Titusɛ 3 - ONUGBÙ NYƐNYÃ VUVƆ

Kɛdzyɔgo Tɛbhɛbhɛtɛ

¹ Baka banɔ nɛ sɛ ba kpɛ kɛtɔkpuesi kɔ bagɛ aŋaɛbha nɛ kabhaŋɛŋa, tɛ ba taa tɔ, tɛ ba za tɛbɛbala mɛ kɔ kɛkanyakaɛ di gɛ kɛbɔ nɛ tɛbhɛbhɛtɛ,

² ba tɛ zi anɔnyanɔ shu, tɛ ba bhɛtɛ ishuyuyɔ anɛ anhũvuvu nɛ anɔ, tɛ ɔbhɛtɛ ishubububɔ kɛgbɛagba ɔvɛnɔ banɔ nɛ petee ɔkɔ.

³ Nɛ kibe tili mɛ, bulɔ tsyɛ bu tɛ dɔ gã, bu dɛ taa tɔ, ba wɛɛ lɔ klɛ la bhɛtɛ lɔ banɔdzidzi ganɔ tɛpɛpɛɛ kanyaka di mɛ anɛ ba same mumɔm. Bu za nɛ atɔkpumkpã anɛ kawɔ̃kpɛ, ba dɛ pɛɛ bulɔɛ bui klɛ bulɔ tsyɛ dɛ pɛɛ ɔhayɛ bui.

⁴ Pɔ kibe lɛ gɛ Kpaya Agɛ ayɛkɛkɔlɔ nɛ ɛyamyuyɔ anɛ anɔ ɖuɖɔ nɛ awɛ̃,

⁵ ebu lɔ, ganɛ bulɔ ebui dzyɔgo bhɛbhɛtɛ so, pɔ alasɛ yɛ eshutukubui didi nɛ so. Ebu lɔ ganɔ bulɔ tɛtsitsodzinimɔ nɛ tɛtsidzoni ɔbhɛtɛ avuvɔ ganɔ Ɔfufɔɛ Dzyɔgo nɛa bha,

⁶ gɛ ebu abalɛ bulɔa bha anɛ eyemyuyɔ ganɔ Yesu Kristo bulɔ Anɔ nɛ gɛ ebu lɔ,

⁷ sɛ tɛ, yɛ ɛyamyuyɔ nɛ tɛ dzyɔ lɔ, bu ba dzi beyi gɛ kidzoenudidi lɛ bulɔ ahwɛ anɛ ɛkpã mabeke mabeke mɛ.

⁸ Kibui nɛ nu kibuiɖuɖɔ gɛ ba ba yɛkɛ kɛlɛa bha aŋa. Klɛ ɛpɛɛ sɛ tɛ nɔ trɔ kɛklãgbu nɛ ebuia nɛa bha, sɛ tɛ bagɛ atɛ yɛkɛ Kpayabha aŋa nɛ be luawɔ̃ tɛ ba yɛkɔ ishu etsye nɛ kibui dzyɔgo tɛbhɛbhɛtɛ mɛ. Ebuia nɛ apɛ̃ezi klɛ le be dzi kɛdɔ kɔ anɔnyanɔ.

⁹ Pɔ nɔ plɛ bugã ebla pɛpɛɛ anɛ ɛkɔɖuɖɔ anɛ ebui ŋuwlãnkɛ anɛ ebla pɛpɛɛ denɔ ɛshã nɛ shu, alasɛ anɛ nɛ ama kedzi klɛ la ma kibuinyɛbui mɛ.

¹⁰ Kpɛ ɔshã bukpɛ turukpo kɔ anɔ nɛ gɛ apɔɛ banɔɛ shi, tɛ ɔflɔ kpɛ yɛ ɔshã bubhla. Kɛlɛe de, kibuinyɛbui taa za wɔ ahwɛ kɔ yɛ.

¹¹ Ɔbɔ yɛkɛ ɔŋa sɛ anɔa lɛlɛ nɛɛ di nɛ kɛtɔkpum dɛ na klɛ abhɛtɛ ebuikpã, yɛnahwɛ nɛ eti bu ishuipɔ.

Ebuiɖuɖɔ Gɔgɔɛ

¹² Kibe lɛ gɛ ɛnya kpɛ Atemasɛ ɔdɔgɔsɛ Taitsyikusɛ sɛsɛ wɔ ko, yɛkɔ trɔ ishu tɛ ɔtɔnɔ mɛ ɔba Nikopolisɛ, alasɛ ɛtɛ trɔ sɛ ɛba za ɔkɛlɛ nɛ bublɔɛbe.

¹³ Bhɛtɛ kɛdɔnyɛdɔ gɛ ɔbɔ na bhɛtɛ sɛ tɛ ɔplɛnɔ Zenasɛ gɛ enu ɔshãnɔ anɛ Apollosɛ nɛ balɛ kidzogɛga nɛ mɛ klɛ tɛ odi kɛlɛ ɔkɔ sɛ kɛdɔnyɔdɔ gɛ ba ba pɛɛ ba mɔɛ lɛ.

¹⁴ Alasɛ tɛ bulɔkɔayɛ nɛ bakpasɛ kana gɛ ba ba yɛkɔ ishu akɔ nɛ kɛdzyɔgo tɛbhɛbhɛtɛ mɛ, sɛ tɛ ba bhɛtɛ kiwinyɛwi kɛdɔ bhɛbhɛtɛ tɛ ba tɛ za nɛ ɛkpã nɛ gɛ kɛdɔnyɛdɔ tɛ ba de kɛlɛ mɛ koeyi.

¹⁵ Anɔnyanɔ gɛ alɛ plɛnɔ mɛ asɛnɛ wɔ. Sɛnɔ bagɛ ba ɖɔ lɔ nɛ tɛyɛyɛkɛŋa nɛ mɛ. Ɛyamyuyɔ za plɛnɔ wɔnɔ petee.