aka nɛ mɛ.”

³⁹ Ba za pɛɛ sɛ tɛ be vu yɛ, pɔ ekoeyi nɛ balɛ ahwɛ.

⁴⁰ Kɛlɛ Yesu etsodzi avɛ kede ada tsyɔkɛ Yɔdan ɔkɛlɛ gɛ Yohanɛsɛ azà pɛ akpɛ buni kɛvuvɔ be. Ɔkɛlɛ nɛ aza,

⁴¹ klɛ banɔ gelee ba ba yɛ ɔkɔ. Baɖɔ sɛ, “Kɛlɛlɛmɛ sɛ Yohanɛsɛ adɛ bhɛtɛ kɛdɔmumɔ gɛ yinɔanɔ, ebui nɛ petee gɛ Yohanɛsɛ aɖɔ denɔ anyɛ shu le nu kɛgbɛagba.”

⁴² Klɛ nɛ ɔkɛlɛ banɔ gelee ba yɛkɛ Yesu abhaŋa.