Yakobo 4 - ONUGBÙ NYƐNYÃ VUVƆ

Yɛkɔ Shu Ɔkpɛ Kpaya Kesi

¹ Kide gɛ mɛna ekpli anɛ ebla pɛpɛɛ nɛ wɔnɔɛ shi? Ganɛ wɔnɔ kɛdɔpɛpɛɛ nɛ gɛ ta keyu nɛ wɔnɔ mɛ nɛ kii de?

² Nɔ pɛɛ kɛdɔ tili pɔ nɔ tɔ mɔɛ lɛ. No yi anɔ klɛ nɔ bhɛ kɛdɔ, pɔ nɔ tɔɔ mɔ kɛgɛ nɔɔ pɛɛ. Nɔ pɛɛ ebla klɛ nɔ ta ekpli. Kɛdɔ ma wɔnɔ ahwɛ, alasɛ no too bisi Kpaya.

³ Onu gɛ noo bisi, nɔ tɔɔ mɔ ɔyɛkɛ, alasɛ noo bisi nɛ atɔkpum kpã, sɛ tɛ kɛgɛ nɔɔ mɔ tɛ nɔ yɛkɔ ŋa ɛkpã nɔ.

⁴ Wɔnɔ banɔ gaa dɛ ɔmamɛ, no ti nyi ɔsɛ kɛbhɛam zɛza nɛ kanɔ nɛɛ kinu Kpaya mapɛmapɛ? Anɔnyanɔ gɛ ayɛkɔ asɛ ebe dzi kanɔa nɛ mɛ ɔbhɛa nɛɛ, ebe dzi anɔ gɛ alɔ kititi nɛ Kpaya shu.

⁵ Pɛnɔɔ nɔ bhɛtɛ kɛtɔkpum sɛ buwã nɛ kuwã Kɛdɔŋuŋlɔmɛ nɛ ɖɔ sɛ ɔfufɔɛ nɛ gɛ ba kɔ sɛ lɔ za lɔ mɛ nɛ lɔ lɛ nɛ kawɔ̃kpɛ gɛganɛɛ?

⁶ Pɔ akɔ lɔ ɛyamyuyɔ gelee. Kɛlɛ so pɛ Kɛdɔŋuŋlɔmɛ nɛ ɖɔ sɛ, “Kpaya alɔ kititi nɛ agɛ efekeshu nɛ shu pɔ akɔ agɛ ezhinɔ ishuesi nɛ ɛyamyuyɔ.”

⁷ Klɛalɛ, nɔ bubɔ shu, ɔkɔ Kpaya. Nɔ tɛ yɛkɔ ishu ɔkɔ ɔfufɔɛkpã, klɛ lɔ bɔ shɛ nɛ wɔnɔ ɔbha.

⁸ Tsuobunɔ Kpaya klɛ yɛ tsyɛ ebe tsuebunɔ nɔ. No plu wɔnɔ ahwɛ, wɔnɔ bagɛ abhɛtɛ buzizi, tɛ no xule nɔ idzyim, wɔnɔ atɔkpum tabha-elete.

⁹ Nɔ tɔ, no tsishu tɛ nɔ wa awowoe. No tsyina wɔnɔ kɛmɔɛ nɛ ɔkpɛ ishutsitsim tɛ wɔnɔ same nɛ edzi awɔ̃gɛganɔ.

¹⁰ Nɔ nyɛnashu nɛ Apalete nɛ amɛ, klɛ ebe feke nɔ ewunɔ.

¹¹ Badzya mɔ, no ti zi aglɔ shu. Anɔnyanɔ gɛ aɖɔaɖɔ kpã nɛ yadzya shu ɔdɔgɔsɛ ekluebhui nɛ yɛ aɖɔaɖɔ kpã nɛ ɔshã nɛ shu klɛ ekluebhui nɛ ɔlɛ. Onu gɛ okluebhui nɛ ɔshã nɛɛ, anɛ ɔlɛabha ɔbhɛtɛ, pɔ ozhiodzi kebhuikuklum nɛ ɔlɛa bha.

¹² Ɔshãelete anɛ ebhuiklu terikpo ko yɛa lɛ, agɛ yɛ aba na anɔ bu klɛ aba na kɛdɔ zi. Pɔ wɔnɔ—ane no nu pɛ no bo kluebhui nɛ wɔnɔhayɛalɛ?

Ishufifeke Nɛ Kivu Shu

¹³ Ɔtsɔ̃ nɛɛ tatɔ tɛ onu, wɔnɔa gɛ ɔɖɔ sɛ, “Obo ɔdɔgɔsɛ kivu bu ba vɛ ɔkɛ̃ ɔdɔgɔsɛ ɔmagbla nɛ mɛ, no do zi kɛgɔ zɛzɛ nɛ ɔklɛ, nɔ dɔ vɛ wɔnɔ kɛxwɛa bha klɛ nɔ bhɛtɛ kɔba.”

¹⁴ Kide so, pɛ no ti nyi kɛgɛ ba ba kɛlɛ mɛ nɛ kivu mɛ tsyɛ. Kide gɛ nu wɔnɔ ɛkpã? No nu ɔmunɔ gɛ ɔɔwɛ̃ pɛ kɛbɔɛ ko loo tsodzi ɔlɛla.

¹⁵ Analo, alasɛ tɛ nɔ ɖɔ sɛ, “Onu gɛ kii nu Apalete nɛ tɛpɛpɛɛ, bu ba za nɛ ɛkpã klɛ bu ba bhɛtɛ kɛɛ nɛ ɔdɔgɔsɛ kɛɛ nɛ.”

¹⁶ Ansɛ gɛ ki dzi nɛɛ, no fekeshu klɛ no bu onugbum. Ishufifeke lɛlɛ nɛ nu butsutsɔmɔ.

¹⁷ So, anɔnyanɔ, gɛ enyi kibui dzyɔgo nɛ gɛ kɛlɛ sɛ tɛ abhɛtɛ klɛ ataa bhɛtɛ nɛɛ, abhɛtɛ buzizi.