Tɛbubukasɛ 8 - ONUGBÙ NYƐNYÃ VUVƆ

Adɛda Gigenemi

¹ Gɛ adanɛ adɛda gigenemi nɛɛ, owũsise nɛ ɔdɔ sɛɛ̃ ɔyɛkɔ nanɔ ɔɖatɛta torikpo anɛ kapɛ.

² Klɛ mɛ mɔ kpayaxwɛdɛ tiegene gɛ be li kititi nɛ Kpaya amɛ, klɛ ba kɔa lɛ buxulɔ̃ɛ tugene.

³ Kpayaxwɛdɛ bhlatɔ, gɛ evunɔ sɛkadzɛdzã ɔnyɔ̃ɛpuli, aba klɛ ebe li kititi nɛ busolɛvu mɛ kɛdɔpɔɛkɔ nɛ ɔbha. Ba kɔ yɛ kɛdɔ huhuhu gelee sɛ ayɛkɔ kɔ, ɔyɛkɔ plɛnɔ banɔnɛna anɛ kpayakuklu petee, anɛ sɛkadzɛdzã kɛdɔpɔɛkɔ nɛ bukusiegbu nɛ amɛ.

⁴ Kɛdɔ huhuhu nɛ ɔnyɔ̃, ɔyɛkɔ plɛnɔ banɔnɛna nɛ kpayakuklu, avɛa bha nɛ Kpaya amɛ denɔ kpayaxwɛdɛ nɛ ahwɛ mɛ.

⁵ Ɔkɛlɛ kpayaxwɛdɛ nɛ ayɛkɔ ɔnyɔ̃ɛplui, eyuku kɛlɛ nɛ kifu gɛ de busɔlɛvu mɛ kɛdɔpɔɛkɔ, klɛ ayɛkɔ tɛ̃ elu kesukpa; klɛ ɔkɛlɛ subhalɛlɛɛ ɛmɔɛ, igugu edidedi, subhɛfu anɛ kesukpahuhwa aba.

Buxulɔ̃ɛ

⁶ Ɔkɛlɛ kpayaxwɛdɛ tiegene nɛ ge vunɔ buxulɔ̃ɛ tugene na bala kɔ bulɛ tɛbubɔ.

⁷ Kpayaxwɛdɛ tutɔpu nɛ abɔ yɛa xũlɛ̃, klɛ amuklãgbu anɛ kifu abhɛsa nɛ dzyosu aba, klɛ la yɛkɔ balɛ atrɔ kesukpa nɛa bha. Kesukpa nɛ kapɛ tierikpo nɛ bupɛ tɔta nɛ mɛ katã petee, besi nɛ kapɛ tierikpo nɛ bupɛ tuta nɛ mɛ batã petee, klɛ tɛwa wuwɔ nɛ petee tã.

⁸ Kpayaxwɛdɛ bhla nɛ abɔ yɛa xũlɛ̃, klɛ kɛdɔ tili ansɛ butu gbɛgbla tuli, sɔlɛ tã petee, ba yɛkɔ atɛ̃a kpɛ aƒu nɛ mɛ. Aƒu nɛ bupɛ tuta mɛ, kazɛzɛ tsyina dzi dzyosu,

⁹ kapɛ zɛzɛ nɛ kɛdɔ bhɛbhɛtɛ lulu nɛ aƒu mɛ nɛ bupɛ tuta mɛ nɛ tsi, klɛ keniabha ipupu nɛ bupɛ tuta mɛ, kazɛzɛ ke zi petee.

¹⁰ Kpayaxwɛdɛ tramɛ nɛ abɔ yɛa xũlɛ̃, klɛ kɛwũwɔɛ gbla tili, gɛ tã ansɛ ɔbɛya, ɔwɔlɛ denɔ owũsise nɛ ɔbɔ dɔ bunikekpu nɛ petee mɛa pɛ zɛzɛ nɛ bupɛ tuta mɛ nɛ beni nɛ gɛ yi koeyi nɛ tisi mɛ—

¹¹ kɛwũwɔɛ nɛ nyi kɛlɛ nu Osimɛsɔ̃. Beni nɛ kapɛgbladɛ nɛ tsyina eve kɛtɛkɛtɛ, klɛ banɔ gelee betsi nɛ buni nɛ gɛ tsyina ve nɛ mɛ.

¹² Kpayaxwɛdɛ lɛ̃lɛ̃mɛ nɛ abɔ yɛa xũlɛ̃, klɛ kiwi nɛ kapɛ zɛzɛ kadzya nɛ bupɛ tuta mɛ, wele nɛa pɛ nɛ tuta mɛ, awɛ̃wɛ̃ nɛ kapɛ nɛ bupɛ tuta mɛ, so tierikpo nɛ bupɛ tuta nɛ mɛ ketsyina dzi otumu. Keli zɛza nɛ kapɛ zɛzɛ nɛ bupɛ tuta mɛ na za otumu mɛ, klɛ kana elishi nɛ kapɛ zɛzɛ nɛ tuta mɛ nɛ tsyɛ aza.

¹³ Gɛ idi nɛɛ, inu odi gɛ opruru nɛ kɛlɛɛ mɛ bɔɛ gɛ lo kului dɔ nɛ ogugu gɛganɛɛ sɛ: “Butɔ! Butɔ! Butɔ kɔ bagɛ be tsri kesukpa nɛa bha, alasɛ kpayaxwɛdɛ tɛata gɔgɔɛ nɛ buxulɔ̃ɛ nɛ ba yi!”