Tɛbubukasɛ 6 - ONUGBÙ NYƐNYÃ VUVƆ

Badɛda

¹ Idi flogo pɛ Obhoshieyi nɛ ɔdanɛ badɛda tiegene anɛ atutɔpu. Ɔkɛlɛ mɛ nu kɛdɔbhɛbhɛtɛ lulu tɛlɛ̃ nɛɔmayɛ terikpoe dɔ nɛ oli mɛ ansɛ subhalɛlɛ sɛ, “Ba!”

² Idi, klɛ nɛ mɛ amɛ ɛsɔ fufu eli! Agɛ etsri yɛabha nɛ evunɔ bunyɔ, klɛ ba kɔ yɛ kikusikutu, klɛ aza ɛsɔ nɛa bha ekoeyinɔ ansɛ anɔ gɛ aŋɛa bha gɛ edi kidzoenu asɛ aba ŋɛabha.

³ Gɛ Obhoshieyi nɛ ɔdanɛ adɛda bhla nɛɛ, inu kɛdɔbhɛbhɛtɛ lulu bhla nɛ dɔ gɛ kɛɛ ɖɔ sɛ, “Ba!”

⁴ Ɔkɛlɛ ɛsɔ bhla ekoeyi aba, enu adzɛdzã hanyaa. Ba kɔ agɛ etsri yɛabha nɛ kemi sɛ tɛ ebu ishuyuyɔ nɛ kesukpa nɛa bha tɛ akɔ sɛ banɔ be yi ɔhaglɔ. Yɛ nɛɛ bakɔɛ ɛhɛ gbɛgbla teli.

⁵ Gɛ Obhoshieyi nɛ ɔdanɛ adɛda tramɛ nɛɛ, inu kɛdɔbhɛbhɛtɛ lulu tramɛ nɛ dɔ gɛ kɛɛ ɖɔ sɛ, “Ba!” Idi, klɛ nɛ mɛ amɛ ɛsɔ tutu teli eli! Agɛ etsri yɛa bha nɛ evunɔ buputitidɔ nɛ yɛa hwɛ mɛ.

⁶ Ɔkɛlɛ mɛ nu kɛdɔ tili dɔ gɛ kɛlɛ oli mɛ odzi ansɛ kɛdɔbhɛbhɛtɛ lulu tɛlɛ̃ nɛ shi, kɛɛ ɖɔ sɛ, “Agɔnɛ kedzyidzyi tierikpo kɔ kiwi zɛzɛ bhɛ, anɛ amɔ budzyidzyi tɔta kɔ kiwi zɛzɛ bhɛ, klɛ tɛ zi bubɔ anɛ bulu!”

⁷ Kibe lɛ gɛ Obhoshieyi nɛ ɔdanɛ adɛda lɛ̃lɛ̃mɛ nɛɛ, inu kɛdɔbhɛbhɛtɛ lulu lɛ̃lɛ̃ nɛ oli mɛ gɛ ɔɖɔ sɛ, “Ba!”

⁸ Idi, klɛ nɛ mɛ amɛ nɛɛ ɛmɔ ɛsɔ̃ vudugbee gɛ eli! Be kulu agɛ etsri yɛabha na sɛ Butsi, klɛ Bekpum alɛ yɛede etsobunɔ yɛ kpɔ̃, Ba kɔa lɛ kemi gɛ ka ŋa kesukpa nɛ kapɛ tierikpoa bha anɛ bupɛ tɔlɛ̃ mɛ sɛ be yi banɔ nɛ kɛpa nɛ mɛ, bubhɛ anɛ banyakpã, anɛ ganɔ kesukpa nɛa bha bagavuga nɛa bha.

⁹ Kibe lɛ gɛ adanɛ adɛda trimi nɛɛ, ɛmɔ busɔlɛvu mɛ kituku nɛesi ba gɛ be yi nɛ atɔwi akpɛ Kpaya kibui anɛ tɛmumɔɖɔ nɛ mɛ gɛ ba nyɛna evunɔ.

¹⁰ Be kulu kɛdɔ nɛ oli mɛ gɛganɛ asɛ, “Ɔdɔnanɔ kibe ɖueɖu, Bukusiɔŋakɔ Apalete, gɛ yɛ shu bhui klɛ alɛ nɛ kɛgba, ɔdɔnanɔ kibe lɛ gɛ okuluebhui nɛ banɔ nɛ gɛ ba lɛ kesukpa nɛa bha klɛ obo bisi bulɔ dzyosu nɛ buwule?”

¹¹ Ɔkɛlɛ ba kɔ akanyaka awidzidze fufu, klɛ be tsrea lɛ asɛ be fle po avɛnɔ otugba kɛbɔɛ, ɔdɔnanɔ kibe lɛ gɛ balɛ ɔhayɛalɛ baxwɛwa anɛ badzya nɛ gɛ ba lɛ sɛ tɛ be yi ansɛ gɛ ba lɛ tsyɛ aza nɛ bhɛtɛ beke.

¹² Idi gɛ adanɛ adɛda hlomi. Kesukpa kahwa gɛganɛ. Kiwi nɛ kitsyina tututu ansɛ kɛpɔtɛtutu gɛ be yu nɛ epidzya tɛka, wele nɛ petee etsyina dzã dzyosu tɛdzɛdzã,

¹³ klɛ awɛ̃wɛ̃ nɛ owũsise na wɔlɛ adɔ kesukpa, ansɛ gɛ kabhɔ eyuyu gɔgɔɛ aawɔlɛ denɔ kabhɔosi nɛa bha gɛ kɛlɛ gɛganɛ shuku ɔlɛ.

¹⁴ Owũsise nɛ ɔlɛla ansɛ kazaplukpa kɛkɛlɛ, gɛ ba kɛɛlɛ ayɛkɔ, klɛ banyɛna butu anɛ bunimɛesukpa kanyaka ebu nɛ bulɛ ɔzakɔ.

¹⁵ Ɔkɛlɛ kesukpɛabha bekusi, bekusieyi, keyutugbaniaka, be hueielete, banɔ gbɛgbla, anɛ anɔdzidzi kanyaka anɛ bagɛ kibui kanyaka dɛ kpaka gɛ be kpu nɛ betuzi mɛ anɛ betu mɛ aklãgbugbla kishi.

¹⁶ Be kulu betu anɛ betumaklãgbu nɛ asɛ, “Nɔ wɔlɛ ɔdɔ bulɔa bha tɛ no kpu lɔ nɛ agɛ ezhiedzi bukusiegbu nɛa bha nɛ amɛ anɛ Obhoshieyi nɛ obulo nɛ shu!

¹⁷ Alasɛ bɔtɔhihe kiwigbla nɛ tɛ ba, klɛ anee gɛ aba na kɛlɛ nu za?”