Yohanɛsɛ 1 - ONUGBÙ NYƐNYÃ VUVƆ

Kibui Nɛ Badzi Ishuidzya

¹ Nɛ kesikpɛkpɛ Kibui nɛ lɛ, klɛ Kibui nɛ lɛ plɛnɔ Kpaya, klɛ Kibui nɛ kɛlɛ nu Kpaya.

² Aza plɛnɔ Kpaya nɛ kesikpɛkpɛ.

³ Ganɔ yɛ abha ba bhɛtɛ kɛdɔnyɛdɔ, yɛ mazɛlɛmɛ ba gɛ ta bhɛtɛ kɛdɔnyɛdɔ gɛ ba bhɛtɛ.

⁴ Yɛ mɛ ɛkpã za, klɛ ɛkpã lɛlɛ ba dzi kifu gɛ deke kɔ banɔ.

⁵ Kifu nɛɛ deke nɛ otumu nɛ mɛ, pɔ otumu nɛ odi nui lɛe si.

⁶ Ɔkɛlɛ anɔ teli ába gɛ yɛ ba kpɛ denɔ Kpaya ɔkɔ, yɛ nyi kɛlɛ dzi Yohanɛsɛ.

⁷ Abá anasɛ ebuimɔɖɔ denɔ kifui lɛlɛ nɛ shu, sɛ tɛ ganɔ yɛ abha banɔ petee ba yɛkɛaŋa.

⁸ Yɛ nahwɛ edinu kifu, yɛ aba anasɛ kibuimɔɖɔ kɔ kifu ko.

⁹ Kifu gbɛagba gɛ kɛ kɔ kifu anɔnyanɔ gɛ aba kanɔ nɛ mɛ.

¹⁰ Aza kanɔ nɛ mɛ, klɛ kɛbɛlɛmɛ sɛ babhɛtɛ kanɔ nɛ aganɛ yɛ abha, kanɔ nɛ kediti yɛ.

¹¹ Aba ɔkɛlɛ gɛ lɔ dzi yɛ nahwɛ ɔkɔ, pɔ yɛ nahwɛ ayɛ ba dɛ yɛkɛ yɛ.

¹² Pɔ kɔ bagɛ balɛ petee gɛ bayɛkɛ yɛ, kɔ bagɛ ba yɛkɛ yɛ nyi nɛa bha ŋa, akɔ alɛ kidzo sɛ tɛ ba be dzi Kpaya yɛeyialɛ—

¹³ banuvɔ gɛ ba dɛ mɔa lɛ aganɔ tɛmumɔɛ dzo nɛa bha, ɔdɔgɔsɛ ganɔ anɔdzyrame tɛtutrɔ mɛ ɔdɔgɔsɛ adzɛenyine tɛpɛpɛɛ nu, pɔ Kpaya mɛ la mɔa lɛ.

¹⁴ Kibui nɛ badzi ishuidzya klɛ abhɛtɛ yɛ ɔzakɔ nɛ bulɔɛ mɛ. Bumɔ yɛ ishubhubhui, ishubhubhui Terikpoe lɛlɛ klɛ Ɛlɛ ko, gɛ aba denɔ Aka nɛ ɔkɔ, gɛ eyuku nɛ ɛyamyuyɔ anɛ kɛgba.

¹⁵ Yohanɛsɛɛ aɖɔaɖɔ denɔ yɛ shu. Akpɛ ogugu, aɖɔ sɛ, “Anyɛ anɛ yɛ bui mɛ ɖɔ, ‘Yɛ agɛ aba nɛ mɛede etri adɛ mɛ alasɛ alɛ flogo gɛ ba mɔ mɛ.’ ”

¹⁶ Denɔ yɛ ɛyɛmɛyuyɔ nɛna mɛ bulɔ petee bu yɛkɛ tɛyuyula trikpo nɛ aglɔ ede.

¹⁷ Alasɛ ba kɔ ɔshã ganɔ Mose abha, ɛyɛmɛyuyɔ anɛ̀ kɛgba nɛ ba ganɔ Yesu Kristoa bha.

¹⁸ Anɔnyanɔ aka mɔ Kpaya edi, pɔ Kpaya Eyi nɛ̀ Terikpo, gɛ alɛ Aka nɛ wã, ye abhɛtɛ sɛ bu ti yɛ.

