Tɛbubukasɛ 5 - ONUGBÙ NYƐNYÃ VUVƆ

Kazaplukpa Anɛ Obhoshieyi

¹ Ɔkɛlɛ mɛ mɔ agɛ edzi bukusiegbu nɛa bha nɛ kɛŋa ɔhwɛ nɛ mɛ anɛ kazaplukpa nɛ kɛdɔŋuŋlɔmɛ trɔ kalɛ bupɛ tubha nɛa bha klɛ ba da kalɛ nɛ badɛda tiegene.

² Klɛ mɛ mɔ kpayaxwɛdɛ gbɛgbla teli gɛ ebu aɖɔ nɛ oli mɛ gɛganɛɛa sɛ, “Ane gɛ ana kɔ adɛda nɛ tɛdɛdanɛ klɛ aba danɛ kazaplukpa?”

³ Pɔ anɔnyanɔ ama nɛ owũsise anɛ kesukpa nɛa bha ɔdɔgɔsɛ kesukpa nɛesi pɛ aba danɛ kazaplukpa pɛ ɔdɔgɔsɛ aba na kalɛ mɛ budi.

⁴ Ibi iyuyo klɛ mɛ tsodzini bi alasɛ ba dɛ mɔ anɔnyanɔ gɛ ana kɔ kazaplukpa nɛ tɛdɛdanɛ pɛ ɔdɔgɔsɛ edi kalɛ mɛ.

⁵ Ɔkɛlɛ anɔ shishe nɛ teli etsre mɛ asɛ, “Too bi iyuyo! Di, Yuɖanɛ kɛmadi Adzyata, Daviti ogu, lɔ tɛ ŋɛabha. Yɛ ana kɔ kazaplukpa anɛ kalɛ badɛda tiegene nɛ tɛdɛdanɛ.”

⁶ Ɔkɛlɛ mɛ mɔ Obhoshieyi, gɛ lɔ wɛ̃ ansɛ be ti bhui ɔlɛ, gɛ lo li kititi nɛ bukusiegbu nɛ kishitɛbha, kɛdɔbhɛbhɛtɛ lulu tɛlɛ̃ anɛ bakashishe nɛ ba kana kalɛ atsya. Ashã tegene nɛ anhũ tegene ala lɛ yɛ, gɛ alɛ enu Kpaya ɛfufɔɛ tigene gɛ ba kpɛ asɛsɛ kesukpa nɛa bha petee.

⁷ Aba klɛ aba yɛkɛ kazaplukpa nɛ edenɔ agɛ ezhidzi kekusigbu nɛa bha nɛ kɛŋahwɛ nɛ mɛ.

⁸ Klɛ gɛ ayɛkɛa lɛ beke, kɛdɔbhɛbhɛtɛ lulu tɛlɛ̃ anɛ banɔshishe afɛtabha anɛ tɛalɛ̃ nɛ bezhiakpla nɛ obhoshieyi nɛ ete mɛ. Akanyaka evunɔ ohui sangu klɛ be vunɔ sɛkadzɛdzã busugba gɛ buyuku nɛ kedɔhuhu, gɛ kɛ nu kpayanɔ nɛ kpayakuklu.

⁹ Klɛ ba zha ɔdzɛ vuvɔ: “Wɔ ɔna sɛ tɛ ɔyɛkɔ kazaplukpa tɛ ɔdanɛ kalɛ badɛda, alasɛ be yi wɔ, klɛ ɔyɛkɔ wɔ dzyosu odzi banɔ kɔ Kpaya denɔ kɛmadi nɛ bunuhu kanyaka mɛ anɛ banɔ nɛ amadi nɛ mɛ.

¹⁰ Ɔbhɛtɛ balɛ sɛ tɛ be dzi bukusiɔŋakɔ nɛ kpayanɔ sɛ tɛ ba dɛ kɛxwɛ kɔ bulɔ Kpaya, klɛ la ba ŋa bukusi nɛ kesukpa nɛa bha.”

¹¹ Ɔkɛlɛ mɛ idi klɛ mɛ nu kpayaxwɛdɛ gelee ili mɛ, gɛ balɛ tɛkɛkla mɛ na akpã ɔyɛkɔ trɔ akpã bha, nɛ akpã lɔfɔ yɛ ɛzakɔ lɔfɔ. Ba kana bukusiegbu anɛ kɛdɔbhɛbhɛtɛ lulu anɛ banɔ shishe nɛ atsya.

¹² Nɛ ili mɛ gɛganɛɛ klɛ la zha ɛdzɛ asɛ: “Obhoshieyi nɛ gɛ beyi, kedziŋɛŋa lɛ ɔlɛ, sɛ tɛ lɔ yɛkɛ kemi anɛ kɛnɔmdɔ anɛ kibuinyinyi anɛ bugɛganɛ anɛ anɔdidi anɛ ishubhubhui anɛ kabhakpɛkpɛ!”

¹³ Ɔkɛlɛ mɛ inu kɛdɔbhɛbhɛtɛ nɛ owũsise anɛ kesukpa nɛa bha anɛ kalɛesi anɛ aƒu nɛa bha, anɛ kedɔnyɛdɔ petee gɛ kpasɛ kɛlɛ mɛ, nɛ lɛ zha ɛdzɛ sɛ: “Kɔ agɛ yɛ edzi kekusigbu nɛa bha anɛ kɔ Obhoshieyi ba kpɛ kɛlɛ nɛa bha anɛ tɛdidi anɛ ishubhubhui anɛ kemi, ɔyɛkɔ vɛnɔ mabeke mabeke mɛ!”

¹⁴ Kɛdɔbhɛbhɛtɛ lulu tɛlɛ̃ nɛ sɛ, “Tɛkɛbɛlɛm,” klɛ beshishe nɛ be zhiadɔ klɛ ba kpɛ kɛtɔkpuesi.