Titusɛ 2 - ONUGBÙ NYƐNYÃ VUVƆ

Kɛgɛ Alasɛ Bakasɛ Banɔ Etsu Edidedi

¹ Alasɛ tɛ ɔkasɛ kɛdɔnɔ nɛ gɛ na nɛ kɛdɔkɛkasɛ dzyɔgo nɛ nu.

² Kasɛ banɔ shishedɛ nɛ kɛdɔ sɛ tɛ be dzi banɔyuyɔ, gɛ bana sɛ tɛ be bu, gɛ baŋa ishuabha, klɛ ba gɛganɛ nɛ tɛyɛyɛkɛŋa mɛ, nɛ tɛɖuɖɔ anɛ tɛzɛza gɛganɛ mɛ.

³ Kana tsyɛ, kasɛ badzɛ shishedɛ nɛ dɔ sɛ tɛ bedzi banɔ gɛ ba ba yɛkɔ tili nɛ balɛ buim nɛ ɛkpã mɛ, sɛ tɛ be ti dzi banɔ gɛ baa ga anɔesi ɔdɔgɔsɛ bulu wɛ̃wɛ̃ gelee, pɔ bakasɛ kɛdɔ nɛ gɛ bɔ.

⁴ Ka ba na bubite nɛ kɛdɔ kasɛ sɛ tɛ ba ɖɔ balɛ nyine alɛ anɛ beyi,

⁵ sɛ tɛ ba ŋa ishuabha tɛ balɛ shu bhui, tɛ ba za kɛxwɛwɛwa bha nɛ bupa mɛ, tɛ balɛ ɛyam ɛyɔ, tɛ ba za balɛ nyinealɛe si, sɛ tɛ anɔnyanɔ atɛ ɖɔ kibuikpã nɛ Kpaya bui nɛ shu.

⁶ Kana ke, kpɛ banyɛ̃sɔ nɛ kemi sɛ tɛ baŋa ishua bha.

⁷ Nɛ kibuinyɛbui mɛ, bhɛtɛ kibui dzyɔgo gɛ be be di abhɛtɛ. Nɛ wɔ kɛdɔkɛkasɛ mɛ, kasɛ ɔsɛ onu anɔ gɛ otoo hu otro, klɛ ɔtɔɔ wɔ buwɔfu

⁸ klɛ wɔ kaɖɔɖuɖɔ kana, gɛ ba tɛ ba na kalɛ bu tɛ̃, sɛ tɛ bagɛ balɔ kititi nɛ wɔshu kɛwɛ̃ kua lɛ alasɛ kibui tsutsɔmɔ kanyaka ma balɛahwɛ gɛ ba baɖɔ nɛ bulɔ shu.

⁹ Kasɛ banɔdzidzi nɛ sɛ tɛ ba bubɔ ishu kɔ balɛ apalete alɛ nɛ kibuinyɛbui mɛ, ba bhɛtɛ sɛ tɛ be kua lɛ awɔ̃, sɛ tɛ beti vu kibui asɔlɛ nɛ balɛ,

¹⁰ klɛ tɛ beti zuru balɛ kɛdɔnyɛdɔ, pɔ ba kasɛ asɛ be nu banɔ gɛ ba ba yɛkɛ balɛabha aŋa petee, sɛ tɛ nɛ kidzonyɛdzoa bha ba ba bhɛtɛ kɛdɔkɛkasɛ denɔ Kpaya bulɔ Agɛ ebuanɔ nɛ shu tɛ kɛ ku li.

¹¹ Alasɛ Kpaya ɛyamyuyɔ nɛ gɛ ɔmɛna tɛbhubhuiyɛkɛ nɔ tɛ wɛ̃ kɔ banɔ petee.

¹² Lɔɔ kasɛ lɔ sɛ buɖɔ sɛ, “Ao” kɔ kpaya mɛ mazamaza anɛ kanɔmɛdɔ pɛpɛɛ, klɛ tɛ ɔna ishu ganɔ, tɛfuflɔ̃ anɛ kpayamzɛza ɛkpã nɛ ɔtsɔ̃ nɛa nɔmɛ,

¹³ nɛ kibe lɛ gɛ bu dzi zi po kidzoenudidi yuyula, nɛ bulɔ Kpaya gbla anɛ Yesu Kristo Agɛ ayɛkɛ kɔ lɔ, nɛ tɛwɛwɛ̃,

¹⁴ gɛ ayɛkɔ yɛ shu akɔ nɛ bulɔɛ tɔkpu sɛ tɛ ebu lɔ edenɔ kɛtɔkpum gɛganɛ petee mɛ tɛ epulu banɔ nɛ gɛ enu yɛnahwɛ ayɛ nɛ akɔ shu, gɛ ba pɛa sɛ tɛ ba bhɛtɛ kɛgɛ nu kɛdzyɔgo.

¹⁵ Kɛlɛ sɛ, ebuia nɛ, alɛ nu agɛ ala lɛ sɛ tɛ ɔkasɛ. Kpa lɛ kemi klɛ tɛ ɔkpa lɛ nɛ kabhaŋɛŋa petee mɛ. Tɛ kɔ anɔnyanɔ akpɛ wɔ butsɔ.