Tɛbubukasɛ 7 - ONUGBÙ NYƐNYÃ VUVƆ

Banɔ Akpã Kɛfɔɛfɔ Zɛzɛ Anɛ Aftalɛ̃ Nɛ Tɛalɛ̃ (144,000) Gɛ Bakɔ Kɛna

¹ Kɛɛ nɛ nɛede ɛmɔ kpayaxwɛdɛ tɛalɛ̃ gɛ be li kititi nɛ kesukpa nɛ idrekekpu tɛlɛ̃ nɛ mɛ, klɛ ba nyɛna kesukpa nɛ beglebe tɛalɛ̃ nɛ evunɔ tɛ be xe kidzo kɔ kɛlɛɛ kanyaka sɛ kɛtɛ fu balɛ nɛ kesukpa nɛa bha, aƒu nɛa bha ɔdɔgɔsɛ kifu hunɔ osi nyɔ osi.

² Ɔkɛlɛ mɛ ɛmɔ kpayaxwɛdɛ bhlatɔ gɛ ede kiwiɔyɛkɔ nɛ aaba, gɛ evunɔ ɛkpã Kpaya nɛ adɛda. Ekulu nɛ oli mɛ gɛganɛ kpayaxwɛdɛ tɛalɛ̃ nɛ gɛ ba tɛ kɔa lɛ kemi sɛ tɛ be zi kɛdɔ nɛ kesukpa anɛ aƒu nɛa bha asɛ:

³ “Tɛ zi kɛdɔ nɛ kesukpa, aƒu, ɔdɔgɔsɛ besi nɛ shu ɔdɔnanɔ kibe lɛ gɛ bu kɔ kɛdɔ da bulɔ Kpaya baxwɛwa nɛ butukpo.”

⁴ Ɔkɛlɛ mɛ inu banɔ tɛashɛ nɔɔ nɛ gɛ balɛ butukpo nɛ la dɛɛ dɔ: Banɔ akpã kɛfɔɛfɔ zɛzɛ nɛ aftalɛ̃ nɛ tɛalɛ̃ (144,000) denɔ Izraɛl amadi nɛ petee mɛ.

⁵ Denɔ Yuɖa kɛmadi nɛ mɛ akpã lɔfɔntabha (12,000) la dɛɛdɔ, denɔ Rubɛnɛ kɛmadi nɛ mɛ akpã lɔfɔntabha (12,000), denɔ Gaɖɛ kɛmadi nɛ mɛ akpã lɔfɔntabha (12,000),

⁶ denɔ Asha kɛmadi nɛ mɛ akpã lɔfɔntabha (12,000), denɔ Naftalɛ kɛmadi nɛ mɛ akpã lɔfɔntabha (12,000), denɔ Manase kɛmadi nɛ mɛ akpã lɔfɔntabha (12,000),

⁷ denɔ Simɔnɛ kɛmadi nɛ mɛ akpã lɔfɔntabha (12,000), denɔ Lewi kɛmadi nɛ mɛ akpã lɔfɔntabha (12,000), denɔ Issaka kɛmadi mɛ mɛ akpã lɔfɔntabha (12,000),

⁸ denɔ Zebulɔnɛ kɛmadi nɛ mɛ akpã lɔfɔntabha (12,000), denɔ Yosɛfu kɛmadi nɛ mɛ akpã lɔfɔntabha (12,000), denɔ Bɛndzyamɛnɛ kɛmadi nɛ mɛ akpã lɔfɔntabha (12,000).

Banɔɛha Gbla Nɛ Bawi Fufu Mɛ

⁹ Kɛɛ nɛ nɛede idi klɛ nɛ mɛ amɛ banɔɛha gbla tili za gɛ anɔnyanɔ atɛ ba na banɔ nu kla, denɔ amadiha, kɛmadi, banɔ anɛ benuhu, be li kititi nɛ bukusiegbu nɛ amɛ anɛ Obhoshieyi nɛ otugba. Ba kpɛ bawidzidze fufu klɛ be vunɔ trɛwã nɛ balɛ ahwɛ mɛ.

¹⁰ Klɛ ba kpɛ igugu gɛganɛɛ asɛ: “Tɛbhubhuiyɛkɛ nu bulɔ Kpaya nɛ yɛ, gɛ ezhiedzi bukusiegbu nɛa bha, anɛ kɔ Obhoshieyi.”

¹¹ Kpayaxwɛdɛ nɛ petee be li kititi akana bukusiegbu anɛ bakashishe anɛ kɛdɔbhɛbhɛtɛ lulu tɛlɛ̃. Ba wɔlɛadɔ akpɛ amɛesi nɛ bukusiegbu nɛ amɛ klɛ ba kpɛ kɛtɔkpuesi kɔ Kpaya,

¹² aaɖɔ asɛ: “Tɛlɛbɛlɛm! Kabhakpɛkpɛ nɛ ishudɛdanɛ anɛ kibuinyinyi anɛ ahwɛhuhu anɛ tɛkpɛkpɛabha anɛ kemi anɛ bɔgɛganɛ kɔ bulɔ Kpaya ɔyɛkɔ vɛnɔ. Tɛlɛbɛlɛm!”

¹³ Ɔkɛlɛ eshishe nɛ teli ebisi mɛ asɛ, “Banɔa nɛ bawidzidze fufu nɛ mɛ—baane le nu, klɛ fakɔ le de?”

¹⁴ Ibui lɛ nu asɛ, “Apalete, onyi.” Klɛ aɖɔ asɛ, “Banɛ balɛ nu bagɛ de ekoeyi nɛ butɔ gbla nɛ mɛ; be ti plu balɛ bawidzidze klɛ ba bhɛtɛ alɛ le fuli nɛ Obhoshieyi nɛ dzyosu mɛ.

¹⁵ Kɛlɛ so nɛɛ, “be li Kpaya bukusiegbu nɛ amɛ klɛ baa dɛ kɛxwɛ kɔ yɛ kemuze anɛ elishi nɛ yɛ busɔlɛvu mɛ, klɛ agɛ edzi bukusiegbu nɛa bha nɛ aba nɛna yɛ kɛpɔtɛagba nɛ ada lɛ.

¹⁶ Bɔbhɛ tɛa fla yia lɛ, oniwɛ̃ ɔtɛɔ flɔ taa lɛ Buwui tɛ ba tãa lɛ, ɔdɔgɔsɛ bukpɛkpɛ́kpɛ kanyaka.

¹⁷ Alasɛ Obhoshieyi nɛ bukusiegbu nɛ shitɛbha nɛ obo dzi balɛ agbɛgbanɔ; aba gbanɔa lɛ avɛnɔ beni lulu gɛ koeyi nɛ tisi mɛ ɔbha. Klɛ Kpaya ebe tsru ɛwɔ̃mɛ nyɛ wɔ̃mɛ ebu nɛ balɛ anhũ mɛ.”