Yakobo 3 - ONUGBÙ NYƐNYÃ VUVƆ

Kɛnɛkɛ Tɛkpɛkpaka

¹ Madzyalɛ mɔ, ganɛ wɔnɔ banɔ gelee balɛ alɛ asɛ tɛ ba bhɛtɛ shu ansɛ badɔkasɛ, alasɛ no nyi ɔsɛ bulɔa gɛ bu kasɛ kɛdɔ nɛɛ, be be kule bhui nɛ lɔ gɛganɛɛ ɔyɛkɔdɛ.

² Bulɔ petee bu kpatanɔ kɛdɔ nɛ edzo geleea bha. Onu gɛ anɔnyanɔ aka bhɛtɛ kito nɛ yɛ kibui nɛ gɛ aɖɔ nɛ mɛɛ, enu anɔ gɛ ana, aba na yɛ ishu nɛ peteea bha di.

³ Kibelɛ gɛ bu yɛkɔ ɛɖa kpɛ ba sɔ inugbu sɛ tɛ ba ta lɔa tɔ nɛɛ, bu ba na aga nɛ petee bu tsyina.

⁴ Yɛkɔ keniabha ipupu ansɛ tɛdidibhɛtɛ. Kɛnya lɛ kɛlɛm sɛ lɛ tri piim klɛ kɛlɛɛ gɛganɛ kɛlɛ tii lɛ, pɔ ɔɖɔ bhli toli ko agɛ eebu ɔlɛ nɛ ayɛkɔ etsyita ɔlɛ nɔ vɛnɔ ɔkɔnyɔkɔ gɛ apɛɛ.

⁵ Kana ke kɛnɛkɛ nɛ nu ishuidzya nɛ kapɛ bhli tieli ko, pɔ kɛɛ bhɛtɛ ishu fifekegbla. Di kɛdɔnɔ nɛ gɛ ayɛgbla enu flogo pɛ kifu bhli ko kɛlɛ shɔ yɛ kifu.

⁶ Kɛnɛkɛ nɛ tsyɛ nu kifu, kanɔ mɛ butsutsɔmɔ anɛ ishuidzya nɛ bupɛ tuli. Kii zi anɔ osi nɛ petee, kɛɛ shɔ anɔ ɛkpã zɛza nɛ petee kifu, klɛ kɛlɛnahwɛ nɛ kɛɛ shɔ ishui fu ganɔ kifu mabeke mabekea bha.

⁷ Baga kanyakaɛdi, buzhɔɛ, baga gee tsi nɛesukpa anɛ aƒu mɛ baga nɛ petee ba gbanɔa lɛ klɛ anɔdzyrame atɛ kɔ la mɔawɔ̃,

⁸ pɔ anɔnyanɔ atɛ ba na kɛnɛkɛ nɛ xũ bhɛtɛ sɛ tɛ kɛ mɔawɔ̃. Kɛnu butsutsɔmɔ gɛ tɛɛ muene, kɛ yuku nɛ aɖi kɛtɛkɛtɛ.

⁹ Kɛnɛkɛ nɛ bu yɛkɔ kpɛ bulɔ Apalete anɛ Aka nɛ kabha, klɛ kɛlɛ lɔ yɛkɔ ɖɔɛ bui kpɛ banɔ, gɛ ba bhɛtɛ nɛ Kpaya tɛzɛzam.

¹⁰ Onugbu torikpo ɔlɛ nɛm anɔ kabha kpɛkpɛ anɛ kibui ɖuɖɔ kpɛ anɔ de. Madzyalɛ mɔ, kɛma sɛ kibui nɛ za kana.

¹¹ Buni mumɔ anɛ ɔmɔɛni ɔbɔ na koeyi denɔ tisimonidi torikpom xãa?

¹² Madzyalɛ mɔ, kabhɔosi tsyɛ ɔbɔ na okutu yu, ɔdɔgɔsɛ grepɛhui yu kabhɔ eyuyu xãa? Kana bumɔɛ onidi tsyɛ ɔtɛ bɔ kɔ buni wɛ̃wɛ̃ dzyɔgo.

Kibuinyinyi Editabha

¹³ Ane gɛ enyibui pɛ enu kibuiesi nɛ wɔnɔɛ shi? Kɔ ebui lɛ akasɛ ganɔ yɛ ɛkpã dzyɔgo nɛm, ganɔ ebui bhɛbhɛtɛ anɛ ishu zhizhinɔesi nɛ gɛ de kibuinyinyi mɛ.

¹⁴ Pɔ onu gɛ ɔbala kawɔ̃kpɛ kɛtɛkɛtɛ anɛ ishuiyɛ pɛpɛɛ nɛ wɔnɔ idzyi mɛɛ, no ti feke ishu nɛ kɛlɛ shu ɔdɔgɔsɛ nɔ shɛnahwɛ kɛgba nɛ shu.

¹⁵ “Kibuinyinyi” lɛ nɛɛ di de owũsise ba pɔ ki nu kesukpɛa bha kibui, kidɛ de ɔfufɔɛ mɛ, ki de Abosamu ɔkɔ.

¹⁶ Alasɛ ɔklɛ gɛ kawɔ̃kpɛ anɛ ishuiyɛ pɛpɛɛ lɛ, ɔklɛ ɔbɔ mɔ kanya anɛ butsutsɔmɔ kanyakɛdi kɛxwɛwɛwa.

¹⁷ Pɔ kibuinyinyi nɛ gɛ de owũsise, putɔnɔ nɛɛ, kɛlɛ shu petee bhui, klɛ ishuyuyɔ— tɛdɛdɛmɛnɔ, tɛyɛyɛkɔ nɛ lɛm, ishu zhizhinɔesi, tɛyuyuku nɛ eshutukubui didi nɛ eyuyu dzyɔgo, anɔamɛ madimadi anɛ kidzo tirikpom nyɛnyɛna vunɔ.

¹⁸ Beboevu nɛ gɛ ba ɖa kɛdɔ nɛ ishuyuyɔ mɛ be bu tɛzɛza dzyɔgo mɛ dɔ.