Yakobo 1 - ONUGBÙ NYƐNYÃ VUVƆ

¹ Mɛ Yakobo, Kpaya nɛ Apalete Yesu Kristo axwɛdɛ, Kɔ amadi lɔfɔntabha nɛ amadi nɛshi: Ɛsɛnɛ nɔ.

Tɛfifekedi Nɛ Tɛhuhwanɔdi

² Madzyalɛ mɔ, no di lɛ ɔsɛ same dzyɔgo, onu gɛ no tsoku tɛfifekedi edidedi gelee mɛ,

³ alasɛ no nyi ɔsɛ wɔnɔ tɛyɛyɛkɛŋa tɛfifekedi nɛ bhɔ nɔ kanyɛtsitsi nɛ trɔ.

⁴ Kanyɛtsitsi alasɛ tɛ ka wa kalɛ kɛxwɛ nɛ beke sɛ tɛ no she tɛ nɔna, nɔ tɛ za sɛ kɛdɔ tili ma wɔnɔ ahwɛ.

⁵ Onu gɛ kibuinyinyi kɛɛ ma wɔnɔmɛayɛ teli ahwɛ, alasɛ tɛ ebisi Kpaya, gɛ yɛakɔɛdɔ fãa kɛpɔ mazɛlɛ shu, klɛ bá ba yɛkɔ kɛlɛ akɔ yɛ.

⁶ Pɔ onu gɛ ebisi, alasɛ tɛ ayɛkɛaŋa klɛ eti di kɛlɛ asɛ otro, alasɛ anɔ nɛ gɛ atɛ yɛkɛaŋa nɛ edzi ansɛ aƒu mɛ bunigiglebe, gɛ kɛlɛɛ fu kana.

⁷ Anɔa lɛlɛ nɛ atɛ bhɛtɛ kɛtɔkpum asɛ aba yɛkɛ kɛdɔnyɛdɔ edenɔ Apalete nɛ ɔkɔ;

⁸ enu anɔ gɛ akpɛ atɔkpum tabha, ataa dzrɔ nɛ tirikpo shu abhɛtɛ.

⁹ Adzya nɛ gɛ anyɛna shu nɛ kibuinyɛbui mɛ kɛlɛ sɛ tɛ efeke shu nɛ yɛ ɔzakɔ ɖɛɖama.

¹⁰ Pɔ anɔ nɛ gɛ ehoeyi alɛ yɛahwɛ efeke shu nɛ yɛ ɔzakɔ zhizhiesi, alasɛ yɛ ebe fu afla ko ansɛ ayakpam efufu.

¹¹ Alasɛ kiwi kɛɛ yɛɛ nɛ buhuhuhu klɛ kɛɛ tãyɛ̃ tɛwa; kɛlɛ tɛbubule nɛɛ zhiesi klɛ kɛlɛ tɛpupudi nɛ zi. Kidzoɛ lɛ nɛa bha ke, ehoeyielete nɛ aba kpã ashɛ afla onu gɛ kɛɛ dzi sɛ etsri yɛ kɛxwɛa bha tsyɛ.

¹² Ba yula anɔ nɛ gɛ akpɛemi nɛ yɛ tɛfifekedi mɛ, alasɛ onu gɛ ana kɛlɛ nu za nɛɛ, aba yɛkɛ ɛkpã kikutu nɛ gɛ Kpaya aɖɔ asɛ aba kɔ bagɛ ba ɖɔ yɛ.

¹³ Kibe lɛ gɛ tɛfifekedi ba nɛɛ, anɔnyanɔ atɛ ɖɔ sɛ, “Kpaya efeke mɛ edi.” Alasɛ Kpaya nɛɛ ɔfufɔɛkpã ɔtɛ bɔ na yɛ bu fekedi, ɔdɔgɔsɛ yɛ efeke anɔnyanɔ edi,

¹⁴ pɔ be be feke anɔnyanɔ edi, ganɔ yɛnahwɛ butsutsɔmɔ nɛ bisi nɛ gɛ bu bisi, be be he yɛ ebueyinɔ ada wɛɛ.