Yohanɛsɛ Enikpɛ Adɛ Dɛmɛ Asɛ Enu Kristo

¹⁹ Ɔtsyɔnɛ kɛnɛ kɛlɛ nu Yohanɛsɛ kibuimɔɖɔ kibe lɛlɛ gɛ Yuɖanɛ nɛ Yerusalɛm bakpɛ kpayazakɔ banɔ nɛ̀ Lewi banɔ sɛ be debisi yɛ anɔ nɛ gɛ enu.

²⁰ Edi gbe sɛ etebuaɖɔ, pɔ ebuaɖɔ wee sɛ, “Anɛ mɛ nu Kristo.”

²¹ Be bisi yɛ asɛ, “Kɛlɛalɛ ane wɔ onu? Wɔ nu Eliya?” Aɖɔ sɛ, “Anɛ yɛ mɛ nu.” “Wɔ nu Atɔnu?” Ebui lɛ nu asɛ “Oo.”

²² Gɔgɔɛ ba ɖɔ sɛ, “Ane wo nu? Kɔ lɔ ishunu bubu tɛ bu yɛkɔ tsodzi ɔvɛnɔ bagɛ bakpɛ lɔ. Kide wɔ ɖɔ denɔ wɔ nahwɛ shu?”

²³ Yohanɛsɛ aɖɔ tsre alɛ nɛ atɔnu Yezaya ebuiɖuɖɔ, “Mɛ nu olimɛ gɛ lɔ klu nɛ ayakpa sɛ, ‘Nɔ bu kidzo dzyudzyɔ kɔ Apalete.’ ”

²⁴ Ɔtsyɔnɛ Farisianɛ teli gɛ ba kpɛ

²⁵ be bisi yɛ asɛ, “Kɛlɛ kide so gɛ ɔkpɛ buni onugɛ wɔ odunu Kristo, ɔdɔgɔsɛ Eliya, pɛ Atɔnu?”

²⁶ Yohanɛsɛ aɖɔ sɛ, “Mɛ ɛkɛuni nɛ buni, pɔ wunɔɛ mɛ anɔ teli alɛ gɛ nɔ ti nyi.

²⁷ Yɛ nu anɔ nɛ gɛ aba ba nɛ mɛede, klɛ yɛ ɔtsrɛklɔ ohui tsyɛ ɛtɛ bana bulɛ.”

²⁸ Anɛ petee aba lɛmɛ nɛ́ Betani nɛ Yɔdan kapɛ bhla, ɔkɛlɛ gɛ Yohanɛsɛɛ akpɛni.

Yesu Kpaya Obhoshieyi

²⁹ Kiwui bhla nɛ Yohanɛsɛ amɔ Yesu aba yɛ ɔkɔ klɛ aɖɔ sɛ, “Di, Kpaya Obhoshieyi, agɛ yɛ ayɛkɔ kanɔɛmɛ ebuizizi nɛ ashɛ̃nɔ!

³⁰ Ye nu agɛ yɛ bui mɛ ɖɔ kibelɛlɛ nɛ sɛ, ‘Anɔ nɛ gɛ àba nɛ mɛede, etriadɛ mɛ alasɛ alɛ flogo gɛ ba mɔ mɛ.’

³¹ Mɛ nahwɛ ɛdɛ ti yɛ, pɔ kibuinɔ nɛ so gɛ ɛkpɛuni nɛ̀ buni kɛlɛesi kɛlɛ nu sɛ tɛ be bu yɛ akasɛ Izraɛl banɔ.”

³² Ɔkɛlɛ Yohanɛsɛ akɔ yɛ kibuimɔɖɔ nɔ asɛ: “Ɛmɔ Ɔfufɔɛ nɛ gɛ lɔ zhi de owũsise anasɛ kitsanɛmɛ azhɔɛ klɛ lɔ wɔ yɛ abha.

³³ Ɛgɛ ta ti yɛ, ɔdɛsɛ anɔ nɛ gɛ akpɛ mɛ sɛ tɛ ɛkpɛuni kɔ banɔ nɛ buni yɛ tsre mɛ, ‘Anɔ nɛ gɛ nɔ mɔ sɛ Ɔfufɔɛ nɛ zhi ba klɛ lɔ wɔ, yɛ nu agɛ aba kpɛni nɛ̀ Ɔfufɔɛ Dzyɔgo.’

³⁴ Ɛmɔ klɛ ɛmɔɖɔ sɛ yɛe nu Kpaya yɛ Yi.”

Yesu Yɛ Badɔkpasɛ Tutɔpu

³⁵ Kiwui bhla Yohanɛsɛ aza za ɔklɛ nɛ̀ yɛ badɔkpasɛ tɛabha.

