Yakobo 5 - ONUGBÙ NYƐNYÃ VUVƆ

Awɔ̃lulu Kɔ Behueielete Gɛ Bee Tii Anɔ Akpɛesi

¹ Ɔtsɔ̃ nɛɛ nɔ tatɔ, wɔnɔ behoeyielete, no bi iyuyo tɛ nɔ wa awewe ɔkpɛ same mamɔmamɔ nɛ gɛ aba ba wɔnɔa bha nɛ so.

² Wɔnɔ kɛnɔmɛdɔ nɛ tɛ tsɔmɔ, klɛ ba gbagblahudzya atɛ tã nɔ apɔtɛ.

³ Wɔnɔ sɛkadzɛdzã anɛ efufu nɛ eti dzyewule. Balɛ budzyewule nɛ ba bhui nɔ nu klɛ bu ba tã wɔnɔɛ dzya ansɛ kifu. No kpu kɛnɔmɛdɔ nɛ ewi gɔgɔɛ nɛm.

⁴ No di! Kɛbhɛ nɛ gɛ no gbe ɔdɛ buya kɔ baxwɛwa nɛ gɛ ba dzya nɔ baya nɛ mɛ be bi iyuyo akpɛ nɔ. Bagɛ be bu wɔɛ dɔ nɛ iyuyo nɛ tɛ da ku Apalete nɛ gɛ Adɛ nɛ batɔm.

⁵ Nɔ tɛ za kanɔa nɛm nɛ kɛdɔ gɛ kpɛ anɔ same nɛ ishu-mumunɔm. No ti lubɔ kɔ wɔnɔ tiyiyi wi.

⁶ No ti bu bagɛ ba dɛ bhɛtɛ kɛdɔnyɛdɔ nɛ kɛpɔ klɛ no yia lɛ, gɛ ba dɛ lɔ kititi nɛ wɔnɔ shu.

Tɛdɛdɔfɔɔ̃ Nɛ Butɔm

⁷ Kɛlɛa lɛ, madzyalɛ mɔ, nɔ dɔ fɔ̃ɔ, ɔdɔ nanɔ Apalete nɛ tɛbɛba. No di kana gɛ ayadɛ nɛ eepo kesukpa nɛ asɛ tɛ ke yu kɛdɔɖɛɖa nɛ kana gɛ adɔ fɔ̃ɔ eepo subhavuvɔ anɛ ekukum ayɛ nɛ tɛbɛba.

⁸ Wɔnɔ tsyɛ, nɔ dɔ fɔ̃ɔ tɛ nɔ za gɛganɛ, alasɛ Apalete nɛ tɛbɛba tsuu ba.

⁹ Nɔ tɔɔ kpamɛ ishu nɛ ɔhaglɔ, madzyalɛ mɔ, odi nu kana tɛ be be kluebhui nɛ wɔnɔ. Ebhuiklu nɛ eli kititi nɛ kedunu!

¹⁰ Badzya mɔ, ansɛ diɔbhɛtɛ na nɛɛ nɛ tɛdɛdɔfɔ̃ɔ nɛ butɔ mɛɛ, nɔ yɛkɔ batɔnu nɛ gɛ baɖɔaɖɔ nɛ Apalete nɛ kinyi mɛ.

¹¹ Ansɛ gɛ no nyi, bu di banɔ nɛ gɛ be tsianyɛ sɛ ba tɛ yuyula lɛ. No ti nu Yobɛ kanyɛtsitsi klɛ nɔ tɛ mɔ kɛdɔnɔ nɛ gɛ Apalete nɛ abhɛtɛ nɛ kɛlɛ shu gɔgɔɛ. Apalete nɛ eyuku nɛ eyampɛpɛ̃ anɛ eshutukubui didi.

¹² Nɛ kɛlɛ peteea bha, madzyalɛ mɔ, nɔ tɛ tanɔ kɛdɔ—owũsise o, kesukpa o, ɔdɔgɔsɛ kɛdɔnyɛdɔ. Kɔ wɔnɔ “Ee” nɛ edzi ee, tɛ wɔnɔ “Owo” nɛ edzi owo, odi nu kana be be bu nɔ kɛpɔ.

Tɛyɛyɛkɛŋa Kpayakuklu

¹³ Wɔnɔ ɔmayɛ teli akpasɛ butɔm dza? Alasɛ tɛ eklukpaya. Anɔ teli aamɔ same dza? Kɔ yɛ azha kabhakpɛkpɛ ɛdzɛ.

¹⁴ Wɔnɔ ɔmayɛ teli anya xãa? Eklu busɔlɛɔha mɛ banɔ shishe tɛ be klukpaya nɛ yɛ tɔkpu tɛ ba sra bubɔ akɔ yɛ nɛ Apalete nɛ kinyim.

¹⁵ Klɛ kpayakuklu nɛ gɛ ede tɛyɛyɛkɛŋam nɛ aba bhɛtɛ anyɛnya nɛ bunya lu ba beke, Apalete nɛ ebe feke yɛ ewunɔ. Onu gɛ kɛlɛ sɛ abhɛtɛ buzizi, ba ba yɛkɔ etsye yɛ.

¹⁶ Kɛlɛso nɔ danɛ wɔnɔ buzizi nɛm ɔkɔ aglɔ tɛ no klukpaya nɛ aglɔɛ tɔkpu sɛ tɛ wɔnɔ banya nɛ be beke. Anɔnɛna kpayakuklu nɛ alɛ kemi klɛ awa kɛxwɛ.

¹⁷ Eliya edzi anɔ ko ansɛ bulɔ. Eklukpaya gɛganɛɛ asɛ subha atɛ dɔ, klɛ adɛ dɔ abalɛ kesukpa nɛ agɔ tata nɛ kapɛ mɛ.

¹⁸ Eze klukpaya, klɛ owũsise nɛ ɔkɔ subha, klɛ kesukpa nɛ ke bu kɛŋɛŋa.

¹⁹ Madzyalɛ mɔ, onu gɛ wɔnɔ ɔmayɛ teli aba lɛla nɛ kɛgba nɛ shu pɛ anɔ teli aba gbanɔ yɛ etsodzini amɛna nɛɛ,

²⁰ nɔ baka kibui nɔ sɛ: Anɔyanɔɛdi gɛ ebe tsyina anɔ ashɛnɔ nɛ yɛ buzizi kidzoa bha nɛɛ ebe bu yɛ nɛ butsi mɛ klɛ aba da buzizi gelee dɔ.