¹⁵ Klɛ, nɛ kɛlɛede pɛ tɛpɛpɛɛ ba munɔ ɛya nɛɛ, kɛɛ mɔ buzizi, klɛ buzizi, onu gɛ bushe mɔmɔ, buu mɔ butsi.

¹⁶ Ba tɛ wɛɛ nɔ, madzyalɛ dzyɔgo mɔ.

¹⁷ Kɛdzyɔgo kanyaka anɛ kɛdɔkukɔ dzyɔgo ki de kabha, ba denɔ owũsise efu Aka nɛ ɔkɔ, gɛ yɛ ete tsyina ansɛ buyi gɛ fla.

¹⁸ Ayɛkɔ sɛ aba mɔ lɔ ganɔ kɛgba kibui nɛm, sɛ tɛ bu ba dzi eyuyu tutɔpu teli di nɛ kɛdɔ nɛ petee gɛ abhɛtɛ nɛ shi.

Tɛnunu anɛ Kɛlɛ Tɛbhɛbhɛtɛ

¹⁹ Madzyalɛ gɛ ɛɖɔ mɔ, no vu anhũ nɛ kibui: Anɔnyanɔ ahwua kɔ batɔtɛta, atɛ nawɔ̃ kɔ kaɖɔɖuɖɔ klɛ atɛ tsɔ obulo mɔ,

²⁰ alasɛ anɔdzyrame obulo nɛ ɔtɛ mɛna ɛkpã dzyɔgo nɛ gɛ Kpaya apɛɛ.

²¹ Klɛso, nɔ shɛnahwɛ ɛkpã dudɔɛbo nɛ petee shu anɛ butsutsɔmɔ nɛ gɛ gbla yuku nɛ kanɔ mɛ tɛ nɛ ishuzhizhinɔesi mɛ ɔyɛkɛ kibui nɛ gɛ ba ɖa kpɛ wɔ mɛ, gɛ kɛ ba bu wɔ.

²² Nɔ tɛ ta batɔ nɛ kibui nɛ tite ko, sɛ tɛ nɔ wɛɛ shu. Nɔ bhɛtɛ kɛgɛ kibui nɛɛ ɖɔ.

²³ Anɔnyanɔ gɛ atatɔ nɛ kibui pɔ pɛ ataa bhɛtɛ kɛgɛ kɛɛ ɖɔ alɛ ansɛ anɔ gɛ edi amɛ nɛ azhuzhɔɛ mɛ

²⁴ klɛ, onu gɛ edi shu nɛ beke, pɛ ashɛ nɛ ɔklɛ pɛ adaa dzɛkɛ kɛwɛ̃ nɛ gɛ awɛ̃ nɛ kɛdzɛkɛ tili.

²⁵ Pɔ anɔ nɛ gɛ edi ɔshã nɛna nɛm mɔmɔ gɛ ɔmɛna ishuyuyɔ, klɛ avɛ kɛlɛ tɛbhɛbhɛtɛ nɛa bha, pɛ ataa dzɛkɛ kɛgɛ enu, pɔ abhɛtɛ kɛlɛa bha— ba ba yula yɛ nɛ kɛgɛ abhɛtɛ nɛm.

²⁶ Onu gɛ anɔ teli edi shu asɛ asɔlɛ tsyɛ pɛɛ adɛ kpaka yɛ kɛnɛkɛ nɛ gɛganɛ nɛɛ, awɛɛ shu klɛ kedziŋɛŋa kanyaka ma yɛ busɔlɛ nɛ shu.

²⁷ Busɔlɛ nɛ gɛ Kpaya bulɔ Aka nɛ adɛmɛ asɛ bɔlɛ shu bhui klɛ kɛpɔ ma bɔlɛ shu, bɔlɛ nu sɛ: tɛ odi batsyavi anɛ bagɛ be tsianyɛ nɛabha nɛ balɛ ebui nɛ gɛ atrɔ balɛa bha nɛm klɛ tɛ ɔnyɛna ishu tɛ kanɔ nɛm kibo nɛ tɛ la wɔ.