³⁶ Gɛ amɔ Yesu afla, aɖɔ asɛ, “Nodi, Kpaya Obhoshieyi!”

³⁷ Gɛ badɔkpasɛ tɛabha benu sɛ aɖɔ kibui nɛ, ba tɔnɔ Yesu.

³⁸ Gɛ Yesu etsyina di ɛbha, amɔ sɛ batɔ nɛ yɛ klɛ ebisi alɛ sɛ, “Kide nɔ pɛɛ?” Ba ɖɔ sɛ, “Rabbi” (kɛlɛesi klɛnu sɛ Adɔkasɛ), “fakɔ wɔ lɛ?”

³⁹ Klɛ etsre alɛ sɛ “Ba, klɛ nɔ bɔ mɔ.” Kɛlɛso ba vɛ klɛ ba da mɔ ɔkɛlɛ gɛ alɛ, klɛ ba za yɛ ɔbha kiwui lɛlɛ. Kɛ za anasɛ ɔwlago ɔɖɔ tɛta tɛlɛ̃.

⁴⁰ Andrɛasɛ, Simɔn Petro ya dzya, gɛ enu banɔ tɛabha nɛ teli gɛ enu kibui nɛ gɛ Yohanɛsɛ aɖɔ klɛ agɛ atɔnɛ Yesu.

⁴¹ Kibui tɛtɔpu gɛ Andrɛasɛ abhɛtɛ klɛ nu sɛ, tɛ apɛɛ yadzya Simɔn klɛ etsre ye asɛ, “Bu mɔ Mezaya” (ye nu, Kristo).

⁴² Klɛ agbanɛ Simɔn avɛnɔ Yesu. Yesu edi yɛ klɛ aɖɔ sɛ, “Wɔ nu Simɔn Yohanɛsɛ ye yi. Be be klu wɔ asɛ Kefasɛ” (gɛ, be builɛesi sɛ, Petro).

Yesu Eklu Filipo Anɛ Nataniɛl

⁴³ Kiwui bhla nɛ Yesu apɛɛ sɛ tɛ avɛ Galelia. Gɛ amɔ Filipo, aɖɔ etsre yɛ asɛ, “Za mɛede.”

⁴⁴ Filipo, anasɛ Andrɛasɛ anɛ Petro be de ɔma nɛ gɛ be klu asɛ Betaida.

⁴⁵ Filipo amɔ Nataniɛl klɛ etsre yɛ asɛ, “Bu mɔ anɔ gɛ yɛ shu Mose aŋlɔmɛ dɔ nɛ Ɛshã keplukpa nɛ mɛ, klɛ yɛ shu batɔnu tsyɛ aŋlɔmɛ—Yesu ede Nazarɛtɛ, Yosɛfu ye yi anyɛ.”

⁴⁶ Nataniɛl ebisi asɛ, “Nazarɛtɛ! Kibui dzyɔgo tili ba de ɔkɛlɛ?” Filipo asɛ, “Ba tɛ ɔbo di.”

⁴⁷ Gɛ Yesu amɔ Nataniɛl gɛ etsoaba, aɖɔ nɛ yɛ shu asɛ, “Yɛ nu Izraɛl eyi gbɛagba, kibinyɛbi ma yɛ shu.”

⁴⁸ Nataniɛl ebisi Yesu asɛ, “Kɛlɛ ɔyɛkɔ nyi mɛ?” Yesu ebuilɛnu asɛ, “Ɛmɔ wɔ kibelɛlɛ gɛ ɔza kabhɔosi nɛesi flogo gɛ Filipo eklu wɔ.”

⁴⁹ Ɔkɛlɛ Nataniɛl ebu aɖɔ sɛ, “Rabbi, wɔ nu Kpaya yɛ Yi, wɔ nu Ekusi nɛ Izraɛl.”

⁵⁰ Yesu aɖɔ asɛ, “Nɔ yɛkɛŋa alasɛ ɛtsre wɔ sɛ, ɛmɔ wɔ nɛ kabhɔosi nɛesi. Ɔbɔ mɔ ebui gbɛgbla dɛ ana.”

⁵¹ Kɛlɛ azaɖɔ sɛ, “Itsre nɔ kibui gbɛagba sɛ nɔ bɔ mɔ owũsise lɔ bɔ danɛ klɛ Kpaya yɛ baxwɛdɛ ba baza ewu klɛ baza ezhi aba nɛ Anɔdzyrame Yi nɛabha.”